АҚШ шектеулері туралы жаңалық Қытай биотехнология компанияларының акцияларын құлатты
Қытайдағы фармацевтикалық компаниялардың акциялары бейсенбі күнгі саудада күрт арзандап, соңғы бес айдағы ең ірі құлдырауға ұшырады. Бұған The New York Times газетінің АҚШ президенті Дональд Трамп әкімшілігі Қытайдан келетін дәрі-дәрмектерге қатаң шектеулер енгізуді қарастырып жатқаны туралы хабарламасы себеп болды.
Дегенмен, нарық кейінірек бұл жоғалтулардың бір бөлігін қалпына келтірді. Сарапшылар бұл жағдайды қысқа мерзімді реакция деп бағалап отыр және ол көбіне инвесторлардың пайдасын тіркеу әрекеттерімен байланысты.
Егжей-тегжейлі
11 қыркүйек күні сауда барысында Гонконг қор биржасындағы биотехнологиялық компаниялар акцияларының жағдайын көрсететін Hang Seng Biotech индексі бір сәтте 8,6%-ға дейін төмендеді. Bloomberg агенттігінің мәліметінше бұл — соңғы бес ай ішіндегі ең ірі төмендеу болды.
Алайда сауда сессиясының соңына қарай кейбір жоғалтулар орнын толтырды. Сауда жабылғанда индекс алдыңғы күнмен салыстырғанда 3,4%-ға төмен болып қалды.
Hansoh Pharmaceutical компаниясының акциялары сауда ашылған сәтте бірден 18%-ға төмендеді — бұл осы компания үшін тарихи ең ірі құлдырау. Sichuan Kelun-Biotech Biopharmaceutical компаниясының қағаздары 13%-ға арзандады. Қытайдың материктік бөлігіндегі Hangzhou Tigermed Consulting компаниясының акциялары да 13%-ға дейін төмендеді.
Осы компаниялардың барлығы сауда барысында біршама жоғалтуларын қалпына келтіріп, бүкіл сектор бойынша жағдай сәл тұрақталды.
Айта кету керек, 2025 жылдың басымен салыстырғанда Hang Seng Biotech индексі әлі де шамамен 100% өсім көрсетіп отыр, — деп жазады Bloomberg.
The New York Times газетінің хабарлауынша АҚШ әкімшілігі Қытайдан келетін эксперименттік дәрі-дәрмектердің импортына қатаң шектеу енгізу туралы президент жарлығының жобасын дайындап жатыр. Бұл құжат жүзеге асатын болса, Қытайдан АҚШ-қа келетін миллиардтаған долларлық фармацевтикалық өнімдер ағыны тоқтауы мүмкін.
Газеттің мәліметінше соңғы жылдары ірі батыстық фармацевтикалық компаниялар Қытайда жасалған, обыр, семіздік, жүрек-қантамыр аурулары және басқа да дерттерді емдеуге арналған инновациялық дәрілердің құқықтарын белсенді түрде сатып алып келеді. Бұл арада олар көбіне осыған ұқсас препараттарды ұсынатын америкалық стартаптарды назардан тыс қалдырған.
Jefferies компаниясының сарапшысы Цуй Цуй Bloomberg агенттігіне берген түсініктемесінде, бұл ақпараттың аясында Қытай биотехнология компанияларының шетелге өз өнімдерін лицензиялау мүмкіндігіне елеулі әсер етуі екіталай екенін айтты. Оның айтуынша қысқамерзімді нарықтық құбылмалылық көбіне инвесторлардың табысты бекіту әрекеттерінен туындап отыр.
2025 жылы Қытайдың биотехнологиялық секторы жаһандық фармацевтикалық инновациялардың жаңа орталығына айнала бастады, деп жазады Bloomberg. Бұл жағдай сектордағы акциялардың айтарлықтай қымбаттауына ықпал етті.
Exome Asset Management сарапшысы Ици Лю: «Саяси шешімдер нарықта қысқа мерзімді тұрақсыздық тудыруы мүмкін, алайда олар Қытайдың инновациялық дәрі-дәрмек өндірісінің ұзақ мерзімді құндылығына айтарлықтай әсер ете алмайды», дейді.
Контекст
Қазіргі уақытта батыс фармацевтикалық алыптар Қытай биотехнологиялық компанияларымен жаңа емдеу тәсілдерін дамыту бойынша келісімшарттар жасасуды жиілетіп келеді. Bloomberg Қытайлық PharmCube платформасының деректеріне сілтеме жасай отырып, 2025 жылдың алғашқы жартысында Қытай компанияларымен жасалған келісімдердің жалпы сомасы шамамен 60 миллиард долларды құрағанын хабарлайды. Бұл — 2024 жылдың жылдық көрсеткішінен 16% артық.
