АҚШ-та $80 млрд-қа ядролық реакторлар салынбақ. Бұдан қай акциялар ұтады?
28 қазандағы саудада бірнеше ядролық компанияның акциясы күрт қымбаттады. Бұған себеп, АҚШ Сауда министрлігінің кемі $80 млрд-қа ядролық реакторлар салынуға қол қойған келісімі.
Cameco акциясы 23,4% өсіп, жаңа рекорд орнатты, ал оның нарықтық құны шамамен 9% артты. Сейсенбі күнгі раллидің арқасында акциялар 2025 жылдың басымен салыстырғанда қазір 108% плюсте. Cameco — уран, ядролық отын компоненттері мен тиісті қызметтерді жеткізетін әлемдегі ең ірі компаниялардың бірі. Сонымен қатар, Cameco АҚШ Сауда министрлігімен жасалған келісімнің қатысушысы: компания Brookfield Asset Management-пен бірге Westinghouse компаниясына иелік етеді, оның ядролық реактор технологиялары сала дамуы үшін пайдаланылатын болады.
Seeking Alpha мәліметінше, сейсенбі күнгі саудада шарықтаған акциялардың қатарында Uranium Royalty 19%-дан астам қымбаттаған қағазы бар, ал уран өндіретін Uranium Energy акциясы 14,3% өсті. Сондай-ақ, уран кен орындарын игеретін NexGen Energy акциясы 12%, ал кен өндіретін Denison Mines акциясы шамамен 10% өсті. Шағын модульдік реакторлар өндіретін NuScale Power акциясы 9% күрт өсті; уран операторы Ur-Energy қағазы — 7%, ал уран отынын жеткізетін Energy Fuels акциясы — 5%-ға жуық өсті. Бұған қоса, Nano Nuclear Energy стартапы, уран байытушы Centrus Energy және ядролық реактор технологияларын әзірлейтін Lightbridge акциясы 1%-дан астам қымбаттады.
Ал Oklo атомдық стартапының акциялары керісінше, күнді 3,8% төмендеумен аяқтады.
Ралли не түрткі болды?
АҚШ Сауда министрлігі Westinghouse Electric Co. компаниясының жаңа ядролық реакторларын салу жөнінде жалпы құны кемі $80 млрд болатын келісімге келді, деп Cameco хабарлады 28 қазанда. Компания мәліметінше, жоба ел бойынша ондаған мың жұмыс орнын құрып, Ақ үйдің ядролық энергетиканы дамыту жоспарын жүзеге асыруға көмектеседі. «Бұл бағдарлама АҚШ-тың ядролық энергетикадағы әлемдік көшбасшылардың бірі ретіндегі мәртебесін нығайтып, Westinghouse технологияларының бүкіл әлемге экспортын күшейтеді», — делінген мәлімдемеде.
Келісімге сәйкес, АҚШ реакторлар салуға қаржыландыру ұйымдастыруға және рұқсат беру процесін жеңілдетуге міндеттенді, алайда егжей-тегжейлі ақпарат әзірге жарияланған жоқ. Cameco өкілі Barron’s басылымына берген түсініктемесінде: «Көптеген мәліметтер әлі нақтылануы керек», — деді. Құжатта жобаларда Westinghouse компаниясының AP1000 сериясындағы реакторлары қолданылатыны және белгілі бір көрсеткіштерге жеткеннен кейін пайдасы барлық қатысушылар арасында, соның ішінде АҚШ үкіметімен де, бөлінетіні жазылған.
Келісім жасанды интеллект жұмысын қамтамасыз ететін дата-орталықтарынан туындап отырған электр энергиясына деген қарқынды өсіп келе жатқан сұранысты қанағаттандыруға бағытталған. Bloomberg дерегінше, ЖИ-саласындағы бум аясында АҚШ-тағы дата-орталықтарының энергия тұтынуы 2035 жылға қарай екі еселеніп, жалпы сұраныстың шамамен 9%-ына жетеді.
«Біздің әкімшілік алдыңғы қатарлы ядролық технологиялардың жылдам дамуы мен енгізілуін қамтамасыз етуге баса назар аударып отыр. Бұл тарихи серіктестік ұлттық қауіпсіздікті нығайтып, елдің маңызды инфрақұрылымын жақсартады», — деді сауда министрі Говард Латник Bloomberg агенттігіне.
