Апта айшықтары: OpenAI-дың $830 млрд бағалануы, ЕОБ-ның үзілісі және Tesla рекордтары
Еуропада Еуропалық орталық банк (ЕОБ) мөлшерлемені төмендетуді уақытша тоқтатып, экономиканың тұрақтылығына сенімді екенін аңғартты. IPO нарығы Medline медицина компаниясының өте сәтті биржалық дебютінің арқасында қайта жандана бастады. OpenAI-дың жаңа инвестициялық раунды оны $830 млрд деп бағалауы мүмкін. Бұл Илон Масктің SpaceX компаниясынан да қымбат. АҚШ шикізат секторына қысымды күшейтіп, санкциялар жағдайында «Лукойлды» шетелдегі активтерін сатуға немесе сырттан басқаруға келісуге мәжбүрлеп отыр. 15–19 желтоқсан аралығындағы басты оқиғалар — шолуда.
ЕОБ үзіліс жасады
Еуропалық орталық банк 18 желтоқсанда қатарынан төртінші рет негізгі мөлшерлемені 2% деңгейінде қалдырды және сонымен бірге экономика өсімі бойынша болжамын, сондай-ақ инфляция бойынша болжамының бір бөлігін көтерді. ЕОБ мәлімдемесінде еуроаймақ экономикасы күткеннен төзімді көрінетіні, ал инфляция саудадағы шайқалуларға қарамастан орта мерзімде 2% нысаналы деңгейіне жақын сақталып тұрғаны айтылды. 2024 жылдың ортасынан 2025 жылдың ортасына дейін реттеуші мөлшерлемені сегіз рет түсіріп, қарыз алу құнын екі есе азайтқан болатын.
Нарықтар бұл шешімді мөлшерлемені әрі қарай төмендетуден бас тартудың белгісі ретінде қабылдады: еуропалық индекстер мен еуро аздап өсті. Кейбір шенеуніктердің инфляцияның қайта күшею тәуекелдері туралы сөздері 2026–2027 жылдары мөлшерлеме өсуі мүмкін деген әңгімелерді қозғағанымен, Reuters сұрастырған экономистердің көбі мөлшерлеме қазіргі деңгейде қалады деп күтеді.
OpenAI қаржы тартуда
The Wall Street Journal дереккөздерге сүйеніп хабарлағандай, OpenAI инвесторлармен бизнесті шамамен $830 млрд деп бағалайтын жаңа қаржыландыру раундын талқылап жатыр. Егер компания жоспарланған соманы толық тарта алса, ол ең қымбат стартапқа айналып, бағалауы $800 млрд болған SpaceX-тен озып шығады (SpaceX қазір акция сату бойынша жаңа раунд бастап кеткен). WSJ мәліметінше, OpenAI мәмілені 2026 жылдың бірінші тоқсанының соңына дейін аяқтауды көздемейді.
Бұған дейін The Information дереккөздерге сүйеніп, OpenAI бизнесті шамамен $750 млрд деп бағалау арқылы қаржы тартқысы келетінін жазған. Бұл көрсеткіш 2025 жылдың күзіне қарай жасалған мәміледегі деңгейден 1,5 есе жоғары еді, ол мәміле қызметкерлердің бір бөлігіне акцияларын институционалды инвесторларға сатуға мүмкіндік берген. OpenAI бағасының қайта қаралуы онымен байланысты компаниялардың, ең алдымен Microsoft-тың акция бағасына қолдау болып отыр: қайта құрылымдаудан кейін ол стартаптың коммерциялық бөлімшесінің шамамен 30%-ын алады. Пайданы инфрақұрылым бойынша серіктестер мен дата-орталықтарға жабдық жеткізушілер де көруі мүмкін — Nvidia мен Broadcom-нан бастап, жад өндірушілерге дейін. Қазанның соңында Reuters OpenAI IPO-ға дайындалып жатқанын, ол компанияны $1 трлн-ға дейін бағалауы мүмкін екенін хабарлаған.
OpenAI туралы тағы не оқу керек?
— Amazon OpenAI-ға $10 млрд-тан аса инвестиция салу және стартапқа өзінің ЖИ чиптері мен бұлттық қуатын жеткізу жөнінде келіссөз жүргізіп жатыр. Бұл мәміле Amazon үшін нені білдіреді — «Amazon OpenAI-ға көпмиллиардты инвестиция және ЖИ-чиптер жеткізу туралы келіссөз жүргізіп жатыр» мақаласында талданған.
Санкциялар жағдайындағы «Лукойлдың» шетел активтерінің тағдыры
АҚШ 2025 жылдың күзінде бұғаттаушы санкциялар енгізгеннен кейін, «Лукойл» АҚШ Қаржы министрлігінің Шетел активтерін бақылау басқармасынан (OFAC) 2026 жылдың қаңтарына дейін шетел активтерін сатуға уақытша рұқсат алды. Тәуекел астындағы активтер портфелін сарапшылар $10–12 млрд деп бағалайды. Ол компанияның EBITDA көрсеткішіне шамамен 20% үлес қосады.
Сарапшылар екі шынайы сценарийді талқылап жүр: активтерді бөліп-бөліп сату (Exxon Mobil, Chevron және өңірлік ойыншылар қызығушылық танытуы мүмкін) немесе бәрін бір пакет ретінде Carlyle сияқты ірі қорға сату. Негізгі белгісіздік — түскен қаржы бұғатталған шоттарға түсіп, «Лукойлдан» санкциялар алынғанға дейін сонда сақталуы ықтимал. «Лукойл» үшін балама шешім ретінде сырттан басқару енгізілуі де мүмкін — бұл жолды Германия, Болгария және Румыния бұрын таңдаған; ол ұлттандырудан немесе шұғыл сатудан жұмсағырақ нұсқа саналады.
Мұнай тақырыбында тағы не оқу керек?
— Қарашада инвестбанктер Brent мұнайының 2026 және 2027 жылдарға арналған баға болжамдарын төмендетті. Келесі жылы мұнай бағасына қандай факторлар әсер ететіні туралы Oninvest шолушысы Едіге Қасымжанның “Теңіздегі және құрлықтағы да қатерлер: 2026 жылы мұнай нарығына не әсер етеді?” мақаласында жазылған.
Elliott Lululemon-ның ең ірі акционері болды
Elliott Management инвестициялық компаниясы канадалық спорттық киім өндіруші Lululemon Athletica-дағы үлесін $1 млрд-тан астамға арттырды. Хедж-қор компанияның ең ірі акционерлерінің біріне айналып, жаңа бас директорды іздеу процесіне қосылды. Осы жаңалықтар аясында Lululemon акциялары 18 желтоқсан, бейсенбі күні сауда кезінде бір сәтте 8%-дан аса өсті.
Elliott-тың қызығушылығы қолданыстағы CEO-ның 2026 жылдың қаңтарында кететіні туралы хабарламадан және бизнестегі ұзаққа созылған қиындықтардан кейін күшейді: жыл басынан бері Lululemon акциялары 45%-дан астам арзандады. WSJ дерегінше, Elliott компания басшысы қызметіне Ralph Lauren-нің бұрынғы топ-менеджері Джейн Нильсенді кандидат ретінде қарастырады. Reuters пікірінше, Lululemon директорлар кеңесінде жаңа CEO тағайындауға байланысты қымбат әрі ұзақ дау-дамайға тап болуы мүмкін.
Medline-ның сәтті листингі IPO нарығын жандандырды
Medline медициналық тауар өндірушісінің акциялары АҚШ биржасында сауда басталған алғашқы күні, 17 желтоқсан сәрсенбіде 40%-дан аса көтерілді. Биылғы ең ірі IPO нәтижесінде компанияның капитализациясы $54 млрд-қа дейін өсті. Инвесторларды бизнестің тұрақтылығы, табыстылығы және түсімнің бірқалыпты өсуі қызықтырды.
Сарапшылар Medline-ның табысын АҚШ-тағы IPO нарығының қалпына келе бастағанының белгісі ретінде қарастырады: 2025 жылы тартылған қаражат көлемі 2021 жылдан бергі ең жоғары деңгейге жетті. Кейбір мамандар Medline акциялары раллиден кейін тым қымбат бағалануы мүмкін деп ескерткенмен, бұл мәміле 2026 жылы жаңа орналастырулар толқыны күтілетінін күшейтті.
Coinbase акциялармен сауданы іске қосты
Coinbase криптобиржасы өнім желісін кеңейтетінін жариялап, пайдаланушыларға криптовалюталармен бірге бір интерфейсте акциялар, ETF және болжамдар нарығында сауда жасауға қолжетімділік ашты. Компания акциялар бөлігін бағалы қағаздарды жаһандық токенизациялауға алғашқы қадам деп санайды және Coinbase Tokenize платформасын, сондай-ақ АҚШ-тан тыс жерлерде америкалық акцияларға деривативтер шығаруды дайындап жатыр.
Криптонарықтағы ұзақ түзетуге қарамастан, Deutsche Bank Coinbase акцияларын бақылауға алып, «сатып алу» ұсынымын және $340 мақсатты бағасын берді. Бұл биржа бағасының тағы шамамен 40% өсуін меңзейді. Уолл-стрит сарапшыларының көбі де оң көзқараста: 38 талдаушының 23-і Coinbase акцияларын сатып алуға кеңес береді.
Tesla роботакси есебінен тарихи максимумын жаңартты
Tesla акциялары 16 желтоқсандағы саудада 3% қосып, $489,88 деңгейінде жабылды, осылайша бір жыл ішінде алғаш рет жаңа тарихи максимумға шықты. Нәтижесінде компанияның нарықтық құны $1,63 трлн-ға жетіп, Broadcom-нан озып, АҚШ-тағы ең ірі жария компаниялардың ТОП-7 қатарына уақытша қайта кірді. Ол толықтай «Керемет жетілік» деп аталатын топтан тұрады. 19 желтоқсан, жұма күні Tesla-ның нарықтық құны $1,61 млрд болды.
Сарапшылар бағаның өсуін Tesla-ның автономды жүргізу технологияларындағы ілгерілеуімен және роботакси қызметін кең ауқымда дамыту үміттерімен байланыстырады. Дегенмен Уолл-стрит бағалауы екіге бөлінеді: бір тарап Full Self-Driving дамуына сүйеніп, әрі қарай да өсім бар дейді, екінші тарап реттеушілік тәуекелдерді, сатылымға қысымды және электромобиль нарығындағы бәсекенің күшеюін алға тартады.
