Алтын орталық банктер резервінде еуродан озды. Бағасы өсе бере ме?
Алтын әлемдегі орталық банктердің резервтерінде еуродан озып, екінші орында тұр. Оның бағасы 2025 жылдың басынан бері 25%-дан астам өсті.
2024 жылғы есепке сәйкес, алтын әлемдік орталық банктердің резервтерінде екінші маңызды активке айналды. Алтынның үлесі 19%-ға жетіп, еуроны (16%) басып озды. Мұндай жағдай соңғы рет 1960-жылдары тіркелген. Ең ірі резервтік актив әлі де – 47% үлеспен АҚШ доллары.
Егжей-тегжейі
Орталық банктер алтынды шетел валюталарымен бірге инфляциядан қорғану және резервтерді әртараптандыру үшін сатып алады. Қазір әлемдік алтын сұранысының 20%-дан астамы дәл осы орталық банктерге тиесілі. Бұл көрсеткіш 2010-жылдардағыдан екі есе жоғары. Әсіресе дамушы елдер үшін алтын санкциялар мен әлемдік валюталық жүйедегі өзгерістер аясында тартымды бола түсті.
Ресейдің Украинаға 2022 жылы басып кіруі алтынға деген сұраныстың күрт артуына себеп болды. Инвесторлар инфляция мен пайыздық мөлшерлемелердің өсуінен қорғанып, алтын секілді қорғаныс активтеріне бет бұрды. Содан бері геосаяси және экономикалық тұрақсыздық сақталып келеді. Бұл алтын бағасының өсуін жалғастыруда. Соңғы айларда алтын бірнеше рет тарихи шегіне жетіп, бір унциясы 3500 долларға дейін көтерілді. 2025 жылдың басынан бері алтын 25%-ға қымбаттаған.
Ары қарай не болады?
UBS инвестициялар жөніндегі директоры Марк Хефеле алтын бағасы алдағы уақытта тағы 14%-ға өсіп, 3800 долларға жетуі мүмкін деп есептейді. Ол инвесторларға тәуекелден сақтану үшін портфельдерінде жеткілікті мөлшерде алтын ұстауға кеңес береді.
Сонымен қатар, Capital Economics сарапшысы Хамад Хуссейннің пікірінше, орталық банктер алтын сатып алу қарқынын баяулатуы мүмкін. 2024 жылдың бірінші тоқсанында алтын сатып алу 33%-ға азайған. Бұл әсіресе Қытайда байқалады.
ING банкінің стратегы Ева Мантейдің айтуынша, баяулауға қарамастан, орталық банктер АҚШ долларына тәуелділікті азайту үшін алтын қорын арттыра бермек. Соңғы алты айда олар шамамен 30 тонна алтын сатып алған.
Еуропа орталық банкінің есебінде алтын бағасына әсер ететін негізгі фактор – геосаяси жағдайлар мен сұранысқа ұсыныстың қалай жауап беретіні. Соңғы онжылдықтарда ұсыныс сұранысқа икемді түрде бейімделіп отырды, әсіресе жер қойнауынан тыс сақталған қорлардың есебінен. Сондықтан алтынға деген ресми сұраныс өсе берсе, жаһандық ұсыныстың да артуы ықтимал.
