Booking акцияларының мақсатты бағасы бірден екі банкте өсті
Екі инвестбанк бірден Booking брондау сервисіне қатысты болжамдарын жақсартты. Компания акциялары биыл нарықтан қалып қойып отыр. Truist банкі тек мақсатты бағаны көтеріп қана қоймай, бір жылдан бері алғаш рет ұсынатын кеңесін «бейтараптан» «сатып алуға» ауыстырды. Банк пікірінше, Азиядағы туризмнің ұзақ мерзімді өсуі мен жаһандық экономиканың тұрақты қарқыны компания акцияларын 10%-дан артық қымбаттата алады. Инвесторлардың жасанды интеллекттің туризм саласына әсері жайлы алаңдауы асыра сілтеу деп санайды.
Егжей-тегжейі
Truist пен Gordon Haskett сарапшылары Booking акциялары бойынша мақсатты бағаларын көтерді. Truist мақсатын $5630-дан $5750-ге дейін өсірді. Бұл — 11,7% өсу мүмкіндігін білдіреді. Gordon Haskett $5310-нан $5680-ге дейін көтеріп, 10,4% өсім болатынын болжады.
Truist сонымен қатар компанияның рейтингін «бейтараптан» «сатып алуға» өзгертті, деп хабарлайды CNBC. Банк Booking акцияларын талдауды бір жыл бұрын бастаған.
Неге аналитиктер Booking туралы ойларын өзгертті?
Truist сарапшысы Грегори Миллердің айтуынша, Booking-тің табысын арттыру үшін қысқа және ұзақ мерзімді бірнеше бағыты бар. Бұл жайлы Investing басылымы жазады. Соңғы айда акция бағасы 7%-ға төмендеді, ал S&P 500 мен Nasdaq индекстері 2–3%-ға өсті.
«Әсіресе Оңтүстік және Оңтүстік-Шығыс Азия елдерінде әуе сапарларының жылына 7–9% артуы рейтингті көтерудегі негізгі факторлардың бірі болды», — деп жазды Миллер.
Сарапшылардың есебінше, Booking-тің Азиядағы үлесі пандемияға дейінгі 20%-дан 25%-ға дейін артқан. Миллер 2025–2027 жылдары жаһандық ЖІӨ өсімі шамамен 3% болады деп күтеді, ал Азияда бұл көрсеткіш 1–2 пайыздық пунктке жоғары. Ол ЖІӨ динамикасы уақыт өте келе туризмге деген сұраныспен тығыз байланысты екенін атап өтті.
Сонымен қатар, Truist сарапшысы инвесторлардың жасанды интеллекттің туризм саласындағы онлайн-сервистерге әсері туралы алаңдаушылығын тым асыра бағалайды деп есептейді. Оның айтуынша, бұл мәселе бойынша нақты бір ортақ пікір жоқ.
Акциялар бағасы қандай?
27 қазанда Booking акциялары 2%-ға жуық қымбаттады. Жыл басынан бері өсім — 5,5%. Ал S&P 500 индексі осы аралықта 16%-дан астам өсті.
Басқа сарапшылар не дейді?
Booking акцияларын бақылап отырған 40 сарапшының 26-сы оларды сатып алуға кеңес береді (Buy және Outperform рейтингтері). Қалған 14-і ұстауға кеңес береді.
Өткен аптада UBS «сатып алу» рейтингін растады және мақсатты бағаны $6743-ке дейін көтерді. Бұл шамамен 31% өсу мүмкіндігін білдіреді.
KeyBanc болса, 23 қазанда Booking акцияларын алғаш рет талдауға кірісіп, «сатып алу» (Overweight) рейтингін беріп, мақсатты бағаны $6450 деп белгіледі. Бұл акциялар бағасы 25,3%-ға өсуі мүмкін дегенді білдіреді.
