Банктер Oracle серіктесіне $38 млрд несие бермек
JPMorgan Chase жетекшілігімен бірнеше банк консорциумы Oracle серіктесіне деректер орталықтарын (дата-орталықтарды) салу үшін 38 миллиард доллар көлемінде несие беруге дайындалып жатыр, деп хабарлады Bloomberg дереккөздерге сілтеме жасап. Бұл — жасанды интеллект инфрақұрылымын дамытуға бағытталған тарихтағы ең ірі қарыз мәміле.
Жоба туралы
Bloomberg-тің мәліметінше қаржыландыруды Vantage Data Centers компаниясы алады. Ол екі ірі деректер орталығын салып жатыр және бұл нысандарды IT алыбы Oracle пайдаланбақ. Oracle өз кезегінде бұл орталықтардағы есептеу қуатын ChatGPT әзірлеушісі OpenAI-ға ұсынбақ. Бірінші несие пакеті — 23,25 млрд доллар, ол Техастағы деректер орталығын салуға жұмсалады. Екіншісі — 14,75 млрд доллар, Висконсин штатындағы жобаға бағытталады.
Несие 4 жыл мерзімге беріледі, әрі екі рет бір жылға ұзарту мүмкіндігі бар.
Бұл жобалар жалпы құны 500 млрд доллар болатын Stargate атты ірі бағдарламаның бөлігі. Stargate — Oracle мен OpenAI бірлесіп жүзеге асырып жатқан жасанды интеллект инфрақұрылымын дамыту бастамасы. The Wall Street Journal-дың мәліметінше OpenAI 2027 жылдан бастап Oracle-дан есептеу қуатын бес жылға жалға алады және бұл келісім құны 300 млрд долларды құрайды.
Кім қаржыландырады
Мәміленің негізгі ұйымдастырушылары — JPMorgan Chase пен Mitsubishi UFJ Financial Group. Сондай-ақ консорциумға Wells Fargo, BNP Paribas, Goldman Sachs, Sumitomo Mitsui Banking және Societe Generale қосылды. Екінші кезеңдегі қаржыландыру раунды осы аптада аяқталды.
Bloomberg сұрауына OpenAI, JPMorgan, Mitsubishi UFJ және Sumitomo Mitsui түсініктеме беруден бас тартқан. Ал Oracle мен Vantage Data Centers жауап бермеген.
Контекст
Oracle-дың тапсырыстар портфелі соңғы қаржы тоқсанында (маусым–тамыз) 360%-ға өсіп, қыркүйек басында 455 млрд долларға жетті. Бұл компанияға бұлтты бизнесін (Oracle Cloud Infrastructure) 2026 қаржы жылында 77%-ға, яғни 18 млрд долларға дейін өсіруді болжауға мүмкіндік берді. Ал 2030 жылға қарай бұл көрсеткіш 144 млрд долларға жетуі мүмкін.
Бұл жарылғыш өсімді Oracle төрт ірі келісім арқылы қамтамасыз етті. Компания клиенттердің атын атамағанымен, вице-төраға Сафра Кац қыркүйекте өткен конференцияда Oracle-дың OpenAI, xAI, Meta, Nvidia, AMD және басқа да ЖИ көшбасшыларымен серіктес екенін айтты.
Уолл-стрит не дейді
2025 жылдың басынан бері Oracle акциялары 68%-ға қымбаттады, ал S&P 500 индексі осы кезеңде небәрі 14,5%-ға өсті. FactSet-тің орташа болжамына сай, акциялардың мақсатты бағасы — $351,6, бұл тағы 26%-дық өсу әлеуетін білдіреді.
Қазір 47 аналитикалық рейтинг бар: 26 — сатып алу (Buy), 7 — артық салмақтау (Overweight), 13 — ұстау (Hold), 1 — сату (Sell).
