Биткоин табысы жағынан алтын мен технологиялық компаниялардың акцияларынан озып кетті
Сәуір айында Strategy ізімен криптовалюта сатып ала бастаған компаниялар ең үлкен өсім көрсетті.
Сәуірде биткоинның бағасы алтын мен технологиялық компаниялар акцияларына қарағанда қымбаттай бастады. Осы жағдайдан кейін инвесторлар «Ең ірі криптовалюта нарықтағы дағдарыс кезінде (мысалы, АҚШ енгізген импорттық баждар сияқты) қауіпсіз актив бола ала ма?» деген сұраққа жауап іздей бастады, деп жазады Bloomberg.
Егжей-тегжейі:
1 сәуірден бері биткоин шамамен 12%-ға қымбаттады. Криптовалютаны ұнататындар бұл өсімге байланысты АҚШ-тың бюджет саясаты мен мемлекеттік органдардың сенімділігіне қатысты күмән артқан кезде биткоин балама қорғаныс құралы ретінде тиімді жұмыс істеді дегенді айтып отыр, деп жазды Bloomberg.
2 сәуірде Дональд Трамп импорттық баж салығы туралы жариялағаннан кейін Nasdaq Composite индексі 0,2%-ға, ал Bloomberg Dollar индексі шамамен 4%-ға төмендеді. Алтын бағасы — әдеттегі тұрақсыз кезеңдердегі қорғаныш активі — алғашында бір унциясы үшін 3500$ деңгейіне жетіп, рекорд орнатты. Бірақ кейін санға түзетулер жасалды, осылайша айды 6,1% өсіммен аяқтады.
Баж салығының биткоинға әсері
Бастапқыда биткоин мен басқа да тәуекелді активтер импорттық баж туралы жаңалықтан кейін арзандай бастаған. Алайда 8 сәуірден бастап ұзақ мерзімді қазынашылық облигациялар кірісінің өсуімен бірге биткоин қымбаттай бастады. Bloomberg пікірінше, инвесторлар, осылайша, саяси тәуекелдерден қорғануға тырысты. АҚШ-тың экономикалық саясаты мен ФСЖ-ның (федералдық сақтық қор жүйесінің) тәуелсіздігіне күмән артқаннан кейін, олар швейцариялық франк, еуро, алтын және, сайып келгенде, биткоинға жүгінді.
Бұл ұзақ мерзімді үрдіс пе?
FalconX талдау бөлімінің жетекшісі Дэвид Лаван биткоин мен дәстүрлі тәуекел активтері арасындағы соңғы айырмашылыққа қарап, асығыс қорытынды жасамауға шақырады. Оның айтуынша, активтер арасындағы «декорреляция» тек уақытша болуы мүмкін, өйткені биткоинның негізгі қор индексімен 30 күндік корреляциясы әлі де 0,6 шамасында. Бұл жоғары көрсеткіш.
Дэвид Лаван нарықтағы күйзеліс кезінде биткоинның бета-коэффициентінің (активтің нарықпен салыстырғандағы құбылмалылығын көрсететін өлшем) тарихи түрде төмен болуын ерекше жайт деп атады. Бұл инвесторлардың биткоинды енді жетілген, ұзақ мерзімді актив ретінде қабылдай бастағанын білдіруі мүмкін.
Сәуір айында АҚШ-тағы биткоинға тікелей инвестициялайтын ETF қорларына шамамен 2,9 миллиард доллар құйылды. Бұл – айтарлықтай өзгеріс: наурыз және ақпан айларында инвесторлар керісінше, бұл қорлардан 811 миллион және 3,6 миллиард долларды алып кеткен еді.
Standard Chartered банкіндегі цифрлық активтер жөніндегі зерттеу бөлімінің жетекшісі Джефф Кендриктің айтуынша, алдағы уақытта биткоинның бағасы АҚШ-тан тыс активтерге стратегиялық түрде қайта инвестициялау есебінен өсуі мүмкін. Ол биткоинды жүйелік тәуекелдерге қарсы тиімді қорғаныс (хедж) құралы деп санайды және оның орталықтандырылмаған сипаты алтыннан да мықты қорғаныс құралы бола алатынын айтады. Кендриктің айтуынша, биткоинның осындай қорғаныс қасиеттері бүгінгі таңда бұрынғыдан да маңызды бола түсті — өйткені қатерлер ауқымы кеңейіп барады: 2023 жылғы Silicon Valley Bank-тің күйреуінен бастап, АҚШ-тың Федералдық сақтық қор жүйесіне үкімет тарапынан ықпал ету қаупіне дейін.
Криптовалютаға қатысы бар компаниялардың жағдайы
«Биткоин бағасының көтерілуімен криптовалютаға қатысы бар компаниялардың акциялары да сәуірде өсті, әрі АҚШ-тың қор нарығындағы күйзелістерден зардап шеккен жоқ», деп жазады Bloomberg.
Strategy (бұрынғы MicroStrategy) компаниясының акциялары сәуірде 31,8%-ға, Coinbase Global криптобиржасы — 15,1%-ға, ал CleanSpark майнинг компаниясы — 13,8%-ға өсті. Бұл екі таңбалы өсімдер, ал осы уақытта S&P 500 индексі 2,5%-ға төмендеген.
«Криптовалюта секторындағы компаниялар үшін басты қозғаушы күш – биткоинның спот бағасы болды. Бұрын баж салығына байланысты көп майнерлер зардап шеккен болатын, енді олар қалпына келе бастады», — деп түсіндіреді Keefe Bruyette & Woods аналитигі Билл Папанастасиу.
Алайда, жыл басынан бері, әсіресе күрделі болған бірінші тоқсаннан кейін, криптовалюта компанияларының көпшілігінің бағасы әлі де төмен. Сол кезде биткоин бағасының төмендеуі бұл компаниялардың акцияларын құлатқан. Майнингпен айналысатын компаниялардың акциялары ерекше қатты зардап шекті. Себебі өндіріс тиімсіз бола бастады, ал жаңа баж салығы жабдық бағасының өсуіне қауіп төндіреді.
Сәуірде ең әсерлі өсімді Strategy жолымен жүріп, криптовалюта сатып алуға бел буған компаниялар көрсетті. Upexi акциялары Solana токенін сатып алу үшін 100 млн доллар тарту жоспарын жариялағаннан кейін 450%-ға өсті. Ал бос активтерін биткоинға ауыстырған GameStop бейне-ойын ритейлері бір айда нарықтық құнын 26%-ға арттырды.
