BofA S&P 500 индексі енді тек 1% өседі деп болжады. Неге раллидің жалғасуын күтпейді?
Bank of America S&P 500 индексіне қатысты болжамын 6300 пунктке дейін көтерді, бірақ бұдан әрі айтарлықтай өсім күтпейді. Инвестбанктың пікірінше, АҚШ қор нарығы қарқынды өсіп жатқанына қарамастан, қазіргі деңгейден ары қарай өсу әлеуеті шектеулі, өйткені экономикалық өсімді қолдайтын нақты драйверлер жоқ. Осы аптада S&P 500 индексіне болжамын Goldman Sachs та көтерді.
Егжей-тегжейлі
BofA стратегиясының жетекшісі Савита Субраманиан 2025 жылдың соңына қарай S&P 500 индексі бойынша мақсатты деңгейін 5600-ден 6300 пунктке дейін көтерді, деп хабарлайды CNBC. Бірақ бұл көрсеткіш 6 225,52 пунктпен аяқталған сейсенбідегі сауда деңгейінен небәрі 1,2% ғана өсімді білдіреді.
«Үшінші тоқсанда S&P 500 индексінің бұдан әрі күрт өсуіне себеп болатын нақты драйверді атау қиын», — деп жазды Субраманиан CNBC келтірген сараптамасында. Оның айтуынша, бес түрлі бағалау моделінің ішінен ең өзектісі – EPS Surprise (нақты пайда мен күтілетін пайда арасындағы айырмашылыққа негізделген модель) шамалы әрі түсініксіз белгі беріп отыр.
Сарапшы атап өткендей, сәуір–мамыр айларында теріс болған пайдаға қатысты болжамдар қазір орташа деңгейге оралды, алайда соңғы экономикалық мәліметтер көңіл көншітпейді. Оның ойынша, корпоративтік пайданың негізгі көзі — технологиялық компаниялардың кірістері — баяулау қаупімен бетпе-бет. Сонымен бірге, сауда келісімдері мен «үлкен әрі керемет» заң қабылданғанына және рецессия қаупі төмендегеніне қарамастан, саясаттағы белгісіздік өте жоғары күйінде қалуда, деп жазады Субраманиан. Бірақ бизнес ашықтығы жоғары деңгейде сақталып отыр.
«Көптеген компаниялар пайдаға қатысты болжамдарын жариялауды жалғастырып жатыр, ал бір акцияға шаққандағы пайда бойынша бағалаулардың айырмашылығы (бұл белгісіздіктің көрсеткіші) COVID кезінен бергі минимумға жақындады», — деп қосты сарапшы.
Субраманианның жаңа болжамы — 6300 пункт, ол CNBC жүргізген сауалнамадағы орташа (консенсус) деңгей — 6243 пункттен сәл жоғары. Бұған дейін Субраманиан мен Evercore ISI сарапшысы Джулиан Эмануэль нарықтағы ең төмен болжам берген сарапшылардың қатарында болған, деп жазады CNBC. Уолл-стриттегі сарапшылар сәуірдегі баж салығына қатысты алаңдаушылықтардан кейін болған құлдыраудан соң АҚШ нарығының ралли көрсетуіне байланысты болжамдарын қайта көтеріп жатыр.
«Америка мемлекет ретінде бірегей болмауы мүмкін, бірақ корпоративтік Америка – әбден мүмкін», — деп атап өтті Субраманиан.
Басқалар не дейді?
BofA сарапшысы Майкл Хартнетт 4 шілдеде инвесторларға S&P 500 индексі 6300 пункттен асса, пайданы бекіту ұсынды. Бұған дейін ол жазғы ралли мен Өкілдер палатасында салықты төмендетуді көздейтін $3,4 трлн бюджеттік пакеттің мақұлдануына байланысты нарықта «көпіршік» тәуекелдері артып жатқанын ескерткен болатын.
Goldman Sachs дүйсенбі күні АҚШ нарығына қатысты бағалауын қайта қарап, өсім болжамын көтерді: банкке сәйкес, S&P 500 индексі үш айда 3%, ал бір жылда 11% өсіп, тиісінше 6400 және 6900 пунктке жетуі мүмкін. Алты айлық болжам да 6100-ден 6600 пунктке көтерілді. Банк табыс өсімі бойынша болжамын өзгеріссіз қалдырды: 2025 және 2026 жылдары пайда 7% артады деп күтеді. Дегенмен, Goldman Sachs екінші тоқсанның есеп беру маусымы аяқталған соң жағдай жақсарып та, нашарлап та кетуі мүмкін екенін айтып, бұл болжам қайта қаралуы ықтимал екенін ескертті.
ФРЖ саясатының ертерек және тереңірек жұмсаруы, облигациялар кірістілігінің бұрынғы болжамнан төмен болуы, ірі компаниялардың іргелі қуатының сақталуы және инвесторлардың қысқа мерзімді пайда төмендеуіне аса мән бермеуі S&P 500 индексінің P/E көрсеткіші бойынша болжамды 20,4-тен 22-ге дейін қайта қарауға себеп болды, — деп атап өтті Goldman.
