Аналитик Amazon-ның киберқауіпсіздік бойынша серіктесін сатып алуға кеңес беруде
Mizuho киберқауіпсіздік шешімдерін ұсынатын әрі Amazon Web Services-тің клиенті болып табылатын Rubrik компаниясының акцияларын қайта «сатып алуға» ұсынды, деп жазады Barron’s. Инвестбанк мамыр айында компания қағаздарының рейтингін төмендеткен болатын, алайда содан бері олар қайтадан сатып алуға қолайлы деңгейге түсті деп есептейді сарапшылар. Олар Rubrik акцияларының шамамен 40%-ға өсуін күтеді.
Егжей-тегжейлі
Mizuho аналитиктері Rubrik акцияларының рейтингін «бейтараптан» «нарықтан жоғары» (Outperform) деңгейіне көтерді — бұл компания қағаздарын сатып алуға ұсыныс беруге тең. Инвестбанк сондай-ақ мақсатты бағаны $97 деңгейінде растады. Бұл 17 қарашадағы сауда жабылу бағасынан 39% жоғары.
Rubrik акциялары дүйсенбі күні 2,6%-ға төмендеп, $69,7 деңгейінде жабылды. Жыл басынан бері компанияның капитализациясы 6,6%-ға өсті. Салыстырмалы түрде, осы кезеңде S&P 500 индексі шамамен 13%-ға көтерілді.
Mizuho-ны жігерлендірген не?
Инвестбанктің айтуынша Rubrik жақсы нәтижелер көрсеткеніне қарамастан, 15 мамырдан бері, дәл сол күні Mizuho оның рейтингін бейтарапқа түсірген, компания акциялары 16%-ға төмендеді. Аналитиктер компаниядан алынған деректердің, әсіресе киберкұрылымға жоғары көңіл бөлетін нарық ойыншыларымен жасалған мықты әріптестік арқасында әлі де оң екенін атап өтті, деп жазады Barron’s. Деректерді қорғау нарығындағы жоғары бәсекеге қарамастан, Rubrik Amazon Web Services секілді технологиялық алыптармен стратегиялық келісімдерге қол жеткізуде, деп еске сала кетті басылым.
Mizuho Rubrik-тің кибершабуылдарға қарсы бағдарламалық жасақтама бойынша үшінші тоқсандық есебінің алдында рейтингті жақсартты. Бұл есеп 4 желтоқсанда жарияланады. Инвестбанк аналитиктері компанияның жазылымдардан түсетін жылдық қайталанатын табысы (ARR) өзінің болжамынан асып, 32%-ға өседі деп күтуде. Екінші тоқсанда бұл көрсеткіш 36%-ға өсіп, $1,25 млрд-қа жеткен еді. Mizuho Rubrik осы тоқсанға арналған болжамын да жақсартып, Уолл-стрит күтулерінен озады деп санайды.
Басқа аналитиктер не дейді
Уолл-стриттің барлық сарапшылары Rubrik-тің болашағына бәрі бірдей оптимизммен қарап отырған жоқ. Мәселен, Oppenheimer аналитигі Парам Сингх дүйсенбі күні компания акцияларын бейтарап рейтингпен қамтуға кірісіп, қазіргі бағалау «өсімді толық ескерген» деп мәлімдеді. Ол International Data зерттеушілерінің болжамына сүйене отырып, әлемдегі деректер көлемі экспоненциалды түрде өсіп жатқанын, ал оларды «бизнестің үздіксіздігін қамтамасыз ету үшін сақтау қажет» екенін айтты. Бұл резервтік көшіру және деректерді қалпына келтіру бағдарламалық жасақтамасы нарығын қолдайды.
Хакерлік шабуылдар мен деректердің таралу оқиғаларының көбеюі мұндай шешімдерге сұранысты арттырып отыр, ал дәл осы салада Rubrik жұмыс істейді, деп жазады Barron’s. Алайда компания Commvault және жеке Veeam секілді бәсекелестермен күрделі тартысқа тап болған: «екеуі де киберқауіпсіздік бағытындағы мүмкіндіктерін жылдам кеңейтіп, арақашықтықты қысқартып келеді», — деп атап өтті аналитик.
Соған қарамастан, Rubrik акцияларын бақылайтын 25 аналитиктің 23-і оларды сатып алуға кеңес береді, ал қалған екеуі — «ұстау» ұсынымын беруде, деп көрсетеді MarketWatch деректері. Уолл-стриттің консенсус-болжамы Rubrik акцияларының 17 қарашадағы жабылу бағасынан 66%-ға өсіп, $115,85 деңгейіне жететінін меңзейді.
