AppLovin жарнамаға дерек жинау әдісімен биліктің назарына ілікті
АҚШ-тың Бағалы қағаздар және биржа жөніндегі комиссиясы (SEC) AppLovin компаниясының мобильді жарнаманы дәлірек таргетинг жасау мақсатында пайдаланушының жеке дерегін жинау тәжірибесін тексеріп жатыр. Бұл туралы Bloomberg дереккөздері хабарлады. Әзірге SEC те, AppLovin де тергеу жүргізіліп жатқаны туралы ақпаратты растаған жоқ. Алайда агенттіктің жазуынша, егер тексеріс шынымен жүріп жатса да, бұл SEC міндетті түрде компанияға санкция қолданады дегенді білдірмейді. Ең нашар жағдайда, компанияға немесе оның лауазымды тұлғаларына айыппұл салумен аяқталуы мүмкін.
Агенттік дереккөздерінің айтуынша, SEC AppLovin компаниясы серіктес платформалармен жасалған келісім шарттардың шарттарын бұзған-бұзбағанын тексеріп жатыр. Мұндай бұзушылық соңғы пайдаланушыларға арналған жарнаманы неғұрлым агрессивті персонализациялау мақсатында жасалуы мүмкін. Бұл істі киберқауіпсіздік пен жаңа технологиялар саласындағы құқық қолдану жөніндегі SEC бөлімшесі қарап жатыр.
Дереккөздердің мәліметінше, SEC тексеруді осы жылы ертеректе түскен информатордың шағымынан кейін және соңғы бір жылда жарияланған бірнеше шортистердің есептерінен кейін бастаған. Атап айтқанда, Fuzzy Panda және Muddy Waters инвестициялық фирмалары, өздерінің шорт позициясы аясында, AppLovin жарнамалық экожүйедегі үстем жағдайын теріс пайдаланды деп айыптаған. Олардың дерегінше, компания басқа платформалардан пайдаланушының бірегей идентификаторын рұқсатсыз жинап, олардың түрлі қосымшалар мен сайттардағы әрекетін бақылап, таргеттелген жарнама көрсеткен. Мұндай тәсіл «фингерпринтинг» деп аталады және ол Apple App Store ережесінде тыйым салынған, сондай-ақ, 2025 жылдың ақпанына дейін Google ережесімен де шектелген.
SEC әзірге AppLovin компаниясына немесе оның басшылығына ресми айып таққан жоқ, сондай-ақ, тергеудің нақты қай кезеңде екені де белгісіз, деп хабарлайды Bloomberg.
AppLovin агенттікке пікір беруден бас тартты. Компанияның хатында: «Біз реттеуші органдармен үнемі байланыстамыз және ресми сұрау түскен жағдайда жұмыс тәртібі бойынша қарастырамыз. Егер қандай да бір маңызды өзгерістер болса, тиісті ашық арналар арқылы жарияланады», — делінген.
AppLovin бас директоры Адам Форуги наурыз айында компания блогында жазба жариялап, шортселлерлердің есептерінде көптеген дәлсіздік бар екенін айтып, «фингерпринтинг» деп аталатын балама тұрақты идентификаторлар жасағаны жөніндегі айыптауларды жоққа шығарған.
SEC өкілі де Bloomberg-ке пікір бермеді, себебі «үкімет жұмысы уақытша тоқтаған кезеңде комиссияның баспасөз қызметі БАҚ сауалдарына жедел жауап бере алмайды» деп түсіндірді.
6 қазанда сауда жабылар алдында, Bloomberg жариялаған материалдан кейін, AppLovin акциясы шамамен 20% құлдырады — бұл соңғы алты айдағы ең ірі күн ішіндегі төмендеу болды. Сауда сессиясының соңына қарай құлдырау 14%-ға дейін баяулады, ал кеңейтілген саудада компания қағазы тағы 4% төмендеді.
AppLovin мобильді қосымша әзірлеушілеріне пайдаланушылар тартуға және жарнаманы қосымша ішінде орналастыруға көмектеседі. Жыл басынан бері компанияның нарықтық капитализациясы еселеніп, өткен аптада $230 млрд-тан асты, бұл көрсеткіш маркетологтарға арналған бағдарламалық қамтамасыз ету жасаушы Salesforce компаниясының құнына жақындады. Жасанды интеллект пен жарнамалық сатып алуларды автоматтандыру құралдарына қызығушылықтың артуы аясында AppLovin акциясы қыркүйекте S&P 500 индексіне енгізілген болатын.
