Ақша нарығы өсуде: Сауда соғысына қарамастан, акциялар ақпандағы рекордты жаңартты
АҚШ акциялары 27 маусым күнгі сауда қорытындысы бойынша рекордтық жоғары деңгейде жабылды. S&P 500 және Nasdaq Composite индекстері ақпаннан бері алғаш рет тарихи максимумдарды жаңартты. Жұма күнгі сауда барысында S&P 500 индексі барлық уақыттағы рекордтық деңгейге дейін көтерілді және сессияны сенімді түрде аяқтауға жақын еді. Бірақ Дональд Трамптың мәлімдемесі тосыннан соққы болды. Ол Канадамен арадағы сауда келіссөздерін дереу тоқтататынын жариялады. Осыдан кейін АҚШ акциялары бір күндік өсімін жоғалтып, уақытша теріс аймаққа өткен. Дегенмен, нарық тез қалыпқа келіп, қайтадан өсім көрсетті.
Егжей-тегжейі
— S&P 500 индексі 27 маусымда 0,5 пайызға өсіп, 6173,07 пунктпен жабылды. Бұл — оның тарихи ең жоғарғы көрсеткіші. Сауда барысында индекс 0,76 пайызға көтеріліп, 6187,68 пунктке жеткен.
— Nasdaq Composite индексі де 0,5 пайызға өсіп, жаңа тарихи рекорд орнатты — 20273,46 пункт. Өсімге технологиялық алыптар үлес қосты: Nvidia компаниясының нарықтық құны 4 триллион долларға жақындаса, Alphabet акциялары шамамен 3 пайызға қымбаттады.
— Dow Jones Industrial Average индексі 1 пайызға өсіп, 43819,27 пунктке жетті.
— Кішігірім компаниялар индексі Russell 2000 0,02 пайыз өсіп, 2172,53 пунктпен жабылды.
Кедендік баждар күн тәртібіне қайта оралды
Жұма күнгі сауда барысында S&P 500 индексі 6187,7 пунктке дейін өсіп, барлық уақыттағы рекордты жаңартты. Алайда АҚШ президенті Дональд Трамптың Truth Social желісіндегі мәлімдемесінен кейін күн соңына қарай төмендеді. Трамптың айтуынша, Канада АҚШ технологиялық компанияларына цифрлық салық енгізу туралы шешім қабылдаған. Соған байланысты ол барлық сауда келіссөздерін тоқтатқанын хабарлады.
«Бұл өрескел салыққа байланысты біз Канадамен барлық сауда келіссөздерін дереу тоқтатамыз», — деді ол. «Алдағы жеті күн ішінде Канадаға АҚШ-пен бизнес жүргізгені үшін төлейтін баж көлемі туралы хабарланатын болады».
Трамптың мәлімдемесінен кейін S&P 500 күндік өсімін жоғалтып, сәл теріске кеткен. Бірақ инвесторлар үрейге берілмей, нарық тез арада қайта қалпына келді. CNBC атап өткендей, жұма күнгі ауытқулар Уолл-стриттің жаһандық сауда ландшафындағы өзгерістерге бейімделу әрекетінің кезекті көрінісі болды.
Сарапшылар не дейді?
S&P 500 индексі сәуір айындағы ең төменгі деңгейден бері 20 пайыздан астам өсті. Ол кезде Уолл-стриттің кедендік баждарға қатысты алаңдаушылығы шарықтау шегінде еді. Сонымен қатар жыл басынан бері индекс 4 пайыздан астам көтерілді. Осы кезеңде Израиль мен Иран арасындағы қақтығыс салдарынан мұнай бағасының күрт өсуіне және бюджет тапшылығы төңірегіндегі алаңдаушылық аясында облигациялар кірістілігінің артуына қарамастан, инвесторлар акция сатып алуды жалғастырды.
«Америкалық акциялар наурыз-сәуір айларындағы тарифтік күйзелістен кейін болған құлдырауды қалпына келтіріп жатыр. Біздің ойымызша, мұндай қалпына келу орынды. Себебі ірі капитализациялы компаниялардың көпшілігі енгізілген баждарды онша ауыртпалықсыз еңсере алады», – деп түсіндірді Bloomberg агенттігіне UBS инвестициялық бөлімшесінің сарапшысы Дэвид Лефковиц.
CNBC-нің жазуынша, нарықтың өсуіне жасанды интеллектпен байланысты компаниялардың акцияларына деген жаңа қызығушылық әсер етті. Солардың алдыңғы қатарында – Nvidia мен Microsoft. Жұма күні акциялардың қымбаттауына Трамптың мәлімдемесі де себеп болды. Ол АҚШ Қытай мен Ұлыбританияны қоса алғанда, «төрт немесе бес» елмен сауда келісіміне қол жеткізгенін айтты. Канадамен келіссөздердің тоқтауы күтпеген жаңалық болды.
«Саудаға қатысты жағымсыз тақырыптар нарық күн тәртібінде бірнеше ай бойы болмаған еді. Сондықтан бұл жолғы төмендеу кедендік келіссөздер қаншалықты болжауға келмейтін және көңіл-күйге тәуелді екенін еске салып тұрғандай», — деп пікір білдірді CNBC-ге Harris Financial Group басқарушы серіктесі Джейми Кокс.
«Мұндағы тәуекел қайда екенін түсінемін. Егер барлық сауда келіссөздері Ақ үйдің жай ғана PR әрекеті болып, шынайы келісімдер болмаса, онда нарық кері кетеді. Ақыр соңында бәрі қайтадан АҚШ экономикасының өсуі мен корпоративтік табысқа тіреледі», — дейді Macquarie Group компаниясының валюта және мөлшерлеме стратегиясы бойынша сарапшысы Тьерри Визман.
«Қолданыстағы өзара тарифтік келісім-шарттың мерзімі аяқталуға жақын. Егер ол ұзартылмаса немесе нақты келісім пайда болмаса, бізді сауда шиеленісінің жаңа толқыны күтіп тұр», — деп ескертті City Index және Forex.com сарапшысы Фавад Разакзада.
Нарық ары қарай да өсе ме?
Уолл-стриттегі кей сарапшылар америкалық нарық жылдың екінші жартысында да жоғары көтерілуі мүмкін деп санайды. Олардың қатарында BlackRock компаниясының жаһандық тұрақты табысты құралдар жөніндегі инвестициялық директоры Рик Ридер де бар. Ол сәрсенбі күні CNBC-ге берген сұхбатында жасанды интеллект революциясы инфляцияны төмендетуі мүмкін екенін және бұл нарыққа оң әсер ететінін айтты.
Carson Group компаниясының аға нарықтық стратегi Райан Детрик CNBC-ге шолуында соңғы он жылда шілде айы S&P 500 үшін ең табысты ай болғанын атап өтті. Соңғы 20 жылда да бұл ай ең үздік нәтиже көрсеткен. Сондай-ақ ол шілде президент сайлауынан кейінгі жылы акциялар үшін ең табысты ай болатынын қосты. Wolfe Research сарапшысы Роб Гинсбергтің пікірінше, S&P индексінің раллиі алдағы апталарда жалғасып, шілде соңында шарықтау шегіне жетуі мүмкін.
Сонымен қатар Bank of America аға нарықтық стратегi Майкл Хартнетт қазіргі уақытта «қомағай капитал ағынына» байланысты табысты бекіту уақыты келді деп есептейді, деп жазады CNBC.
Citigroup-тың жаңа инвестициялық директоры Кейт Мур Bloomberg-ке берген сұхбатында: «Шын айтсам, бұл раллиге байланысты уайымым бар. Инвесторлардың көңіл-күйіне әлі әсер етіп үлгермеген бірқатар ескерту белгілері бар. Неге екенін білмеймін, бірақ адамдар бұл белгілерді таяу болашақта елемей отыр», — деді.
