Boeing ең танымал ұшағын жинауда межеге жақындады. Бұл акциялар үшін нені білдіреді?
Boeing әуеөнеркәсіп концерні 737 Max ұшағының өндіріс көлемін айына 38 данаға дейін жеткізуге жақындап қалды — бұл АҚШ билігі рұқсат еткен ең жоғарғы шек. Бұл — инвесторлар мен клиенттер үшін маңызды белгі: компания қиындықтар мен сәтсіздіктерге толы өткен жылдан кейін қалпына келуге жақын. Инвесторлар бұл өзгерісті оң қабылдады: қарашадағы ең төменгі көрсеткіштен бері Boeing акциялары шамамен 50%-ға қымбаттаса, сарапшылардың орташа мақсатты бағасы 20% өсті.
Егжей-тегжейлі
Boeing өз клиенттеріне 737 Max ұшағының өндіріс қарқынын айына 38 данаға дейін жеткізуге жақындап қалғанын мәлімдеді, деп хабарлайды Bloomberg. Бұл — ұшу кезінде есік тығыны түсіп қалған оқиғадан кейін АҚШ-тың авиациялық реттеушісі (FAA) белгілеген шекті деңгей. Air Lease компаниясының басшысы Джон Плюгердің айтуынша, Boeing 737 Max ұшағын құрастыру желілерінің жүктемесін арттырып жатыр. Басқа бір клиенттің мәліметінше, Boeing-тің жеткізушісі Spirit AeroSystems аптасына шамамен тоғыз фюзеляж жеткізуде, бұл айына шамамен 36 данаға тең.
Boeing бас директоры Келли Ортбергтің айтуынша, компания 737 Max ұшағының өндірісін жыл ортасына дейін айына 38 данаға жеткізіп, бірнеше ай бойы осы деңгейде ұстап тұруды, содан кейін FAA-дан өндіріс көлемін 42 ұшаққа дейін рұқсат сұрауды жоспарлап отыр. Бұдан кейін өндіріс көлемі жарты жыл сайын ұлғайтылады деп есептеуде. Ортберг сәуір айында жасаған мәлімдемесінде: «737 Max өндірісінің өсуі – компанияның ақшалай ағындарын арттырудағы негізгі фактор», – деп атап өтті. Сол кезде өндіріс қарқыны айына 30-дан сәл ғана асқан болатын.
Boeing өндіріс жоспарына қатысты Bloomberg агенттігіне пікір білдіруден бас тартты. Spirit компаниясы да түсініктеме берген жоқ.
Инвестор үшін нені білдіреді?
Boeing-тің өндірістік алаңдарындағы құрастыру үдерісін тұрақты әрі болжамды деңгейге қайтару жолындағы кез келген алға жылжу — компания клиенттері, реттеушілер және инвесторлар үшін маңызды белгі, Bloomberg. Boeing өз бетінше құрастыру қауіпсіздігін бақылауға және ақаусыз ұшақ шығаруға қабілетті екенін дәлелдеуге тырысуда. The Wall Street Journal атап өткендей, сәрсенбі күні жарияланған жыл сайынғы қауіпсіздік есебінде компания өткен жылы орын алған 737 Max оқиғасынан кейін ішкі бақылау жүйесін күшейткенін мәлімдеген.
Уолл-стриттегі инвесторлар мен сарапшылар Boeing акцияларына сеніммен қарай бастады: қарашадағы ең төменгі деңгейден бері бағалы қағаздар шамамен 50%-ға қымбаттады, ал сарапшылардың ортақ баға болжамы бір акция үшін $178-ден $209-ға дейін өсті, деп жазады Barron’s.
Осы аптада Bernstein сарапшысы Дуглас Харнед Boeing болжамын $218-ден $249-ға дейін көтеріп, «сатып алуға кеңес» (Overweight) рейтингін растады. Оның айтуынша, компания котировкалары тағы 20%-дан астамға өсуі мүмкін. Бұған Қытайға жеткізілімнің қайта жандануы, Qatar Airways-пен жалпы құны $200 млрд-тан асатын 210 кең фюзеляжды ұшаққа жасалған келісім және сауда тәуекелдерінің азаюы әсер етеді. Харнед Boeing-тің бұған дейінгі қиындықтарын мойындағанымен, қазіргі жағдайда компания қағаздарына ие болмау — оларды ұстағаннан да үлкен тәуекел деп есептейді.
Boeing бас директоры «компания тарихындағы ең ірі келісім» деп атаған Qatar Airways-пен жасалған мәміледен кейін Morgan Stanley, Susquehanna және Wolfe Research секілді өзге де инвестбанк өкілдері компания акцияларына қатысты мақсатты бағаны көтерді.
Акциялардың жай-күйі
21 мамырдағы сауда қорытындысы бойынша Boeing котировкалары 2,15% төмендеді. Соған қарамастан, 2025 жылдың басымен салыстырғанда компания қағаздары шамамен 15% өсімде. Салыстырмалы түрде алғанда, АҚШ-тың негізгі қор индексі S&P 500 дәл осы кезеңде 0,6% төмендеген.
MarketWatch деректеріне сүйенсек, Boeing акцияларының динамикасын барлығы 32 сарапшы бақылауда: олардың 21-і бағалы қағаздарды сатып алуға (Buy және Overweight), 10 сарапшы — портфельде ұстауға (Hold), ал тек 1-еуі сатуға кеңес берген.
