Alibaba, ритейлерлер және Ұлыбритания бюджеті: инвестор бұл аптада не білуі керек
АҚШ-та қарашаның соңғы сауда аптасы Алғыс айту күні мен «Қара жұманың» өтуіне байланысты қысқарады. Уолл-стрит назары қыркүйек айының көтерме баға индексі мен сол айдағы бөлшек сауда статистикасына аударылады.
Ұлыбританияда қаржы министрі Рэйчел Ривз жылдық бюджетті ұсынады. Investec Economics пікіріне сүйенген The Wall Street Journal бұл құжатты «соңғы онжылдықтардағы ең көп күтілген бюджет» деп сипаттады.
Корпоративтік секторда бұл аптада қаржылық есептіліктер бойынша күнтізбе салыстырмалы түрде тыныш өтеді. Yahoo Finance мәліметінше басты назар Alibaba, Dell Technologies және Kohl’s пен Best Buy секілді бірқатар ритейлерлердің есептеріне ауады. S&P 500 индексіндегі компаниялардың шамамен 95%-ы тоқсандық нәтижелерін жариялап үлгерді: олардың 80%-дан астамы акцияға шаққандағы пайда болжамдарын, ал шамамен 75%-ы табыс бойынша күтулерді еңсерді, деп жазады Barron’s.
Дүйсенбі, 24 қараша күні Zoom, сондай-ақ Agilent Technologies, Keysight Technologies және Symbotic компаниялары тоқсандық нәтижелерін жариялайды.
Сейсенбі, 25 қарашада АҚШ Халық санағы бюросы әлемдегі ең ірі экономиканың қыркүйек айындағы бөлшек сауда деректерін шығарады. Еңбек статистикасы бюросы сол айға арналған өндіруші бағалар индексін (PPI) жариялайды. Бұл көрсеткіштер бұған дейін шатдаун салдарынан кешіктірілген еді.
Өткен тоқсандағы кірістер жөнінде Alibaba Group, Analog Devices, Autodesk, Best Buy, Dell, HP және Kohl’s есеп береді.
Сәрсенбі, 26 қарашада Ұлыбританиядағы лейбористер үкіметі жылдық бюджетті таныстырады. Әлемдегі ең ірі инвестициялық компаниялардың бірі Fidelity бұл құжатты «жеке инвесторлар үшін жылдың ең маңызды оқиғаларының бірі» деп атады. Бюджет мазмұны әзірге үкіметтің өзінен басқа ешкімге белгісіз. Қарашаның басында Ұлыбританияның қаржы министрі салықтардың өсуі сөзсіз екенін меңзеп өткен. Осыған байланысты лейбористер биліктегі партия ретінде табыс салығын, ҚҚС-ты немесе ұлттық сақтандыру жарналарын көтермеу жөніндегі уәделерінен бас тартуы мүмкін деген қауіп бар, деп атап өтті Fidelity.
АҚШ Халық санағы бюросы қыркүйектегі ұзақмерзімді пайдалануға арналған тауарларға берілген тапсырыстар туралы есебін жариялайды. ФРЖ осы жылы сегізінші әрі соңғы рет «Бежевую книгу» шығарады.
Deere және Li Auto компаниялары қаржылық есептерін жариялайды.
Бейсенбі, 27 қарашада АҚШ-тағы биржалар Алғыс айту күніне байланысты жұмыс істемейді.
Жұма, 28 қарашада Nasdaq және NYSE сауда алаңдары қысқартылған кестемен жұмыс істейді — акциялармен сауда Солтүстік Америка шығыс уақыты бойынша 13:00-де (Астана уақытымен 23:00-де) аяқталады.
