Алғаш рет биткоин партиясын сатып алған GameStop-тың акциялары құлдырады
Компания шығынға ұшыраған бизнесін жандандыру үшін биткоинға үміт артып отыр.
Видеойындар дүкендер желісі GameStop компаниясының акциялары алғашқы биткоин партиясын 500 млн доллардан астам сомаға сатып алғаны туралы хабардан кейін 12%-ға төмендеді. Бұл қадам GameStop-тың жаңа криптовалюта стратегиясының бір бөлігі. Компания биткоинды ең көп ұстайтын корпорация Strategy (бұрынғы MicroStrategy) жолымен жүріп келеді. 28 мамырдағы сауда кезінде биткоин бағасы да шамамен 3%-ға арзандады.
Егжей-тегжейі
28 мамырда GameStop акциялары 12%-дан астамға құлдырап, 30,7 долларға дейін төмендеді. Бұл үш күндік раллиден кейін болды, сол кезеңде компанияның нарықтық құны төрттен бірге жуық өскен еді, деп жазады MarketWatch. Алайда сәрсенбі күнгі құлдыраудан кейін GameStop акциялары жыл басынан бері 1,5%-ға төмендеген. Ал 2021 жылдың қаңтарындағы «мем-акция» ретінде танымал болған кезеңмен салыстырғанда, компания капитализациясы 60%-дан аса азайған.
GameStop компаниясының 4710 биткойн сатып алғаны жөніндегі хабардан кейін, инвесторлар оның акцияларын жаппай сата бастады. Мәміленің нақты құны жарияланбағанымен, бір биткоинның қазіргі бағасы 107,3 мың доллар екенін ескерсек, жалпы сома 500 миллион доллардан асады.
GameStop-қа биткоин не үшін керек?
Биткоин сатып алу — GameStop-тың жаңа стратегиясының бір бөлігі. Компанияның бас директоры Райан Коэн сатылымы құлдыраған және цифрлық платформалар мен стримингтен қатты бәсекеге ұшыраған офлайн ритейл бизнесін қайта жандандыруға тырысып жатыр. Биылғы жылы GameStop директорлар кеңесі инвестициялық саясатты жаңартып, резервтік актив ретінде биткоинды пайдалануға мүмкіндік беретін өзгерісті бірауыздан мақұлдаған.
GameStop — бұған дейін MicroStrategy деп аталған Strategy компаниясының ізімен жүріп келеді. Strategy — әлемдегі ең ірі корпоративті биткоин ұстаушы. Ол бастапқыда IT-компания болғанымен, кейіннен биткоинды белсенді түрде сатып ала бастаған және бүгінде оның акциялары криптовалютаға тіке инвестиция ретінде қарастырылады. Мысалы, 28 мамырда биткоин бағасы 2,7%-ға төмендеген кезде, Strategy акциялары да 3%-ға арзандады. Өткен аптада Moody’s агенттігі АҚШ-тың кредиттік рейтингін төмендеткен соң, биткоин тарихи максимумға жетіп, бір монетасы 112 мың долларға жуықтады. Бұл инвесторлардың балама активтерге деген қызығушылығын арттырды, деп хабарлайды CNBC. Strategy акциялары да өскен болатын.
GameStop алғашқы биткоин партиясын сатып алғанын жариялаған күннің ертеңінде Дональд Трамп негізін қалаған Truth Social әлеуметтік желісіне иелік ететін тағы бір шығынды компания — Trump Media да дәл осындай шешім қабылдағанын мәлімдеді. Бұл компания 2,5 млрд доллар тартып, биткоин қорын құруды жоспарлап отыр.
Сарапшылар не дейді?
MarketWatch дерегінше, GameStop акцияларын екі ғана сарапшы бақылап отыр, әрі екеуі де бұл бағалы қағаздарды сатуға кеңес береді (рейтингтері — «Underweight» және «Sell»). Уолл-стриттегі орташа болжам бойынша, бір акцияның әділ бағасы — 13,5 доллар, бұл қазіргі нарық бағасынан 60%-ға арзан.
