Зумерлердің көмегі: Prada табысын қайта өсірді
Компанияның бөлшек саудадағы кірісі барлық аймақтарда екі таңбалы өсім көрсетті.
Мода әлеміндегі Prada үйі бірінші тоқсанда табысын арттырғанын хабарлады. Бұл табыс сәнді брендтердің басым бөлігі құлдыраған шақта тіркеліп отыр. Компанияға мұндай қиындықтан шығуға Z ұрпағы (зумерлер) арасында танымал Miu Miu бренді көмектесіп жатыр: бұл брендке сұраныс әлі де жоғары.
Ал нарық көшбасшылары — француздық LVMH пен Kering (Gucci иесі) бұған дейін сатылым көлемінің төмендегенін мәлімдеген, ал Hermès болса әдеттегідей емес, баяу өсім көрсетуде.
Егжей-тегжейі:
Prada компаниясы бірінші тоқсан қорытындысы бойынша табыстың 13%-ға өсіп, шамамен 1,34 миллиард еуроға (1,53 млрд доллар) жеткенін хабарлады. The Wall Street Journal-дың Visible Alpha консенсус-болжамына сүйенсек, сарапшылар бұл көрсеткіш 1,33 млрд еуро болады деп күткен.
Prada брендінің сатылымы өткен жылдың алғашқы тоқсанымен салыстырғанда бір деңгейде қалған — ол кезде нәтижелер айтарлықтай жоғары еді. Ал Miu Miu брендінің сатылымы жылдық есеппен 60%-ға өсті.
Prada тобы барлық аймақтарда екі таңбалы өсім көрсеткен. Атап айтқанда, Азия-Тынық мұхиты аймағы мен Солтүстік және Оңтүстік Америкада — 10% өсім, ал Таяу Шығыста — 26% өсім.
«Prada тіпті 2024 жылдың ең үздік тоқсанымен салыстырғанда да тұрақтылық танытты. Жылдың екінші жартысында салыстыру базасы сәл жеңілдегенімен, саланың жалпы ахуалы күрделі болып қала береді», — деді Prada компаниясының басшысы Андреа Герра.
Инвестор үшін маңызды
Bloomberg жазуынша, люкс сегментіндегі көп компаниялар Қытайда сұраныстың әлсіреуіне байланысты қиындық көріп жатыр. Бұл елде жылжымайтын мүлік нарығы құлдырап, жалпы экономика баяулаған. АҚШ-та да жылдың басында жағдай күрделене түскен.
Бұған дейін әлемдік люкс нарығының көшбасшысы LVMH (Louis Vuitton мен Christian Dior бренді иесі) Қытай мен АҚШ-та сатылым азайғанын мәлімдеген болатын.
Kering тобы да (Gucci иесі) бірінші тоқсанда кірісінің төмендегенін хабарлады.
Сатылымы төмендемеген санаулы брендтердің бірі — Hermès. Алайда бұл компания да өсу қарқынын сәл-пәл жоғалтып отыр. Бұл да Қытайдағы люкс өнімдерге сұраныстың азаюымен байланысты.
Алдын ала болжамдарда JPMorgan сарапшылары Prada мен Cartier брендіне иелік ететін Richemont компаниясын нарықтың тұрақсыздығына қарсы тұра алатын, мықты брендтік имиджі мен баға саясаты бар компаниялар ретінде атап өткен еді, деп жазады WSJ.
Контекст
Сәуір айында Prada америкалық Capri Holdings модалық конгломератынан Versace брендін 1,38 млрд долларға сатып алуға келіскенін хабарлады. Бұл келіссөздер бірнеше айға созылып, АҚШ президенті Дональд Трамптың сауда саясатына байланысты келісім сәтсіздікке ұшырауы мүмкін деген қауіп болған, деп жазды Bloomberg пен The Wall Street Journal.
Versace бренді әлі де дағдарыстан толық шықпағанымен, бұл келісім Prada-ға нарықтағы алыптар — LVMH пен Kering-пен бәсекелесуге жол ашуы мүмкін, дейді сарапшылар.
Акциялар жағдайы
30 сәуірде Гонконг биржасында Prada акциялары 1,2%-ға төмендеп, 48,5 гонконг долларына (6,3 АҚШ доллары) дейін арзандады. Сауда қаржылық есеп жарияланбай тұрып аяқталған.
Жыл басымен салыстырғанда компания акциялары шамамен 20%-ға құлдыраған.
Prada-ның нарықтық құны әлі де бәсекелестерінен әлдеқайда төмен. Ақпан айындағы ең жоғары бағамен салыстырғанда 32%-ға арзандағаннан кейін, компанияның нарықтық құны шамамен 16 млрд еуроға тең. Ал LVMH-тің нарықтық құны 244 млрд еуро шамасында, деп көрсетеді MarketWatch.
FactSet мәліметінше, қазіргі уақытта бірде-бір сарапшы Prada акцияларын сатуға кеңес бермейді. 15 сарапшы акцияларға «сатып алуға болады» немесе «артық салмақ» деген баға берген, тағы 4 сарапшы «ұстауға тұрарлық» деп бағалаған.
