Kraft Heinz 10 жылдан соң кетчуп пен хот-догты «ажыратты» — Баффет ренжулі
Америкалық соус пен консервіленген тағам өндіруші Kraft Heinz бірнеше жыл бойы сатылымы әлсіз болып, капитализациясы төмендегеннен кейін бизнесін екі дербес бағытқа бөлетінін мәлімдеді. Басшылық құрылымды жеңілдету ресурстарды тиімдірек бөлуге, негізгі брендтердің позициясын нығайтуға және болашағы бар сегменттерде өсімді жеделдетуге мүмкіндік береді деп күтеді. Компания 2015 жылы атақты инвестор Уоррен Баффеттің Berkshire Hathaway қолдауымен құрылған болатын. Ол оны қайта бөлу шешіміне «ренжігенін» айтты. Kraft Heinz акциясы шамамен 6% құлдырады.
Егжей-тегжейлі
Kraft Heinz екі жария компанияға бөлінетінін мәлімдеді: бірі соус өндірісіне, екіншісі азық-түлік желісіне шоғырланбақ. Бұл қадамды компания бірнеше жылдық әлсіз сатылымнан кейін қайтадан өсуге оралу үшін жасап отыр, деп жазады Reuters.
Алғашқы компания уақытша North American Grocery Co. деп аталды. Ол Oscar Mayer (шұжық пен хот-дог), Kraft Singles (балқытылған сыр тілімдері) және Lunchables (дайын тіскебасар жиынтықтары) брендтерін біріктіреді. Бұл шамамен $10 млрд жылдық сатылымы бар бөлімді Kraft Heinz бас директоры Карлос Абрамс-Ривера басқарады, деп хабарлады компания.
Екінші бөлім жылына шамамен $15 млрд сатылым жасайды және Global Taste Elevation Co. деген атау алды. Ол жаһандық соус пен дайын өнім нарығына шоғырланып, Heinz (кетчуп пен соустар), Philadelphia (крем-сыр) және Kraft Mac & Cheese (ірімшік қосылған макарон) брендтерін біріктіреді.
«Біздің брендтеріміз культтік әрі сүйікті, бірақ компанияның күрделі құрылымы капиталды тиімді бөлуге, басымдықтарды айқындауға және ең перспектив бағыттарда дамуға кедергі келтіреді», — деді Kraft Heinz директорлар кеңесінің атқарушы төрағасы Мигель Патрисиу.
Компания бөліну процесін 2026 жылдың екінші жартысында аяқтаймыз деп күтеді.
Kraft Heinz акциясы 2 қыркүйектегі саудада шамамен 6% түсіп, $26,21 болды. Бұл — шілденің ортасынан бергі минимум. 2025 жылдың басымен салыстырғанда қағаз 14%-дан астам минуста.
Баффет «ренжулі»
Миллиардер әрі Berkshire Hathaway компаниясын басқаратын Уоррен Баффет CNBC-ге Kraft Heinz хабарламасына «ренжігенін» айтты. Компанияның шешімі Баффет 2015 жылы Kraft пен Heinz-ті біріктіруді ұйымдастырғанда көздеген көптеген жетістікті жоққа шығарады, деп жазады телеарна. Berkshire Hathaway Kraft Heinz-тің ең ірі акционері және компанияның 27,5% акциясына ие.
Баффет CNBC-ге берген сұхбатында екі бизнестің он жылдан кейінгі бірігуі жарқын идея болып көрінбейтінін, бірақ бөліну де компания проблемаларын шешпейтінін айтты. Оның сөзінше, Berkshire-тің болашақ басшысы Грег Абель де Kraft Heinz шешіміне реніш білдірген.
Kraft Heinz-ке инвестор ретінде Berkshire-тің болашағына қатысты Баффет, компания әрқашан өз мүддесіне сай әрекет ететінін атап өтті. Егер оған акцияны сатуға ұсыныс түссе, ол басқа акционерлерге де сондай шарт ұсынылмаса, ірі мәмілеге келіспейтінін қосты. Kraft Heinz CNBC-нің Баффет ұстанымына қатысты сауалына жауап бермеді.
Kraft Heinz неге бөлініп жатыр?
Компанияның бас директорының айтуынша, конгломерат қазір 55 категорияда және 150-ден астам елде шамамен 200 брендті басқарып отыр, бұл олардың әрқайсына толыққанды инвестиция салуды мүмкін етпейді. Бөліну солтүстік америкалық базалық өнімдер бөлімшесіне тар нарыққа шоғырланып, бұрын басымдық берілмеген «үй жанындағы дүкендер» секілді сату арналарына көңіл бөлуге мүмкіндік береді, деп жазады WSJ.
Күтіліп отырғандай, екі компанияда да органикалық даму, акционерлерге капитал қайтару және стратегиялық мәмілелерді қарастыру үшін ағымдағы еркін ақша ағымы жеткілікті болады. Жалпы алғанда, ағымдағы дивиденд деңгейі сақталады деп болжануда. Басшылық екі компания үшін де инвестициялық рейтингке сай құрылымдарды құруды жоспарлап отыр, делінген компанияның пресс-релизінде.
«Біз әр брендтің әлеуетін ашып, тиімділікті арттыру үшін қажетті назар мен ресурсты бөле аламыз», — деді Патрисиу.
Сарапшылар пікірі
Бұл мәміле Баффет пен бразилиялық инвестициялық фирма 3G Capital Partners ұйымдастырған 2015 жылғы сәтсіз бірігудің нәтижесін жоққа шығарады, деп жазады The Wall Street Journal.
TD Cowen сарапшысы Роберт Москoудың айтуынша, азық-түлік саласындағы мегабірігу сирек жағдайда табысты болады. Оның сөзінше, әртүрлі азық-түлік ретейл сегменттерінде табысқа жету үшін қажет дағдылар мен инвестициялар қатты ерекшеленеді, ал тар портфелі бар компаниялар ұзақмерзімді перспективада әртараптандырылған ойыншыларға қарағанда табысқа көбірек мүмкіндікке ие.
«Азық-түлік өндірушілері супермаркеттерде кеңінен қамтылу оларға әрдайым күткен артықшылық әкелмейтінін көзі жетті», — деді Москoу.
Сонымен бірге Kraft Heinz-ті екі компанияға бөлу қиын болуы мүмкін. Москoу компания бірыңғай операциялық модель құрып, Microsoft пен Google-пен серіктестік жасағанын, енді оларды бұзу керегін еске салды. Бұдан бөлек, бірнеше жыл бұрын 3G Capital өндірістік қуаттарды жауып, дистрибуциялық орталықтарды біріктірген, бұл да процесті қиындатады.
Kraft Heinz-тың ахуалы
Шілде айында Kraft Heinz екінші тоқсандағы $9,3 млрд актив құнын ақшалай емес есептен шығарумен байланысты шығын туралы хабарлады. Бұған акция бағасы мен капитализациясының тұрақты төмендеуі себеп болған.
Сатылымды қолдау үшін Kraft Heinz жақында бірнеше қадам жасады: бес адамдық отбасыға арналған, бағасы $2-дан төмен ірімшік қосылған макаронның үлкейтілген қорабын шығарды, сондай-ақ Lunchables құрамындағы печенье мен крекерді жақсартты. Шілдеде компания биыл шығындардың 5–7% өсуін күтетінін, бірақ оның тек бір бөлігін ғана тұтынушыларға жүктейтінін мәлімдеді.
Мамырда Kraft Heinz акционерлер үшін құндылықты арттыру мақсатында бірігу мен жұтылу мүмкіндіктерін қарастырып жатқанын хабарлады. Reuters-тің жазуынша, қаптамаланған өнім өндірушілер сияқты компания да тұтынушылардың барған сайын пайдалы әрі қолжетімді соус пен снэктерді көбірек таңдауынан қысымға түсіп отыр.
Компанияны бөлу азық-түлік индустриясы мен сусындар саласындағы трендке сәйкес келеді. Мысалы, 2023 жылы Kellogg екі компанияға бөлінді: снэк өндіретін алып Kellanova және солтүстік америкалық таңғы ас бизнесі WK Kellogg. Бұдан бөлек, Keurig Dr Pepper 2018 жылғы кофе өндіруші мен сусын компаниясын біріктірген мәміледен ажырау процесін бастады.
