Bit Digital акциялары шарықтады: еншілес компаниясы IPO өткізуді жоспарлап отыр
Bitcoin өндіруші Bit Digital компаниясының акциялары 16 шілдеде 19%-дан астам өсіп, қомақты серпіліс көрсетті. Себебі — оның жасанды интеллект (ЖИ) саласына арналған инфрақұрылым құрылысына жауапты еншілес компаниясы WhiteFiber Nasdaq биржасында жеке IPO өткізбекші, деп хабарлады компанияның өзі.
Егжей-тегжейлі
Bit Digital акциялары сәрсенбі, 16 шілдеде 19%-дан астам өсіп, бір қағаз үшін $3,93 бағасына жетті. 17 шілдедегі таңғы саудада олар өсуді жалғастырып, алғашқы сағатта 6%-дан астам қосты.
Инвесторлардың мұндай реакциясына себеп — Bit Digital-дың еншілес құрылымы WhiteFiber АҚШ-тың Бағалы қағаздар және биржалар жөніндегі комиссиясына (SEC) IPO өткізу туралы өтінім бергені болды. Қанша акция орналастырылатыны және олардың бағасы әзірге нақты белгісіз, делінген аналық компания таратқан хабарламада.
Bit Digital мен оның еншілес құрылымы туралы не белгілі
Bit Digital 2015 жылы құрылған. Бастапқыда ол тек биткоин өндірумен айналысқан. Алайда 2023 жылдың соңында компания стратегиясын өзгертіп, жеке деректер орталығын құруға шешім қабылдады. Ол үшін Nvidia чиптерін сатып алып, өз есептеу қуатын басқа компанияларға жалға бере бастады.
Бір жылдан кейін Bit Digital канадалық деректер орталығын салумен айналысатын Enovum компаниясын шамамен 62,8 млн канадалық долларға (шамамен $46 млн) сатып алды. Дәл осы бизнесті компания WhiteFiber деп атады.
Компанияның айтуынша 2024 жыл – бетбұрыс жылы болды. Өткен жыл қорытындысы бойынша компания кірісі 141%-ға өсіп, $108,1 млн-ға жетті. Оның ішінде шамамен жартысы жаңа бағыттарға тиесілі болған.
Осы есеп шыққаннан кейін Noble Capital Markets компания акцияларына арналған мақсатты бағасын $5,5 деңгейінде қалдырды. Бұл — сол кездегі нарықтағы бағаға қарағанда 2,5 есе жоғары көрсеткіш.
Маусым айының соңында Bit Digital жаңа өзгерістер туралы жариялады: компания енді Ethereum активтерімен жұмыс істеуге және стейкингке басымдық беретінін айтты. Осыған байланысты компания биткойн майнингіне қатысты операцияларына стратегиялық балама іздей бастады. Бұл операцияларды сату немесе толық тоқтату ықтималдығы жоғары, делінген ресми хабарламада. Бұл жаңалық жарияланған 26 маусымда Bit Digital акциялары 15%-дан астам төмендеді.
Акциялар жағдайы
Жыл басынан бері Bit Digital акциялары 34% өсім көрсетті. MarketWatch порталының мәліметінше Уолл-стриттің алты аналитигі бұл қағаздарға сатып алу рейтингін берген. Орташа мақсатты баға — $6,08, бұл соңғы жабылу бағасына қарағанда шамамен 55% өсу әлеуеті бар екенін көрсетеді.
