АҚШ-та жұмыс орындары үш жылда алғаш рет қатты қысқарды. ФРЖ не істемек?
АҚШ-та жекеменшік жұмыс берушілер қарашада жұмыс орындарын қысқартуды күрт жеделдетті, делінген жалақы статистикасын өңдеп, еңбек нарығы жөнінде есептер жариялайтын ADP компаниясының дерегінде. Соның нәтижесінде жұмыс орындарының саны 2023 жылдың басынан бергі ең қатты төмендеуді көрсетті, деп жазды Bloomberg. Бұл еңбек нарығының баяулауына қатысты алаңдаушылықты күшейтті және Уолл-стрит үшін күтпеген жағдай болды, деп атап өтті Investing.com.
Есепке сәйкес, америкалық компаниялар өткен айда 32 мың жұмыс орнын қысқартқан. Bloomberg сұхбат алған экономистердің медиан болжамы 10 мың жұмыс орнының артуын күткен. Ал қазанда ADP жұмысқа қабылдау 42 мыңға өсті деп хабарлаған еді.
Бұл неге маңызды?
ADP есептері АҚШ үкіметінің жұмысы тоқтап қалғандықтан ұзақ уақыт жарияланбай келген, бүкіл экономиканы қамтитын ресми деректердің тапшылығын толықтырады. Шатдаун аяқталғанымен, ресми статистика әлі шыққан жоқ және ол келесі аптада өтетін ФРЖ отырысына дейін жарияланбайды.
«Еңбек статистикасы бюросының келесі жұмыспен қамту есебі 16 желтоқсанға, ал тұтыну бағаларының индексі 18 желтоқсанға жоспарланғандықтан, 10 желтоқсандағы мөлшерлемені төмендетуге кедергі келтіретін маңызды оқиғалар күнтізбеде аз», — деп жазды Goldman Sachs бас экономисі Ян Хатциус жексенбіде клиенттерге жолдаған жазбасында, деп келтірді CNBC.
«Негізгі мәні айқын: АҚШ-та жұмыс орындарының құрылуы тағы да стагнация сигналын берді, — деді Bloomberg-ке Lombard Odier Asset Management өкілі Флориан Иелпо. — Алайда (...) қазіргі негізгі сұрақ — Федрезерв осындай әртүрлі пікірдегі дауыс берушілер құрамын ескере отырып, бұл деректермен қандай қадамға барады? Дүйсенбіде жарияланған ISM өнеркәсіп белсенділігі индексі мен бүгінгі ADP есебі тура “Мөлшерлемені төмендетіңдер!” деп тұр, және нарықтар мұны қабылдауы әбден мүмкін».
Нарық қалай қабылдады?
ADP деректері жарияланғаннан кейін АҚШ негізгі қор индекстеріне арналған фьючерстер аздап өсе түсті, бірақ көп ұзамай кері бұрылды. Сессия ашылардан 15 минут бұрын S&P 500 фьючерстері 0,1%-дан төмен өсім көрсетсе, Nasdaq Composite бойынша биржалық келісім шарттар 0,2% арзандады. Мемлекеттік облигациялар кірістілігі төмендеді. Жаңа деректер ФРЖ-ның ақша-несие саясатын жұмсарту жалғасады деген сенімді айтарлықтай өзгерткен жоқ, деп жазды Bloomberg.
ADP есебіне дейін келесі отырыста мөлшерлеме төмендейді деген ықтималдық трейдерлер көңіл-күйін өлшейтін FedWatch құралы бойынша 89%-дан жоғары болған. Релизден кейін бұл күтулер сәл әлсіреді. Goldman Sachs болшамынша, Федрезерв желтоқсанда мөлшерлемені төмендетіп, келесі жылы тағы екі рет 0,25 пайыздық пунктке қысқартады.
