Алғаш рет сатылымға шыққан жаңа iPhone 17 Pro-дан сызаттар табылды
19 қыркүйекте iPhone 17, 17 Pro және Air сатылымға шыққан алғашқы күні кейбір сатып алушылар витринадағы үлгілерден сызаттарды байқады. Әсіресе көк түсті iPhone 17 Pro мен қара түсті жұқа iPhone Air-де ақаулар анықталды. Жаңа смартфондардың сатылымы Apple үшін маңызды болмақ, әсіресе Қытайда. Онда клиенттер сызаттар туралы алғашқылардың бірі болып мәлімдеді. Қазіргі уақытта компанияның нарық үлесі шамамен 12%-ға дейін түскен. Жұма күні Apple акциялары 3%-дан аса қымбаттады.
Егжей-тегжейі
Bloomberg хабарлауынша, жаңа iPhone үлгілеріндегі сызаттарға Гонконгтан бастап Лондон мен Нью-Йоркке дейінгі дүкендерде назар аударылған. Тіпті бірнеше сағат қана витринада тұрған қою көк түсті iPhone 17 Pro және Pro Max үлгілерінің корпустары сырылған болып шықты. Агенттік тілшілері мұндай ақауларды Гонконг, Шанхай және Лондон дүкендерінде байқаған.
Сондай-ақ қара түсті жұқа iPhone Air үлгісі де сызатқа бейім екені байқалды. Бұған қоса, iPhone Pro үлгілерінде MagSafe сымсыз қуаттағышы корпусқа дөңгелек із қалдыруы мүмкін. Қытайлық пайдаланушылар әлеуметтік желілерде бүлінген iPhone суреттерін жариялай бастады.
Bloomberg-тің сауалына Apple жауап берген жоқ. Нью-Йорктегі саудада компания акциялары жаңа iPhone сатылымы басталған күні бір сәтте 3,4%-ға қымбаттады. Алайда 2025 жылдың басымен салыстырғанда қазіргі бағасы 1,8%-ға арзан.
Apple корпустарындағы мәселе неде?
iPhone 17 сериясында Apple айтарлықтай дизайн өзгерісін енгізді. Енді iPhone 17 Pro алюминийден жасалған корпусқа және артқы панельде бұрын тек экрандарда қолданылған Ceramic Shield қорғаныш жабынына ие. Компания мұндай дизайн құрылғылардың беріктігін арттырады деп сендірген.
Алайда алюминий — титан мен тот баспайтын болатқа қарағанда жұмсақ әрі деформацияға бейім металл. Bloomberg атап өткендей, әсіресе қара түсті үлгілердегі ақаулар көбірек байқалады. iPhone 17 Pro үш түсте ұсынылды, олардың ішінде ең қоюы — көк. Дәстүрлі қара түс бұл жолы қолжетімді емес.
Бұл iPhone-мен байланысты алғашқы проблема емес. Бұған дейін пайдаланушылар iPhone 7-нің жылтыр қара жабыны тез сызылатынын, iPhone 6-ның жұқа корпусы оңай иілетінін, ал iPhone 4-тің антеннасы белгілі бір қалыпта ұсталғанда істемей қалатынын айтып шағымданған болатын.
Контекст
Сызаттарға қатысты алаңдаушылықтарға қарамастан, жалпы алғанда iPhone 17 сериясының таныстырылымы Apple үшін сәтті өтті. Компания смартфондарға үлкен үміт артып отыр, себебі қазір ЖИ саласында бәсекелестерден қалып барады.
CCS Insight сарапшысы Бен Вуд CNBC-ке берген сұхбатында: «Apple-ге ЖИ саласында қарқынын арттыру қажет, бірақ менің ойымша, оған жақын арада бұл үшін жеткілікті уақыт бар», — деді.
Bloomberg дерегінше, алдағы мерекелік маусым (Рождество алдындағы кезең) Уолл-стрит үшін Apple сатылымына үлкен сынақ болмақ. Әсіресе Қытайдағы қабылдау шешуші рөл атқарады: онда презентация алдындағы апталарда iPhone сұранысы 6%-ға төмендеп кеткен, бұл әдеттегіден де күшті құлдырау деп санайды агенттік.
