Black Rock Coffee Bar-дың IPO-сы: «Дөңгелекті кофе» желісінің акциялары саудаға түсті
Black Rock Coffee Bar кофеханалар желісінің акцияларымен алдын ала сауда Freedom клиенттері үшін сауда жүйесінде басталды. Бұл орналастыру – IPO нарығының жандану аясында, технологиялық компаниялардың үстемдігі жағдайында, тұтынушылық сектордан шыққан компанияның биржаға шығуының сирек кездесетін мысалы болды. 12 қыркүйекте кешірек бұл қағаздар Nasdaq биржасында BRCB.US тикерімен саудалана бастайды.
Егжей-тегжейлі
Аризона штатындағы Black Rock Coffee Bar кофеханалар желісі IPO нәтижесінде $294,1 млн тартты. Компания 14,7 млн акцияны бір қағазға $20 бағамен орналастырды, бұл бастапқы жарияланған $16–18 баға диапазонынан жоғары. Орналастыру нәтижесінде компанияның нарықтық құны $956,3 млн деп бағаланды, деп хабарлайды Bloomberg.
Мәміленің ұйымдастырушылары ретінде JPMorgan, Jefferies, Morgan Stanley, Baird, Stifel, William Blair және Raymond James әрекет етті.
Black Rock Coffee Bar umbrella partnership C-corporation (Up-C) құрылымын пайдаланады. Бұл дегеніміз, инвесторлар жаңа холдинг (C-corp) акцияларын сатып алады, ол IPO-дан түскен қаражатты кофеханалар желісін басқаратын операциялық компаниядағы (LLC) үлестерді сатып алуға бағыттайды. LLC бұл қаражатты қарыздарды жабуға және операциялық шығындарды өтеуге пайдаланады. Мұндай модель қазіргі иелерге салықтық жеңілдіктерді сақтауға мүмкіндік береді, деп нақтылайды Daily Coffee News.
Компания несімен қызықты
Black Rock Coffee Bar эспрессо негізіндегі сусындар, нитро-кофе (азотпен байытылған суық қайнатылған кофе), хош иістендірілген кофе және энергетикалық сусындар ұсынады. Компания 2008 жылы Орегон штаты, Бивертон қаласындағы 15 шаршы метрлік киосктен басталған, тек drive-thru форматында жұмыс істеген (автокөліктен шықпай тапсырыс беріп, алып кететін терезе). 2025 жылғы 30 маусымдағы жағдай бойынша желі Аризона, Калифорния, Колорадо, Айдахо, Орегон, Техас және Вашингтон штаттарында 158 жеке кофеханадан тұрады (drive-thru және залдары бар форматтар).
Кофеханалар екі Black Rock қуыру фабрикасынан жеткізіледі, олар Орегондағы Портленд пен Вашингтондағы Ванкувер қалаларында орналасқан. Компанияның табысының 72%-ы дәл осы drive-thru форматынан түседі. Сонымен қатар, ұйым залдары бар кофеханаларға да мән беріп отыр және цифрлық арналарды, соның ішінде қазірдің өзінде транзакциялардың 15%-ын қамтамасыз ететін адалдық бағдарламасын дамытып жатыр.
IPO-ға арналған презентацияда компания 30 маусымға дейінгі 6 айдағы жиынтық табысы 24%-ға өсіп, $95 млн-ға жеткенін, ал салыстырмалы сатылымдар 10,1%-ға артқанын жариялады. Таза шығын 2024 жылдың соңындағы $7 млн-нан 2025 жылдың бірінші жартысында $2 млн-ға дейін азайған.
Компания 2025 жылы 30 жаңа кофехана ашуды және жыл сайын шамамен 20%-ға өсуді, 2035 жылға дейін 1000 нүктеге жетуді жоспарлап отыр.
«Біз ұзақмерзімді өсудің бастапқы кезеңіндеміз және бар аймақтарда да, жаңа нарықтарда да үлкен әлеуетіміз бар», — делінген компанияның проспектісінде.
Компания тәуекелдері
Кофе дәндерінің негізгі жеткізілімі Бразилия, Эфиопия, Колумбия және Мексикадан келеді. Black Rock Coffee Bar арабика, сүт өнімдері және басқа да шикізат бағасының өсуі немесе жеткізілімінің қысқаруы бизнеске кері әсер етуі мүмкін екенін ескертеді, деп жазады Reuters.
2025 жылы Бразилия мен Вьетнамдағы құрғақшылыққа және АҚШ-тың бразилиялық кофе дәндеріне 50%-дық баж енгізу шешіміне байланысты кофе бағасы рекордтық деңгейге жетті. Болашақта компания кедендік баждардың ең көп әсері тоңазытқыш жабдықтар, эспрессо-машиналар және кофе дәндерінің өздеріне тиетініне сенеді.
Сарапшылар не дейді
Black Rock Coffee IPO нәтижелері компанияның соңғы 12 айдағы табысына ($179,4 млн) және саланың орташа капитализация/сатылым көрсеткішіне (P/S = 5,33) негізделген әділ бағалауға сай келеді, деп жазады Freedom аналитигі Әлем Бектеміров. Оның айтуынша компания акциялары үшін мақсатты баға қосымша өсім әлеуетін болжамайды. Негізгі тәуекел ретінде Бектеміров нарықтағы түрлі компаниялармен болатын бәсекелестікті атады.
Black Rock Coffee Bar белсенді түрде кеңейіп, кофеханалардан түсетін табыс пен операциялық кірісті арттырып жатыр, сонымен қатар мекеме деңгейіндегі тұрақты экономиканы және әкімшілік шығындарды сақтап отыр, дейді IPO Edge инвестициялық тобының жетекшісі Донован Джонс.
Barchart аналитиктері компанияның қатты бәсекелестік жағдайында жұмыс істеп жатқанын атап өтуде. Бұл сегментте Starbucks, Dunkin', Tim Hortons, Scooter’s Coffee, Peet’s Coffee және Dutch Bros секілді ірі ойыншылар бар. Сондай-ақ, макроэкономикалық факторлар да жағдайды қиындатып отыр. Тамыз айындағы жұмыс орындарының күткеннен баяу өсуі тұтынушылық шығындардың төмендеуіне әкелуі мүмкін.
Дегенмен, Black Rock Coffee тұрақты, жарылғыш болмаса да, өсімді көрсетіп отыр, бұл әрі қарай кеңею үшін сенімді база құрайды, дейді сарапшылар.
Контекст
Бұл орналастыру 2023 жылы корейлік Gen Korean BBQ мейрамханалар желісінің биржаға шыққанынан бері ресторан саласындағы алғашқы IPO екенін жазады Restaurant Business. Сол жылы fast-casual форматындағы Cava желісі де нарыққа шыққан болатын. Құбылмалы қор нарығы мен экономиканың белгісіздігі салдарынан соңғы жылдары тұтынушылық компаниялардың орналастырылымдары сирек болып келеді. 2021 жылғы ресторандық IPO толқынынан кейін инфляция бұл нарықты дерлік «тоқтатып» тастаған.
Дәл осы тұрақсыздық көптеген компанияларды биржаға шығудан тоқтатты — мысалы, Panera Brands желісі. Black Rock Coffee Bar-дың листингі АҚШ-та drive-thru форматындағы кофеханалар нарығының қарқынды дамуына және тұтынушылық нарыққа деген инвесторлардың сенімінің артуын көрсетеді, деп атап өтеді World Coffee Portal.
World Coffee Portal Project Café USA 2025 есебіне сәйкес, саланың 82% көшбасшысы АҚШ-та брендтелген кофеханалардың өсу әлеуетін жоғары деп бағалайды, ал 30%-ы drive-thru-ды нарықтағы ең маңызды трендтердің бірі деп санайды. Тұтынушылар арасында бұл формат та танымал: 27% соңғы тапсырысын осы форматта жасаған, ал жартысынан көбі кофеханаға кіргеннен гөрі оны артық көреді.
Сегменттің көшбасшысы — Dutch Bros, 2021 жылы $5 млрд бағамен биржаға шығып, нүктелер санын 1040-тан асырған.
Freedom клиенттері Black Rock Coffee Bar акцияларына негізгі биржа сессиясы ашылғанға дейін қол жеткізе алады. Сауда АҚШ биржалары ашылғанға дейін 2–3 сағат бұрын, ерте премаркет форматында басталады (Астана уақыты бойынша 15:30–16:30). Қатысу үшін BRCB.US тикеріне басыңыз.
