BofA: S&P 500 сатылым сигналының шегінде тұр
S&P 500 индексінің рекордтық өсуі оны сатылым сигналы болуы мүмкін деңгейге жақындатты, деп мәлімдеді Bank of America стратегi Майкл Хартнетт. Оның айтуынша, нарықта әсіресе Трамптың «үлкен әрі керемет» салық және бюджет заңын қабылдағаннан кейін, көпіршік қаупі күшейіп келеді. Бұған дейін Goldman шілде айында S&P 500-дің раллиі жалғасып, тамызда баяулайтынын болжаған еді.
Егжей-тегжейлі
BofA сарапшысы Майкл Хартнетт инвесторларға S&P 500 индексі 6300 пункттен асып кетсе, пайдасын бекітуге кеңес берді. Бұл көрсеткіш бейсенбі күнгі жабылу деңгейінен небәрі 0,3% жоғары, деп хабарлады Bloomberg.
Хартнетт инвесторларға арналған жазбасында жазғы ралли мен Конгресте $3,4 трлн салықты төмендетуді көздейтін бюджеттің мақұлдануы нарықта көпіршік қаупін күшейтіп жатқанын ескертті.
«Нарықтар шамадан тыс қымбаттай береді, өйткені ашкөздікті жеңу қорқынышты жеңуден де қиын», — деді Хартнетт Bloomberg-ке.
Контекст
Бейсенбіде S&P 500 6279 пунктте жабылып, тарихтағы жаңа максимум болды. Nasdaq Composite те рекордтық деңгейге жетіп, 20 601 пунктке көтерілді.
АҚШ-тың экономикалық тұрақтылығы акциялардың өсуін қолдады: маусымда жұмыс орындарының саны күтуден асып өсті, ал жұмыссыздық деңгейі төмендеді. Мұндай күшті еңбек нарығы пайыздық мөлшерлемені төмендетуге кедергі болып, ФРЖ-ға кемінде қыркүйекке дейін күтуді негіздей алады. Бұл деректер нарықта алыпсатарлықты күшейтіп, технологиялық алыптар мен жасанды интеллектке қызығушылықты арттырды, деп жазды Bloomberg.
Сондай-ақ сауда саясатына қатысты жағдай инвесторлардың назарында. 9 шілдеде жоғары кедендік баж салығын енгізуге берілген жеңілдік мерзімі аяқталады. АҚШ президенті Дональд Трамп әкімшілігі жұмада сауда серіктестеріне біржақты кедендік баж туралы ескертулер жолдай бастайтынын айтты. Осы жаңалықтардан кейін 4 шілдеде таңертең АҚШ акцияларына арналған фьючерстер арзандады. Ал негізгі биржалар Тәуелсіздік күніне байланысты жабық болды.
Басқа да сарапшылар пікірі
Goldman Sachs 1 шілдедегі жазбасында S&P 500 индексі сәуірдегі минимумнан бері шамамен 25% өсіп, раллидің тағы бірнеше аптаға созылып, тамызда баяулайтынын болжады. Банк дерегінше, шілденің алғашқы екі аптасы әдетте жылдағы ең табысты кезең: соңғы 10 жылда 1–15 шілде аралығында S&P 500-дің орташа табысы 2,4% болған. Сонымен қатар алдағы бір айда ғаламдық нарықтарға $80 млрд-қа дейін қаржы құйылуы мүмкін. Алайда банк сарапшылары тамызда ралли қарқынын жоғалтып, баяулайды деп санайды, сондықтан клиенттеріне позицияларын опциондар арқылы хеджирлеуді ұсынды.
JPMorgan-ның трейдинг командасы да 30 маусымдағы жазбасында раллидің жақын уақытта жалғасуын күтетінін мәлімдеді.
«Біздіңше, нарық «бұқалық фазаға» өтті және жаңа тарихи максимумдарға жетуін күтеміз — әсіресе бюджет, салық және сауда келісімдері бойынша жағдай нақтыланған сайын, өйткені корпоративтік есеп беру маусымы алдында күтулер әлі де төмен», — деп жазды сарапшылар. Олардың айтуынша, қаржы және технология секторы есеп беру кезеңінде нарықты жоғарыға сүйреуі мүмкін. Ал 1 қыркүйекте, Еңбек күні қарсаңында Nvidia нәтижелерін жариялаған кезде, инвесторларды төртінші тоқсанға одан әрі жігерлендіруі тиіс.
