Басты жаңалықтар: Google Chrome-ды сақтап қалды, Klarna IPO-ға шықпақ

Америка соты Google-ды Chrome браузері мен Android жүйесін сатуға мәжбүрлемеді және Apple компаниясына оның құрылғыларында әдепкі іздеу жүйесін қолданғаны үшін төлемдерді жалғастыруға рұқсат берді. Сонымен қатар, алтын бағасы $3600 деңгейінен асып, тарихи рекорд орнатты. Бұл ФРЖ мөлшерлемесінің төмендеуі күтіліп, орталық банктердің белсенді сатып алуларына байланысты орын алды. OpenAI экспансияны жалғастырып, Statsig стартапын $1,1 млрд-қа сатып алды. Осы және басқа да маңызды жаңалықтар 3 қыркүйек таңындағы шолуымызда.

Сот Google-ға Chrome браузері мен Apple-мен келісімді сақтауға мүмкіндік берді

Колумбия округінің федералды соты Google компаниясын Chrome браузері мен Android операциялық жүйесін сатуға міндеттемеді, бірақ кейбір шектеулер енгізді, деп жазады Yahoo Finance. Судья Амит Мехта Google-дың нарықтағы үстемдігі тек бәсекелестікке қарсы тәжірибемен ғана емес, өнім сапасымен де байланысты екенін мойындады.

Бұл шешім бойынша Google жыл сайын Apple-ге Safari мен Siri-дегі әдепкі іздеу жүйесі мәртебесі үшін шамамен $20 млрд төлем жасауды жалғастыра алады және негізгі өнімдерін сақтап қалады. Алайда, компанияға қызметтерді тек эксклюзивті келісімдермен орнатуға, Play Store лицензиясын басқа қосымшалармен байланыстыруға немесе кросс-промоушн талап етуге тыйым салынды. Сондай-ақ, Google бәсекелестерге іздеу индексінің бір бөлігін және жарнамалық сервистерге қолжетімділікті қамтамасыз етуі тиіс.

Реттеушілердің қысымына және Bing, Яндекс пен генеративті жасанды жады тарапынан бәсекенің артуына қарамастан, 2024 жылы Google-дың ата-аналық компаниясы Alphabet іздеу жарнамасынан $198 млрд тапты — бұл жалпы табыстың жартысынан астамы. Сот шешімінен кейін Google акциялары 8%-ға, ал Apple қағаздары 3%-ға өсті.

Алтын бағасы $3600-ға жетті

Yahoo Finance-тың хабарлауынша алтын фьючерстері бір унция үшін $3600-ға дейін өсіп, тарихи максимумды жаңартты. Ал спот-нарықтағы бағалар $3533-дан асты. Бұл өсімге ФРЖ мөлшерлемесінің қыркүйекте төмендеуі мүмкін деген болжам және орталық банктер тарапынан рекордтық сұраныс себеп болды: олардың алтын резервтері алғаш рет 1996 жылдан бері АҚШ қазына облигацияларына салынған инвестициялардан асып түсті.

Дүниежүзілік алтын кеңесінің деректері бойынша, орталық банктердің басым бөлігі келесі жылы резервтерді арттыруды жоспарлап отыр. Инвесторлар да алтынды инфляция, валюталық тәуекелдер мен экономикалық белгісіздікке қарсы қорғаныс ретінде белсенді қолдануда. 2025 жылдың басынан бері алтын бағасы 36%-ға өсті, бұл S&P 500 индексі (+8%) мен биткоиннен (+19%) әлдеқайда жоғары.

UBS сарапшылары бағаның өсуі жалғасады деп күтеді: олардың болжауынша, алтын бағасы 2026 жылдың маусымына дейін $3700-ға жетуі мүмкін, ал геосаяси немесе экономикалық қауіптер күшейсе, $4000-ға дейін көтерілуі ықтимал. Goldman Sachs та орталық банктер тарапынан тұрақты сұранысты және алтын ETF-тарына ақша ағынын ескере отырып, $4000 деңгейін нысана ретінде сақтап қалды.

OpenAI Statsig стартапын $1,1 млрд-қа сатып алды

CNBC-дің хабарлауынша OpenAI стартаптар сатып алуды белсенді жалғастырып, Statsig компаниясын $1,1 млрд-қа иеленді. Бұл стартап бизнестерге жаңа функцияларды тестілеуге және нақты уақытта деректермен жұмыс істеуге көмектеседі. Statsig бас директоры Вижай Раджи OpenAI командасына қосылып, қолданбалар бағытының техникалық директоры қызметін атқарады.

Statsig өз тәуелсіздігін сақтап, Сиэтлдегі кеңсесінде жұмысын жалғастырады және клиенттерге қызмет көрсетуді тоқтатпайды. Келісім реттеуші органдардың мақұлдауына жатады.

Бұл сатып алу OpenAI-дың жасанды интеллекттен тыс бағыттарға кеңею стратегиясына сай келеді. Мамыр айында компания Джони Айвтың IO стартапын $6,5 млрд-қа сатып алып, құрылғылар саласына шықты. Бұған дейін ол Rockset дерекқор платформасын иеленген болатын. Сондай-ақ, OpenAI Windsurf атты ЖЖ-құралын $3 млрд-қа сатып алуға қызығушылық танытқан, бірақ мәміле жүзеге аспады.

Klarna АҚШ-та IPO өткізуге қайта кірісті

Bloomberg-тің жазуынша «қазір сатып ал – кейін төле» қызметін ұсынатын швед финтех алыбы Klarna АҚШ-та IPO өткізуге өтініш берді. Компания $1,27 млрд тартуды жоспарлап отыр. 34,3 млн акция $35–37 диапазонында ұсынылады, бұл компанияны шамамен $14 млрд-қа бағалайды — бұл 2022 жылғы көрсеткіштен екі есе көп, бірақ 2021 жылғы $45,6 млрд рекордтық бағалаудан әлдеқайда төмен.

Осы пакеттен компанияның өзі 5,6 млн акция сатады, ал қалғанын инвесторлар – Sequoia Capital, Heartland A/S және құрылтайшы Виктор Якобссон ұсынбақ. Қор нарығына шығу 9 қыркүйекте жоспарланған. Sequoia мәміледен кейін дауыс беру құқықтарының шамамен 22%-ын сақтап қалады.

Klarna алғаш рет IPO-ға 2024 жылдың қарашасында өтініш берген, бірақ сол кезде АҚШ президенті Дональд Трамп жариялаған баж салығына байланысты кейінге қалдырған еді.

Anthropic бағалануы екі есе өсіп, $183 млрд-қа жетті

Claude чат-ботын жасаған жасанды жады стартапы Anthropic $13 млрд инвестиция тартып, нәтижесінде бағалануы $183 млрд-қа жетті, деп хабарлайды Reuters. Бұл көрсеткіш наурыз айындағы бағалаумен салыстырғанда (сол кезде $61,5 млрд болатын) екі еседен көп.

Компания бұл қаражатты инфрақұрылымды кеңейтуге, халықаралық нарықтарға шығуға және ЖЖ қауіпсіздігі саласындағы зерттеулерге бағыттауды жоспарлап отыр. Инвестициялық раундты ICONIQ Growth, Lightspeed Venture Partners және Fidelity басқарған.

Anthropic қазіргі уақытта 300 мыңнан астам корпоративтік клиентке ие екенін және $100 мыңнан астам табыс әкелетін аккаунттар санының жеті есе артқанын хабарлады. Компанияның жылдық табысы $5 млрд-қа жетті — бұл 2024 жылдың басындағы көрсеткіштен бес есе көп.

Нарықтағы жағдай