Автокөлікке арналған датчик өндірушінің акциялары 60%-ға құлады
Автокөліктің айналасын «көріп», кедергілерді анықтауға көмектесетін лидар датчиктерін шығаратын Luminar Technologies компаниясының акциялары 15 желтоқсанда бір күнде 60%-дан аса арзандап, тарихи минимумға түсті. Бұған компанияның банкроттық рәсімін бастағаны туралы хабар себеп болды. Бұл жаңалық Volvo автоконцернімен серіктестік тоқтағаннан кейін бір ай өткен соң шықты.
Егжей-тегжейлі
15 желтоқсанда Luminar акциялары $0,35-ке дейін төмендеді — бұл компания тарихындағы ең төмен баға.
Сол күні Luminar инвесторларға екі маңызды жаңалық айтты: компания лидар өндіретін негізгі бизнесін сату үшін ерікті түрде банкроттық рәсімін бастайды; бірақ соған дейін өзге бір бөлімшесін — Luminar Semiconductors (LSI) — Quantum Computing компаниясына $110 млн-ға сатуға келіскен.
LSI фотондық компоненттер мен зымыранға қарсы қорғаныс, кванттық сенсорика және оптикалық байланысқа арналған технологиялар шығарады. Бұл бөлімше банкроттық рәсіміне кірмейді, сондықтан оның жұмысы жалғаса береді.
Компанияның бас директоры Пол Риччидің айтуынша соңғы айларда шығындарды қысқарту мен тәртіпті күшейтуге тырысқанымен, бұрынғы қарыздар мен технологиялардың баяу енгізілуі Luminar-дың тұрақты жұмыс істеуіне кедергі болған.
Миллиардтық бағалаудан күйреуге дейін
Luminar-ды 2012 жылы небәрі 17 жастағы Остин Рассел құрған. Ол Стэнфорд университетін тастап, венчур инвестор Питер Тильдің шәкіртақысын алған. 2020 жылы компания SPAC арқылы биржаға шығып, Рассел 25 жасында миллиардер атанды.
IPO алдында Luminar $3,4 млрд-қа бағаланса, алғашқы сауда күні капитализациясы $7,8 млрд-қа жеткен. Ал қазір компанияның нарықтық құны бар болғаны $27,4 млн. 2025 жылдың басынан бері акциялар 93%-дан астам құн жоғалтты.
Volvo-мен байланыс
Биыл Luminar үшін өте қиын болды: бірнеше несиесі бойынша дефолтқа ұшырады; қызметкерлердің 25%-ын қысқартты; қарашада ең ірі клиенттерінің бірі әрі алғашқы инвесторлардың бірі — Volvo — бес жылдық келісімшартты бұзды.
Luminar Volvo-ны сотқа бергенімен, өтемақы алу мүмкіндігі төмен екенін өзі де мойындады. Осыдан кейін компания бизнесін немесе оның бір бөлігін сатуды қарастырып жатқанын және 2025 жылға қаржылық болжамын тоқтатқанын хабарлады.
Қосымша факторлар
Мамыр айында Остин Рассел «іскерлік этика кодексін бұзу» бойынша жүргізілген тексерістен кейін бас директор қызметінен кеткен. Дегенмен, ол директорлар кеңесінде қалды.
Күзде Рассел Russell AI Labs атты жаңа жобаны іске қосып, Luminar-ды толық сатып алу жөнінде ұсыныс жасады. Компания өкілдерінің айтуынша, банкроттық рәсімі барысында Luminar-дың қалған бөлігін сатып алуға өтінім беруді жоспарлап отыр.
