АҚШ-тағы ірі банктің акциясы сәуірден бері қатты құлады. Оның шығыны өседі
JPMorgan акциясы 9 желтоқсандағы саудада 4,7% құлап, $300,5-ға дейін түсті — бұл 4 сәуірден бергі ең ірі біркүндік төмендеу. Yahoo Finance дерегінше, бұл Dow Jones Industrial Average құрамындағы компаниялар арасындағы ең ірі төмендеу болды.
Goldman Sachs конференциясында Марианн Лейк 2026 жылы банк шығыны $105 млрд-қа жететінін айтып еді — инвесторлар бірден АҚШ-тың ең ірі банкінің акциясын жаппай сата бастады. Бұл көрсеткіш Bloomberg сарапшыларының ең пессимистік болжамынан да жоғары. Консенсус — $101,1 млрд деп күтілсе, жаңа болжам одан 9% жоғары.
2025 жылғы банк шығыны $95,9 млрд болады деп үшінші тоқсандағы есепте айтылған еді. Алғашқы тоғыз айда шығыны 2024 жылдың сәйкес кезеңімен салыстырғанда 4% өскен.
Лейктің айтуынша, JPMorgan шығынын көбейтуге негізінен «бизнес көлемі мен операцияларды кеңейтулер» себеп. Бұған, мысалы, қызметкерлерге төлем мен өнім желісінің маркетингі кіреді. Одан кейін стратегиялық инвестициялар тұр — физикалық бөлімшелер желісін дамыту және жасанды интеллектке салынатын қаражат. Лейк инфляцияның «құрылымдық әсерлерін» де атап өтті. Оның айтуынша, шығынның негізгі драйвері — оның өзі басқаратын бөлшек клиенттер мен шағын бизнеске қызмет көрсету бөлімі (Consumer & Community Banking).
Wells Fargo сарапшысы Майк Мэйо сейсенбіде жазғандай, инвестициялардың артуы АҚШ-тың ең ірі банкіне бәсекелік артықшылықтарын күшейтуге көмектесе алады. Алайда, бұл бүкіл салаға теріс фактор болуы мүмкін екенін ескертті. «Басқа банктер де нарықтағы үлесін сақтап қалу үшін шығындарын арттыруға мәжбүр болуы мүмкін, себебі бұл үрдіс тізбекті әсер береді», — деді ол.
Контекст
Уолл-стрит күтпеген шығындар туралы хабарлама инвесторларға 2022 жылдың қаңтарындағы жағдайды еске салды, деді Bloomberg. Сол кезде JPMorgan шығындарды шамамен $6 млрд-қа арттырмақ болған: қаражат технологияларға инвестициялауға, қызметкерлерді жалдауға және өтемақыларды көбейтуге бағытталуы тиіс еді. Нарық бұл шығындарды шамадан тыс деп қабылдап, маржаға қысым күшейген шақта алаңдаушылық артты. Соның салдарынан банктің акциясы бір күнде 6%-дан астам құлап, пандемия басталғалы бергі ең ірі төмендеуді тіркеді. Нарықтың осындай қатты реакциясынан кейін бас директор Джейми Даймон ақпанда шығындар стратегиясын түсіндіру үшін инвесторлар күнін жариялауға мәжбүр болды, ал іс-шара өткенге дейін акция қысымда қала берді.
JPMorgan тағы не хабарлады?
2025 жылдың соңғы тоқсанында JPMorgan-ның инвестициялық-банк қызметтерінен түсетін комиссиялары жылдық мәнде «бір таңбалы аз өсім» көрсетеді, деді Лейк. Bloomberg дерегінше, сарапшылар 6,3% өсім күтті. Трейдингтен түсетін табыс «екі таңбалы аз өсім» көрсетуі мүмкін, бұл консенсустан жоғары. Биылғы жылдың алғашқы тоғыз айында мәмілелер мен акцияны орналастырудың жандануына байланысты инвестициялық банкинг JPMorgan-ға 11% артық табыс әкелді, ал трейдинг кірістері 20% өсті.
