Oracle жасанды интеллекттен түсетін табыс төмен болады деген күмәнді сейілтті
Жасанды интеллект жарысындағы жетекші компаниялардың бірі — Oracle — өзінің жаңа әрі маңызды бағыты, яғни ЖИ-инфрақұрылым бизнесінің табыстылығына қатысты инвесторлардың күдігін азайтты, деп хабарлайды Bloomberg. Компания ЖИ-жобаларға арналған деректер орталықтарын (data center) салу және жалға беру ісінен күтілетін жалпы пайда маржасы жөнінде болжамдарын бөлісті. Осыдан кейін оның акциялары күрт өсті. Бұған дейін The Information басылымы Oracle-дың бұл бағыттағы табыстылығы аса жоғары емес деп жазып, нарықта алаңдаушылық туғызған еді.
Егжей-тегжейлі
16 қазан күні Oracle акциялары небәрі бір минуттың ішінде 4%-ға қымбаттады, себебі компания Лас-Вегаста өткен конференцияда аналитиктерге деректер орталықтарындағы шығындардың неге өскенін түсіндіретін слайд көрсетті, деп жазады Barron’s.
Oracle-дың есебінше алты жылда жалпы табысы $60 млрд болатын ЖИ-инфрақұрылым жобасы шамамен 35% жалпы пайда маржасын қамтамасыз ете алады. Бұл көрсеткіш Wall Street-тің табыстылыққа қатысты қорқынышын азайтты, дейді Bloomberg.
(Жалпы пайда маржасы — бұл компания табысының өндірістік шығындардан кейін қалатын бөлігі.)
Сонымен қатар, Oracle өзінің ЖИ бұлттық серверлерін жалға беру бизнесі — Oracle Cloud Infrastructure бойынша ұзақмерзімді болжамын жаңартты:
2030 жылға дейін күтілетін табыс көлемін $144 млрд-тан $166 млрд-қа дейін көтерді.
Бұл 2025 жылғы $10 млрд деңгейінен жылына шамамен 75% орташа өсім болатынын білдіреді, деп жазады Barron’s.
Жалпы Oracle табысы 2030 жылы $225 млрд-қа, ал акцияға шаққандағы пайда $21-ға жетеді, деп хабарлайды MarketWatch.
Контекст
Oracle-дың тапсырыстар портфелі қазір жарты триллион доллардан асып түсті.
Алайда оның $300 млрд-ы — OpenAI-пен жасалған көпжылдық келісімге тиесілі. MarketWatch атап өткендей, OpenAI өз міндеттемелерін орындау үшін қажетті қаражатты таба ала ма, бұл әзірге белгісіз.
Бірақ Oracle соңғы уақытта Meta (Instagram және Facebook иесі) секілді компанияларды қамтитын төрт клиентпен жеті жаңа келісім жасасты. Бұл компанияның бұрынғыдай бір-екі серіктеске ғана тәуелді емес екенін көрсетеді.
Жаңалықтардан кейін Oracle акциялары шамамен 5%-ға өсті, ал сауда күнін 3% өсіммен аяқтады.
Алайда постмаркет саудасында баға 2%-ға төмендеді.
Сонымен бірге, ЖИ-инфрақұрылым жеткізушісі CoreWeave акциялары да 1,8%-ға өсті.
Инвесторлар неге алаңдады
Соңғы айларда Oracle OpenAI, Meta Platforms және Илон Масктың xAI стартаптарымен бірқатар ірі деректер орталықтарын салуға бағытталған келісімдер жасасты. Мұндай жобалар компания капитализациясына оң әсер еткенімен, инвесторлар олардың нақты тиімділігіне күмәнданған.
Қазан айының басында The Information басылымы Oracle-дың кейбір ЖИ-келісімдерінде маржа бар болғаны 14% болуы мүмкін деп хабарлаған.
Алайда сарапшылардың пікірінше бұл бизнес әлі ерте даму кезеңінде, сондықтан табыс көрсеткіштері алдағы жылдары жақсаруы әбден мүмкін.
Bloomberg Intelligence сарапшысы Анураг Рана:«Бұл мәлімдеме (Oracle конференциясындағы) табыстылыққа қатысты үрейді азайтуға көмектеседі», деп жазды.
Ал Baird компаниясының аға сарапшысы Роб Оливер Oracle-дың артықшылығы — бағдарламалық қамтуды инфрақұрылыммен біріктіре алуы екенін атап өтті: «Oracle — деректермен жұмыс істеудің барлық негізгі бағыттарында ірі ойыншы. Ал деректер — генеративті ЖИ-дің өзегі. ЖИ дерексіз өмір сүре алмайды», — деді ол MarketWatch-қа.
