ОПЕК+ өндірісті арттырған соң, инвестбанктер мұнай бағасын төмендейтінін болжауда
Уолл-стриттегі бірнеше ірі инвестбанк мұнай бағасына қатысты болжамдарын төмендетті. Бұл шешім ОПЕК+ тобына кіретін сегіз елдің келесі айда мұнай өндіру көлемін арттыратынын хабарлауынан кейін қабылданды. Олар мұндай қадамды жаһандық қорлардың төмен деңгейімен түсіндірді. Сарапшылардың айтуынша, егер мұнай өндірісі артып, сұраныс әлсірей берсе, мұнай бағасы барреліне $50-дан төмен түсуі мүмкін.
Толығырақ
— Barclays Brent маркалы мұнайға 2025 жылға арналған бағасын 4 долларға төмендетіп, барреліне 66 доллар, ал 2026 жылға 2 долларға азайтып, 60 доллар деп белгіледі.
— Goldman Sachs 2025 жылдың екінші жартысына Brent мұнайының орташа бағасын барреліне 60 доллар, ал WTI — 56 доллар деп болжайды (бұрынғы болжамдары — 63 және 59 доллар). 2026 жылға Brent пен WTI-ға арналған болжамдары сәйкесінше 56 және 52 доллар, бұрынғысы — 58 және 55 доллар.
— Morgan Stanley 2025 жылға арналған тоқсандық болжамдарын бірден 5 долларға қысқартты. Brent бағасы үшін үшінші және төртінші тоқсандарға жаңа болжам — барреліне 62,5 доллар.
Неліктен болжамдар өзгерді
Bloomberg жазғандай, ОПЕК+ тобына мүше сегіз ел 1 маусымнан бастап мұнай өндіруді тәулігіне 411 мың баррельге арттыратынын мәлімдеген соң, сарапшылар сұраныс пен ұсыныс тепе-теңдігінің бұзылуы мүмкін екенін айтып, бағаларды қайта есептеп жатыр. Бұл үш айлық өсімге тең көрсеткіш екенін The Wall Street Journal атап өтті.
Сарапшылар не дейді
— Goldman Sachs: «Бұл шешім әлемдік қор деңгейінің төмендігін және ОПЕК+ ішінде бірлікті сақтап қалуға, АҚШ-тың тақтатас мұнай өндірісін тежеуге бағытталған ұзақмерзімді стратегияны білдіреді». Олар шілдеде де өндіру көлемі тағы 411 мың баррельге өседі деп болжайды.
— Morgan Stanley: «Біз ОПЕК+ мәлімдемесін өндіру квоталарынан толық бас тартуға жақындаған белгі ретінде қабылдаймыз».
— Barclays: Шешім ОПЕК+ ішіндегі ішкі артық өндіру мәселесінен гөрі, жаһандық іргелі көрсеткіштерге және сыртқы факторларға байланысты. Олар ОПЕК+ елдері қосымша қысқартуларды 2025 жылдың қазанына дейін кезең-кезеңімен жояды деп күтуде.
«Қазір бізді негізгі қауіп — өндірістің артуы және рецессия қаупі. ОПЕК+ бұрын енгізген қысқартулар (тәулігіне 2,2 млн баррель) жойылса, Brent бағасы 2026 жылдың соңына қарай 47–49 долларға, WTI — 44–46 долларға дейін түсуі мүмкін. Экономикалық баяулау жағдайында Brent шамамен 40 долларға, ал WTI — 37–39 долларға дейін құлдырауы мүмкін».
Нарықтағы жағдай
— Brent шілде фьючерстері 1,1%-ға төмендеп, барреліне 60,6 долларды құрады.
— Нью-Йорктегі WTI бағасы 1,4%-ға түсіп, 57,4 доллар болды.
— Exxon Mobil акциясы 1,3%-ға, Chevron — 1%-ға, Shell — 1,5%-ға арзандады. BP акциялары 2,7%-ға өсті.
Контекст
Bloomberg-тің мәліметінше Сауд Арабиясы өндіруді арттыру арқылы квоталарды жиі бұзатын Ирак пен Қазақстан сынды елдерді тәртіпке келтірмек. Сонымен қатар, АҚШ-тың тақтатас өндірісінің өсуін тежеу де ықтимал себептердің бірі. Жыл басынан бері Дональд Трамптың агрессивті сауда саясаты да нарыққа қысым жасап жатыр. ОПЕК+ кенеттен біртіндеп қалпына келтіру жоспарынан бас тартып, бірден көп көлемде мұнай өндіруге көшкен соң, эталондық маркалар соңғы төрт жылдағы ең төмен деңгейге дейін құлдырады. WSJ атап өткендей, трейдерлер ұсыныстың артық болып кетуінен, ал сауда шиеленістерінің жаһандық экономикалық өсімді баяулататынынан қауіптеніп отыр.
