Uber Еуропада Қытай серіктесімен бірге роботакси қызметін іске қосады
Такси шақыру қызметі саналатын Uber Technologies 2026 жылы Еуропада роботакси қызметін іске қосатынын хабарлады. Бұл жоба Қытайдың Beijing Momenta Technology компаниясымен бірлесіп жүзеге асырылады. Momenta — Қытайда жүргізушісіз көлік технологияларын сынап көрген тәжірибелі компания. Uber бұған дейін АҚШ-та Waymo және Motional, ал Біріккен Араб Әмірліктерінде Қытайдың WeRide компаниясымен бірігіп осындай қызмет көрсеткен болатын. Tesla секілді өздігінен роботакси жасап шығарудың орнына, Uber серіктестік арқылы жұмыс істеуді жөн көріп отыр.
Егжей-тегжейі
Uber мен Momenta арасындағы келісім АҚШ пен Қытайдан тыс нарықтарға бағытталған. Бірлескен автономды көліктерді 2026 жылдан бастап Еуропаның кей елдерінде іске қосу жоспарланып отыр. Алғашқы кезеңде бұл көліктерде рөлде адам отырады — яғни толық жүргізушісіз емес.
Momenta Еуропада емес, Қытай жолдарында жүргізушісіз технологияларды сынақтан өткізген. Оның инвесторлары қатарында — General Motors (Chevrolet пен Cadillac өндірушісі), Сингапурдың Temasek Holdings инвестициялық қоры және Қытайдың IDG Capital компаниясы бар. Сонымен қатар, Momenta Alibaba Group компаниясының негізін қалаушы Джек Ма құрған Yunfeng Capital қорынан да қаржыландыру алған.
Жұма күнгі саудада Uber акциялары 4,2%-ға қымбаттап, 84,28$ деңгейіне жетті. Бұл — 2024 жылдың 14 қазанынан бергі ең жоғары жабылу бағасы.
Контекст
Uber жүргізушісіз көлік технологиясымен айналысатын стартаптармен серіктестігін белсенді түрде кеңейтіп жатыр.
1 мамыр күні Uber Toyota қаржыландырған May Mobility компаниясымен келісімге келгенін жариялады. Жаңа келісім аясында бірнеше жылдың ішінде жолға мыңдаған автономды көлік шығару жоспарланған. Алғашқы іске қосу 2025 жылдың соңында Техас штатындағы Арлингтон қаласында өтпек.
Uber АҚШ-та да роботакси қызметін ұсынып келеді: Аризона штатындағы Финикс қаласында бұл қызмет Alphabet компаниясына тиесілі Waymo-мен, ал Лас-Вегаста Motional компаниясымен бірлесіп жүзеге асырылуда. 2024 жылдың желтоқсанында Uber Қытайдың WeRide компаниясымен бірге алғаш рет АҚШ аумағынан тыс жерде — Біріккен Араб Әмірліктерінің Абу-Даби қаласында жүргізушісіз көліктермен жолаушы тасымалын бастады.
Uber-дің АҚШ-тағы бәсекелесі Lyft те May Mobility компаниясымен бірлесіп, осы жазда Атлантада алғашқы роботакси қызметін іске қоспақ. Әзірге көлік ішінде оператор болады. 2026 жылы Lyft Даллас қаласында толық автономды көліктер қызметін іске қосуды жоспарлап отыр. Бұл жобада Mobileye компаниясының жүргізушіге көмек көрсету жүйесі пайдаланылады.
Bloomberg мәліметінше, Uber бүгінде 10-нан астам халықаралық серіктеспен келісім жасасқан. Бұл серіктестік Uber-дің жолаушылар тасымалы, жеткізу және жүк көлігі қызметтерінде жүргізушісіз көлік технологиясын енгізуге бағытталған. Бұл серіктестіктер роботакси нарығына деген қызығушылық артып келе жатқан тұста жасалып отыр. Мәселен, Tesla компаниясы Остин қаласында жүргізушісі бар автономды көліктерін іске қосуға дайындалып жатыр, ал Alphabet-тің еншілес компаниясы Waymo өз автопаркін АҚШ-тың ірі қалаларында жылдам кеңейтуде.
Сарапшылар пікірі
Жыл басынан бері Uber акциялары шамамен 40%-ға қымбаттады. MarketWatch дерегінше, бұл қағаздарды 58 сарапшы бақылап отыр, олардың 50-і сатып алуға кеңес береді (оның ішінде 44 сарапшы — «сатып алу», ал 6 адам — «салмағы басым» деп бағалаған). Қалған сегізі акцияны «қолда ұстау керек» деп санайды. Сатуға кеңес берген ешкім жоқ.
Уолл-стриттің орташа болжамы бойынша Uber акциясының бағасы 89,4$ болады. Бұл жұма күнгі жабылу бағасынан 6% жоғары.
