Мұнай бағасы Иранның жаңа ядролық келісімге дайын екенін мәлімдеуінен кейін төмендеді
Мұнайдың әлемдік бағасы Иран басшылығының АҚШ-пен жаңа ядролық келісімге қол қоюға дайын екенін мәлімдеген соң төмендеді. Фьючерстік келісімшарттардың сатылуына қосымша себеп — АҚШ-та мұнай қорының күтпеген жерден өсуі, бұл нарықта артық ұсыныс болуы мүмкін деген инвесторлардың алаңдаушылығын күшейтті.
Егжей-тегжейлі
WTI солтүстік америкалық мұнайының фьючерстері 15 мамырда бір сәтте 3%-ға арзандап, олардың бағасы барреліне $62 деңгейінен төмен түсті. Brent эталондық маркалы мұнайына арналған келісімшарттар да 2,7%-ға құлдырап, $65 деңгейінен төмендеді.
Иран АҚШ-пен экономикалық санкцияларды алып тастау шартымен ядролық келісімге баруға дайын — бұл туралы 14 мамырда NBC телеарнасына берген сұхбатында Иранның Жоғарғы көшбасшысы Али Хаменейдің кеңесшісі Али Шамхани айтты. Оның айтуынша Иран ядролық қару жасамайтынына уәде беруге, байытылған уран қорларынан арылуға және оны тек бейбіт мақсатта қолдануға қажетті төмен деңгейге дейін ғана байытуға дайын. Бұл үдерістер халықаралық инспекторлардың бақылауында жүзеге аспақ. ОПЕК-тің негізгі ойыншысы Сауд Арабиясы бұл келісімді қолдайтынын сол күні корольдіктің Сыртқы істер министрі Фейсал ибн Фархан Әл Сауд мәлімдеді.
АҚШ та дәл 14 мамыр күні Иранға қарсы жаңа санкциялар — бұл жолы баллистикалық зымырандарға арналған бөлшектер өндірісі үшін енгізді. Бұған дейін, 13 мамырда, Иран мұнайын Қытайға жеткізумен байланысты делінген 20 компанияға қарсы шаралар жарияланған еді. Sanкциялар Вашингтон мен Тегеран арасындағы Омандағы кезекті келіссөздерден кейін енгізілді — Reuters агенттігінің хабарлауынша бұл келіссөздер Иранның ядролық бағдарламасына қатысты келіспеушіліктерді шешуге бағытталған болатын.
Сарапшылардың пікірі
«Жаңа сатылымдар [шикі мұнай фьючерстері] АҚШ пен Иран арасындағы ядролық келісім жақында америкалық санкциялардың жұмсаруына әкеліп, [мұнай нарығындағы] ұсыныс пен сұраныс арасындағы тепе-теңдікті әлсіретеді (яғни, ұсыныс сұраныстан асып кетуі мүмкін. — Oninvest) деген күтулермен байланысты», — деп санайды Nomura Securities экономисі Юки Такашима.
Контекст
АҚШ-тағы коммерциялық мұнай қоры өткен аптада күтпеген жерден 3,5 млн баррельге өсті, деп хабарлады елдің энергетика министрлігі 14 мамырда. Ал сарапшылар керісінше, 1 млн баррельге төмендейді деп болжаған.
ОПЕК биыл АҚШ пен басқа да ОПЕК+-ке кірмейтін елдердегі мұнай өндіру өсімі бойынша болжамын 900 мыңнан 800 мың баррельге дейін қысқартты. Сонымен қатар, мұнай картелінің өндіру көлемін арттыруға қатысты жоспарлары мұнай бағасына қысым көрсетуді жалғастыруда, деп жазады Trading Economics.
