«Бір тарақан — үрдіс емес»: Moody’s банктердің нашар несиелерінен неге алаңдамайды?
Moody’s Ratings агенттігі орта деңгейлі банктердегі несие сапасына қатысты инвесторлардың алаңдаушылығына қарамастан, АҚШ-та жүйелі дағдарыс қаупі жоқ деп есептейді. Кейінгі күндері Zions Bancorp пен Western Alliance Bancorp екі ірі қарыз алушының банкрот болуына байланысты проблемалық несиелер жайлы хабарлаған соң, америкалық акциялар қысымға түсті. Алайда бұл дүрбелең ұзаққа созылмады.
Егжей-тегжейі
Moody’s Ratings агенттігінің жеке несиелер жөніндегі жаһандық бағытының жетекшісі Марк Пинто CNBC-ге берген сұхбатында банк жүйесінде кең тараған тәуекел белгілері байқалмайтынын айтты. Дегенмен, ол соңғы уақытта несиелеу талаптарының босаңсығанына және банктердің қарыз алушыларға тым жеңіл талап қоюына байланысты алаңдаушылық бар екенін мойындады.
«Нарық қазір кредиттік циклдің бұрылу сәтін іздеп отыр, бірақ біз оған дәлел таппадық. Қазіргі көрсеткіштерге қарасақ, актив сапасының төмендеуі өте аз», — деді Пинто.
Инвесторларды не мазалайды?
16 қазанда АҚШ нарығында акциялар күрт арзандады. Бұған Zions Bancorp пен Western Alliance Bancorp банктерінің автонесиелерге қатысты шығындарын хабарлауы себеп болды. Бұл жағдай инвестициялық банк Jefferies акцияларын да төмендетті. Ол да автокөлік өндіруші First Brands компаниясының банкрот болуына байланысты тәуекелге ұшырағанын мәлімдеген еді.
Инвесторлар мәселе ауқымды болуы мүмкін деп қорықты. JPMorgan Chase басшысы Джейми Даймон: «Егер бір тарақанды көрсеңіз — онда олардың көбі бар шығар», — деп сипаттады. Ал Moody’s өкілі Пинто оған жауап ретінде: «Бір тарақан — тенденция емес», — деді.
Fundstrat негізін қалаушы Том Ли банктердің акцияларының құлдырауын түсіндіріп, Silicon Valley Bank оқиғасынан кейін инвесторлар жүйелік тәуекелден қорқатынын атап өтті.
АҚШ банк жүйесі тұрақты ма?
Том Ли жоғары табысты облигациялар нарығының сабырлы реакциясын атап өтті. Спрэдтер сәуірдегі ең жоғары деңгейден едәуір төмен. Бұл, оның айтуынша, компаниялардың негізгі көрсеткіштері тұрақты екенін білдіреді.
Пинтоның айтуынша, жоғары табысты облигациялар бойынша дефолт деңгейі биыл 5%-дан төмен және 2026 жылға қарай 3%-дан да азаюы мүмкін. Ал 2008 жылғы дағдарыс кезінде бұл көрсеткіш екі таңбалы болған.
Ол АҚШ экономикасының күткендегіден мықты екенін де айтты. Жұмыс нарығындағы әлсіздік пен баж салығының инфляцияға әсері туралы алаңдаушылыққа қарамастан, экономикалық өсім тұрақты. Пинто CNBC-ге: «Биылғы банк конференциясында жиі естіген сөзім — “тұрақтылық”», — деді.
«ЖІӨ өсімі мен пайыздық мөлшерлеменің төмендеуін ескерсек, қазіргі несие сапасы жақсы деңгейде және одан әрі жақсара алады», — деп қосты ол.
Уолл-стрит банктерге қолдау білдірді
Zions Bancorp банкі екі проблемалық несиеге байланысты 50 млн доллар шығынға ұшырағанын хабарлаған соң, оның акциялары бейсенбіде 13%-ға төмендеді. Бірақ жұма күні Baird банктің рейтингін «бейтараптан» «нарықтан жоғары» деңгейге көтерді. Банктің мақсатты бағасы 65 доллар деп белгіленді. Бұл бейсенбі күнгі жабылу бағасынан 39%-ға жоғары.
Baird сарапшысы Дэвид Джорджтың пікірінше, банктің капитализациясының 1 млрд доллардан астамға төмендеуі шамадан тыс реакция. «Бұл дүрбелең акцияны тиімді бағамен алу мүмкіндігін туғызды», — деді ол.
Jefferies акциялары кейінгі айда 23%-ға арзандады, бірақ Oppenheimer сарапшылары оларды ұзақ мерзімді инвестициялық мүмкіндік деп бағалады. Компания рейтингін «бейтараптан» «жоғары нарық» деңгейіне көтеріп, мақсатты бағаны 81 доллар деп белгіледі. Бұл қазіргі бағадан 66% жоғары. Аналитиктер мұндай шешімді Jefferies инвесторлар күні ұсынған сенімді есебімен түсіндірді, ол First Brands банкротына қатысты алаңдаушылықты азайтқан.
