Alibaba бұлтты бизнесі 34% өсті, бірақ холдингтің пайдасы төмендеді
Қытайлық Alibaba IT-алыбның бұлтты қызметтер мен жасанды интеллект нарығындағы оның табысы өткен тоқсанда үштен бірге өсті. Алайда, ЖИ-ға арналған шығындар холдингтің таза пайдасының қысқаруына әкелді. Alibaba сатылымы Уолл-стрит болжамынан жоғары болғанымен, компания қағазы Нью-Йорктегі саудада төмендеді. Соған қарамастан, сарапшылар қатаң бәсеке мен жедел жеткізу сегментіндегі қысымға қарамай, Alibaba-ны Қытайдағы ЖИ нарығының негізгі бенефициарының бірі деп санайды және оның акциясынан ұзақ мерзімді әлеует байқады.
Егжей-тегжейлі
Қытайлық e-commerce алыбы Alibaba жасанды интеллект бумын және негізгі бұлтты бизнесінің жедел өсуін тиімді пайдаланып, тоқсандық табыс бойынша сарапшылар болжамынан асты, деп жазды CNBC.
Cloud Intelligence Group бөлімшесінің табысы 34% өсіп, 39,8 млрд юаньға ($5,59 млрд) жетті, бұл сарапшылар күткен 37,9 млрд юаньнан жоғары. Холдингтің жалпы сатылымы жылдық мәнде 5% артып, 247,8 млрд юаньға ($34,8 млрд) тең болды. Алайда таза пайда қысқарды: 53% төмендеп, 20,6 млрд юаньға ($2,9 млрд) түсті, бірақ бұл көрсеткіш те сарапшылар болжамынан жоғары, деп атап өтті Reuters.
Reuters мәліметінше, Alibaba жасанды интеллектке белсенді инвестиция салып, Қытайдағы ЖИ саласының жетекшілерінің біріне айналды. Қыркүйекте компания ЖИ-модельдер мен инфрақұрылымға салынатын шығындарды арттыру жоспарын жариялады — бұл ақпанда айтылған үш жылда 380 млрд юань ($53 млрд) көлеміндегі инвестициядан да жоғары. Компания мәліметінше, соңғы төрт тоқсанда ЖИ мен бұлтты қуаттарға арналған капиталдық шығындар шамамен 120 млрд юаньға ($16,89 млрд) жеткен.
Alibaba Қытайдың ЖИ индустриясындағы жетекші ойыншылардың қатарында өз орнын нықтай түсуде. Биыл өзінің ChatGPT баламасы саналатын Qwen қосымшасы іске қосылғаннан кейінгі алғашқы аптада 10 млн жүктелімнен асқанын хабарлады. Бұл сервис Alibaba-ның өз жасанды интеллект модельдері негізінде жұмыс істейді.
Сонымен қатар, компания күнделікті тауарларды жылдам жеткізу сегментіне инвестицияны күшейтіп жатыр.. Қытайдағы e-commerce бағытындағы табыс жылдық мәнде 16% өсіп, 132,6 млрд юаньға ($18,6 млрд) жетіп, алдыңғы тоқсан көрсеткішінен жоғары болды.
Нью-Йорктегі премаркетте Alibaba-ның депозитарлық түбіртектері есеп жарияланғаннан кейін шамамен 3% қымбаттады, және негізгі сауда да өсіммен басталды, бірақ кейін 1,5%-дан астам арзандады.
Нарықтағы ахуалы
Alibaba-ның депозитарлық түбіртектері (ADR) жылдың басымен салыстырғанда қазір 86% қымбат. Алайда, осы қарқын сақталуы үшін компанияға бұлтты бизнес өсімін әрі қарай жеделдетіп, Қытайдың интернет-секторындағы — DeepSeek сияқты стартаптардан бастап TikTok иесі ByteDance секілді алыптарға дейін қатты бәсекеге төтеп беруі қажет, деп жазды Bloomberg.
Жасанды интеллект пен бұлтты сервистерге бағытталған стратегия Alibaba үшін ең перспективалы өсім драйвері саналады. Бірақ бұл сектор АҚШ-тың Nvidia-ның озық чиптерін жеткізуге қойған шектеулерімен бетпе-бет келіп отыр. Бұл ЖИ-технологияларының дамуын баяулатуда, дегенмен Alibaba мен Huawei өз өнімдерін жасауға белсенді жұмыс істеп жатыр, деп атап өтті Bloomberg.
Jefferies сарапшылары қазанда Alibaba акциясы бойынша «сатып алу» рейтингін қайта растады және оларды 2026 жылға арналған ең үздік таңдау деп атады. Есеп жарияланар алдында сарапшылар компанияның жедел коммерция секторын дамытуда «сенімді прогресс» көрсетеді деп күтті.
Goldman Sachs дерегінше, азық-түлік жеткізу және жедел шопингтегі қызу бәсеке Қытайдағы ең ірі e-commerce ойыншыларының барлық транзакцияларға — тауардан бастап қызметке дейін арналған әмбебап супер-қосымша болу үшін жүргізіп жатқан күресін көрсетеді, деп жазды The Wall Street Journal.
Бәсекелестердің қысымына қарамастан, Alibaba ұзақ мерзімді перспективада тиімді позицияда қала береді, деп жазды WSJ. Morningstar сарапшылары компанияны биылғы жеткізу сегментіндегі баға соғысының басты бенефициары деп атайды — бірақ олардың болжамынша, бәсекелес Meituan нарықтағы үстем үлесін сақтап қала алады.
