ФРЖ мөлшерлемені үшінші рет өзгертпеді. Тәуекелдерге назар аударуға шақырды
АҚШ-тың Федералдық резерв жүйесі жыл басынан бері қатарынан үшінші рет пайыздық мөлшерлемені бұрынғы деңгейде қалдырды, бірақ инфляцияның үдеуі мүмкін деген тәуекелдерге назар аударды. Трейдерлер мен экономистер ФРЖ мөлшерлемені өзгертеді деп күтпеген, себебі реттеуші Дональд Трамптың сауда саясатына қатысты айқындық пайда болғанша күтуді жөн көріп отыр.
Егжей-тегжейлі
АҚШ ФРЖ-нің ашық нарықтар жөніндегі федералдық комитеті (FOMC) 7 мамырда негізгі пайыздық мөлшерлемені 4,25–4,5% аралығында сақтау туралы шешім қабылдады, деп көрсетілген реттеуші сайтындағы хабарламада. ФРЖ экономикалық перспективаға қатысты белгісіздік бұрынғыдан да арта түскенін атап өтті.
«Комитет өзінің қос мандатына байланысты екі бағыттағы тәуекелдерге де мұқият қарайды және жоғары жұмыссыздық деңгейі мен инфляцияның үдеуі қаупі артты деп санайды», — делінген ФРЖ мәлімдемесінде.
Сарапшылар пікірі
ФРЖ-нің алдағы әрекеттеріне қатысты сарапшылар пікірі екіге бөлінген. TD Securities компаниясының АҚШ бойынша пайыздық мөлшерлеме стратегиясы жөніндегі жетекшісі Геннадий Голдбергтің пікірінше, реттеуші инфляциядан гөрі экономикалық өсімнің баяулауына көбірек алаңдап отыр, сондықтан алдағы 17–18 маусымда өтетін отырыста-ақ мөлшерлемені төмендетуді бастауы мүмкін. MarketWatch келтірген Голдбергтің болжамынша, ФРЖ мөлшерлемені біртіндеп төмендетіп, 2026 жылы 2,5%-ға дейін жеткізеді. «Бұл — күрт емес, біртіндеп жүзеге асатын төмендеу болады, өйткені Федрезерв инфляцияны қадағалауды жалғастырады», — дейді сарапшы.
Трейдерлер 29–30 шілдедегі отырыста мөлшерлемені төмендетеді деген үміт бар, сондай-ақ жыл соңына дейін тағы екі немесе үш рет төмендетіледі деп күтуде, деп хабарлайды Bloomberg. Ал агенттік сауалнамасына қатысқан экономистер биыл қыркүйектен бастап тек екі рет деп есептейді.
KPMG компаниясының бас экономисі Диана Свонктың пікірінше, пандемия кезіндегі баға өсімі мен 1970-жылдардағы инфляциялық шоктан алынған сабақтар АҚШ Федералдық резерв жүйесінің «ДНҚ-сында» сақталған, және дәл осы тәжірибе реттеушінің сауда тарифтерін енгізуге қалай әрекет ететінін айқындайды. ФРЖ төрағасы Джером Пауэлл соңғы уақытта тарифтерден туындайтын бағаның бір мезгілде өсуі тұрақты инфляциялық мәселеге айналмауы тиіс екенін бірнеше рет атап өткен, деп еске салады Bloomberg.
Айтарлықтай экономикалық шок аясында «тым асығыс әрекет етуге болмайды, әйтпесе бұл стагфляцияның одан да қауіпті кезеңін туындатуы мүмкін — ал дәл осы жағдай [ФРЖ] үшін ең жағымсызы, себебі инфляцияны қазіргі деңгейге дейін төмендету үшін қаншама күш жұмсалды», — деп атап өтті Диана Свонк.
Наурыз айында АҚШ-тағы жеке тұтыну шығындарының индексі (PCE), оны ФРЖ мұқият бақылап отырады, жылдық есептеуде 2,3%-ға дейін баяулады — бұл шамамен соңғы жарты жылдағы ең төменгі көрсеткіш. Осы жағдай Дональд Трамптың ФРЖ-ны пайыздық мөлшерлемені төмендетуге шақыруына түрткі болды, деп хабарлайды Reuters. Алайда агенттік PCE индексінің баяулауы жалпы жағдайды толық көрсетпейтінін атап өтеді. Себебі тағам мен энергия секілді құбылмалы баға компоненттері есепке алынбайтын базалық инфляция 2,8%-ға артқан.
Трамп ойлағандай тез әрекет болмауы мүмкін, деп хабарлайды CNBC. «ФРЖ-нің қос мандатын [жұмысбастылық пен инфляцияны бақылау] ескере отырып, біз үшін ең орынды қадам — ақша-кредит саясатын жұмсартуды кейінге қалдыру, инфляциялық тәуекелдерге басымдық беру және өз саясатына деген сенімді сақтау. Мұндай ұстаным экономикалық белсенділік күрт әлсіреген жағдайда ғана қайта қаралуы мүмкін», — деген пікір білдірді Bank of America экономисі Клаудио Иригоен (CNBC дерегінше).
