Google жасанды интеллект бойынша Apple-мен келісім жасауға ниетті
Apple жүйесіне Apple Intelligence жасанды интеллектісі кіріктірілген. Оның шамасы жетпейтін күрделі тапсырмаларды орындау үшін жүйе ChatGPT мен қытайлық Alibaba алгоритмдерін пайдаланып отыр.
Alphabet компаниясының бас директоры Сундар Пичайдың айтуынша, Google биыл өзінің Gemini жасанды интеллектісін iPhone жүйесіне енгізгісі келеді. Сол арқылы оны жүйелік деңгейде жұмыс істейтін чат-боттардың бірі етуге ниетті. Оның бұл мәлімдемесі Safari браузерінде Google-ды әдепкі (default) іздеу жүйесі ретінде қолдануға қатысты жүріп жатқан антимонополиялық тексеріс барысында айтылды. Google бұл үшін Apple-ға ақы төлейді, ал АҚШ Әділет министрлігі мұны монополиялық сөз байласу деп есептейді.
Егжей-тегжейі:
Bloomberg дерегі бойынша, тыңдау кезінде Сундар Пичай 2024 жылы Apple басшысы Тим Кукпен Gemini-ді iPhone жүйесіне енгізу жөнінде келіссөздер жүргізгенін айтып қалды. Сондай-ақ келісім биыл жасалады деген үмітте екенін жеткізді.
Қазіргі уақытта Apple өз құрылғыларына – iPhone, iPad және Mac-қа арналған Apple Intelligence атты жасанды интеллект жүйесін қолданады. Бірақ күрделірек тапсырмалар үшін ChatGPT-ді де жүйеге қосты. Ал Қытайда Apple ChatGPT-ді пайдалана алмайтындықтан, бұл функцияны Alibaba алгоритмдері арқылы жүзеге асыруға келіскен. Осылайша, Gemini — Apple жүйесіне қосылуы мүмкін үшінші жасанды интеллект болмақ.
30 сәуірде Alphabet-тің А класындағы акциялары биржадағы сауда кезінде шамамен 3% арзандады. Алайда күн соңында сәл өсіп, жалпы құлдырау 0,85% болып тіркелді.
Контекст
Bloomberg Apple мен Google-дың ұзақ уақыттан бергі серіктестігін еске салды. Мысалы, 2007 жылы шыққан алғашқы iPhone-да YouTube бірден жеке қосымша ретінде ұсынылған. Ал Google Maps карталары Apple құрылғыларында 2012 жылға дейін әдепкі жүйе болды. Екі компания арасындағы ең маңызды келісім — Safari браузерінде әдепкі іздеу жүйесі ретінде Google-ды пайдалану. Осы үшін Apple Google-дан айтарлықтай табыс алады. 2022 жылы бұл сома $20 млрд-қа жеткен. Дәл осы келісімге байланысты АҚШ Әділет министрлігі Google-ға қарсы антимонополиялық іс қозғап отыр. Сундар Пичай өз мәлімдемесін сол істің аясында жасады.
Apple 9 маусымда дәстүрлі WWDC әзірлеушілер конференциясын өткізеді. Сарапшылардың айтуынша, сол шарада iOS 19, iPadOS 19 және жаңа macOS нұсқалары таныстырылады. Егер Google-мен келісім жасалса, Gemini-дің iPhone жүйесіне кіріктірілетіні дәл осы конференцияда жария етілуі мүмкін.
Сарапшылар пікірі
Жыл басынан бері Alphabet холдингіне тиесілі А класындағы акциялар 16%-ға арзандады.
MarketWatch дерегінше, 72 сарапшы бұл акцияларға рейтинг берген: олардың 51-і «сатып алуға кеңес береміз» (Buy) десе, 9-ы «жоғары үлесі бар» (Overweight) деген баға қойған, ал қалған 12-сі «ұстай тұру керек» (Hold) деп есептейді.
Wall Street-тің ортақ бағалауынша, Alphabet акциясының мақсатты құны — 201,33$. Бұл көрсеткіш қазіргі баға деңгейінен 27% жоғары.
