АҚШ-тың қор индекстері құлады, ал Nasdaq 100 сәуірден бергі ең нашар аптасына таяу
7 қараша, жұма күнгі сауда кезінде америкалық акциялардың жапай сатылымы жалғасты. Технологиялық сектордағы әлсіздік сақталып, АҚШ-тың негізгі қор индекстері төмендеді, деп хабарлады CNBC. S&P 500 индексі 1% жоғалтты, Nasdaq Composite 1,7% құлдырады, ал Dow Jones Industrial Average 0,7% азайды. Nasdaq 100 индексі 1,6% минусқа кетті және сәуір айының басынан бергі ең үлкен апталық төмендеуді тіркеуге таяу.
Nvidia акциясы 4,3% құлдырады және аптаны шамамен 10%-дық төмендеумен аяқтауы мүмкін. Oracle котировкасы 4,5% құлады. Сондай-ақ, Palantir, Broadcom, AMD және басқа да ЖИ-компаниялардың қағазы құлдырады.
CNBC хабарлауынша, жасанды интеллект саласының көшбасшылары импульсін жоғалтып жатыр. Бейсенбі күні Nvidia, AMD, Tesla және Microsoft акциясы айтарлықтай арзандап, бұл бүкіл нарыққа қысым түсірді. Төмендеуді 6 қарашада жарияланған жұмыссыздықтың өсуі туралы деректер күшейтті — қазанда көрсеткіш соңғы 20 жылдан астам уақыттағы максимумға жетті. Ал жұма күні Мичиган университеті тұтынушылық көңіл-күй тарихтағы минималды деңгейлерге жақындағанын хабарлады, оған үкімет жұмысының уақытша тоқтатылу қаупі де әсер етті.
Сарапшылар пікірі
Goldman Sachs өкілі Тони Пасквариеллоның айтуынша, бірнеше айлық өсімнен кейін байқала бастаған әлсіздік белгілерін трейдерлер мұқият бақылап отыр, бірақ нарық жалпы алғанда әрі қарайғы көтерілуге дайын көрінеді, деп жазды Bloomberg. Сарапшының пікірінше, нарық қатысушылары қазір көптеген сұрақтар қойып, негізгі тақырыптар бойынша белсенді пікірталас жүргізуде, бірақ мұндай шиеленісті жағдайды теріс құбылыс деп атауға болмайды. «Мен тәуекел мен табыстың арақатынасы қазір ерекше тартымды немесе бұл позицияларды арттырудың ең қолайлы сәті деп айтпаймын. Алайда алға қарасақ, тәуекел теңгерімі әлі де “бұқалардың” пайдасына қарай бейім болып тұр», — деді Пасквариелло.
«Жыл соңындағы раллиге әлі де үміт бар — үкімет жұмысының тоқтатылуы аяқталып, кедендік баждарға қатысты жағдай айқындалғанда», — деді CNBC арнасына Navellier & Associates компаниясының негізін қалаушы Луи Навелье. Ол Сенаттағы бюджет келіссөздеріндегі ілгерілеуді және АҚШ Жоғарғы сотында басталған тыңдауларды меңзеді, бұл тыңдаулар Дональд Трамп енгізген сауда шектеулерін жоюы мүмкін. «Nvidia-ның маңызды есебіне дейін әлі екі апта бар, ал оның мықты нәтижелері ЖИ-нарығы үшін катализатор бола алады, — деді Навелье. — Егер бұдан кейін желтоқсанда ФРЖ мөлшерлемені төмендетсе, жылды өсіммен аяқтауымыз әбден мүмкін». Ол мұндай үлкен өсімнен кейінгі түзетуді дүрбелеңге себеп емес, керісінше қалыпты және күтілетін жағдай деп атады.
