Билл Экман Universal Music кеңесінен шықты, компания акциялары бірден құлдырап кетті
Миллиардер әрі Pershing Square хедж-қорының негізін қалаушы Билл Экман Тейлор Свифт пен Леди Гага сынды әртістермен жұмыс істейтін әлемдегі ең ірі музыкалық лейбл – Universal Music Group-тың директорлар кеңесінен шықты. Universal – Экман қорының портфеліндегі ең ірі инвестиция болып қала беруде, дегенмен наурызда Pershing компаниядағы үлесін азайтқан. Акционер-активист ретінде Экман UMG акцияларының Амстердамдағы листингінен бас тартып, оларды АҚШ-та орналастыруды талап еткен. 14 мамырда Universal акциялары бір апта ішіндегі ең төменгі деңгейге дейін төмендеді.
Егжей-тегжейлі
Universal Music Group 14 мамыр сәрсенбіде тәуелсіз директор Билл Экман директорлар кеңесінен сол күннен бастап шығатыны туралы хабарлағанын мәлімдеді. Ол бұл шешімін соңғы инвестицияларына байланысты жаңа басқарушылық міндеттермен түсіндірді.
Экманның Pershing Square қоры мұның себебі – жүктеменің артуы, соның ішінде миллиардердің Howard Hughes Holdings атты шағын девелопер компаниясының директорлар кеңесіне атқарушы төраға болып тағайындалуымен байланысты екенін нақтылады. Мамыр айының басында хедж-қор бұл компаниядағы үлесін 47%-ға дейін арттырған. Экман бұл фирманы Уоррен Баффеттің проблемалық тоқыма кәсіпорнын Berkshire Hathaway-ге айналдырғандай ірі инвестициялық қорға айналдыруды жоспарлап отыр.
«Соңғы үш жылда мен UMG директорлар кеңесінің мүшесі ретінде жекеменшік компаниядан табысты жария компанияға айналу процесін үлкен құрметпен өткердім, – делінген Pershing таратқан Экман мәлімдемесінде. – Люсиан Грейндж бастаған және бүкіл UMG командасы басқарған компания болашақ өсім мен табысқа жақсы дайындалған».
Контекст
Миллиардер Universal Music акцияларын қазіргі айналымда жүрген Амстердам емес, америкалық биржада орналастыруды ұзақ уақыт бойы жақтаған. Экман бұл қадам компания үшін өте тиімді болатынын, өйткені ол сұраныс пен акция құнын арттыратынын айтқан. Бірақ ол тек 500 млн доллар көлеміндегі АҚШ-тағы қосымша листингке компанияның келісімін ала алды. Бұл мәміленің шарттарының бірі – Pershing музыкалық лейблдегі үлесін дәл сондай сомаға қысқарту керек болатын.
Наурызда Экман Pershing Universal-дың айналымдағы жалпы акцияларының шамамен 2,7%-ын сатып, 1,3 млрд еуродан астам пайда тапқанын хабарлаған (Bloomberg). Соған қарамастан, UMG қор портфеліндегі ең ірі позиция болып қала берген – 17% салмақпен (бұрынғы 27%-ға қарсы), деп жазды Экман сол кезде X әлеуметтік желісінде. Нидерланд қаржы нарығын қадағалау басқармасының дерегінше 13 наурыздағы жағдай бойынша қордың Universal Music-тағы үлесі 4,74% болған. Pershing үлесін қысқартатыны туралы хабар шыққан соң, музыкалық компания акциялары шамамен 9%-ға құлдырады.
Акциялар жағдайы
14 мамырда Амстердамдағы сауда кезінде Universal акциялары 4%-ға дейін төмендеп, €26,3 деңгейіне жетті. Бұл – соңғы бір аптадағы ең төменгі баға. Жыл басынан бері UMG қағаздары 7%-ға қымбаттаса, соңғы 12 айда шамамен 6,5%-ға арзандаған.
MarketScreener дерегінше бұл акциялардың динамикасын қадағалайтын 18 сарапшының 10-ы оларды сатып алуға кеңес береді. Алтауы портфельде ұстауды ұсынса, екеуі сатуға кеңес берген.
