Нью-Йорктегі таң: инвесторлар оптимизммен әрекет етуде
Freedom Capital Markets Research директорының орынбасары Михаил Денисламовтың АҚШ қор нарығына арналған күнделікті шолу және болжамы.
Бүгіннен не күтеміз
Алдағы сауда сессиясында инвесторлардың назарында қыркүйек айындағы ұзақ мерзімде қолданылатын тауарларға берілген тапсырыстар деректері (Durable Goods Orders) болады. Консенсус-болжам жалпы индикатордың айлық өсімін 0,2% деңгейінде күтеді, ал тамызда көрсеткіш 2,9%-ға көтерілген еді. Сол сияқты, көлік секторын есептемегендегі көрсеткіш те орташа болжам бойынша 0,2%-ға өседі деп күтіледі. Егер нақты деректер болжамнан жоғары болса, бұл экономиканың тұрақтылығының белгісі ретінде қабылданады, ал әлсіз статистика монетарлық саясатты одан әрі жұмсартуға қосымша дәлел болмақ.
Даллас ФРБ-сы қазан айындағы іскерлік белсенділік индексін жариялайды (консенсус: -7,8 тармақ).
Аталған мәліметтер ФРЖ-ның сейсенбіде басталатын отырысы алдында ерекше маңызды болмақ.
Нарықтардағы позитивті көңіл-күй АҚШ пен Қытай арасындағы сауда келіссөздеріндегі прогреспен байланысты. Кореяда өткен саммит барысында екі ел көшбасшыларының командалары сауда келісімінің алдын ала шарттарын талқылауда келісімге келді, бұл 1 қарашадан бастап импорттық баждардың ұлғаюын болдырмайды. Бұл жаңалық жаһандық нарықтарда тәуекелге деген тәбетті қайта оятып, әсіресе Азия саудасында айқын көрінді: жапондық Nikkei 225 индексі дүйсенбі күні рекордтық деңгейге жетті. Пекин мен Вашингтон арасындағы келісімге қол қойылуы жаһандық жеткізу тізбектеріндегі көпжылдық белгісіздікті жойып, корпоративтік табыстар болжамын жақсартуға негіз болады, әсіресе технологиялық компаниялар, өнеркәсіптік алыптар және экспорттаушылар үшін.
Сауда ашылғанға дейін Keurig Dr Pepper (KDP) және Revvity (RVTY) компаниялары тоқсандық есептерін жариялайды. Негізгі сессия аяқталған соң есептерді Cadence Design Systems (CDNS), Welltower (WELL), NXP Semiconductors NV (NXPI), Waste Management (WM), Brown & Brown (BRO), F5 Networks (FFIV) және Rambus (RMBS) ұсынады.
АҚШ индекстерінің фьючерстері оң динамика көрсетіп отыр. Тәуекелдер тепе-теңдігін біз орташа құбылмалылықпен бірге қалыпты-позитивті деп бағалаймыз. S&P 500 индексінің 6780–6850 тармақ аралығында құбылуын күтеміз (алдыңғы сессия жабылу деңгейіне -0,2%-дан +0,9%-ға дейін).
Назарда
— SoftBank (SFTBY) OpenAI компаниясына соңғы инвестициялық пакетті бекітті — $22,5 млрд.
— Amazon (AMZN) алдағы үш жылда Нидерландтағы бизнесіне €1,4 млрд инвестиция салуды жоспарлап отыр. Қаражаттың бір бөлігі онлайн-ритейлер платформасында тауар сататын кәсіпкерлерге арналған жасанды интеллект сервистерін дамытуға бағытталады.
— HSBC (HSBC) Бернард Мэдоффтың қаржы пирамидасына қатысты сот шешіміне байланысты $1,1 млрд резерв құрылғанын хабарлады. Бұл қадам банктің негізгі капитал жеткіліктілігі көрсеткішіне (CET1) әсер етеді.
— Novartis (NVS) Avidity Biosciences (RNA) биотехкомпаниясын $12 млрд-қа ($72 акция үшін) сатып алуда. Бұл баға 24 қазандағы жабылу деңгейінен 46% жоғары. Мәміле Novartis компаниясының сирек кездесетін бұлшықет ауруларын емдеуге арналған препараттар портфелін күшейтеді.
— Toyota (TM) төртінші ай қатарынан жаһандық өндіріс көлемін ұлғайтты. Қыркүйекте бұл көрсеткіш жылдық салыстырмамен 11%-ға өсті. Негізгі өсім АҚШ нарығындағы жоғары сұраныспен байланысты: өндіріс көлемі 29%-ға, сатылымдар 14%-ға артқан.
Алдыңғы күнгі нарық
24 қазанда АҚШ биржаларындағы сауда төрт жетекші индекстің тарихи максимумдарын жаңартуымен аяқталды. S&P 500 — +0,79%, Nasdaq 100 — +1,04%, Dow Jones — +1,01%, Russell 2000 — +1,24%. Инфляцияның баяулағанын көрсеткен статистика нарық қатысушыларының оптимизмін күшейтті. Осының аясында технология секторы көш бастады (XLK: +1,55%), себебі бұл секторда «өсу акциялары» басым. Энергетика секторы керісінше әлсіз нәтиже көрсетті (XLE: -1,01%).
«Ғажайып жетіліктің» акциялары аралас динамика көрсетті. Ең белсенді сатып алулар Alphabet акцияларында тіркелді (GOOGL: +2,7%), ал Tesla бағалы қағаздары (TSLA: -3,4%) ең көп қысымға ұшырады.
Қыркүйектегі тұтыну бағалары индексі (CPI) айлық есепте 0,3%-ға, базалық көрсеткіш 0,2%-ға өсті, екі дерек те консенсустен 0,1%-ға төмен болды. Жылдық мәнде екі көрсеткіш те 3%-ды құрады (күтілген — 3,1%). Осыған байланысты жыл соңына дейін ФРЖ-ның пайыздық мөлшерлемені төмендету ықтималдығы артуда.
Қазан айындағы S&P Global құрастырған композиттік іскерлік белсенділік индексі (PMI) 54,8 тармаққа өсті (консенсус: 53,5). Өндірістік субиндекс — 52,2, қызмет көрсету секторы — 55,2 тармақты құрады (болжам тиісінше 52 және 53,5 еді). Алайда Мичиган университетінің тұтынушылық көңіл-күй финалдық бағалауы 54,5 деңгейіндегі күтулерден төмен болып, 53,6 тармақты құрады. Бұл инфляцияға байланысты алаңдаушылық сақталып отырғанын көрсетеді.
Компания жаңалықтары
— Comfort Systems USA (FIX: +19%) акциялары үшінші тоқсандағы мықты есептен кейін айтарлықтай көтерілді. Компания пайда және кіріс бойынша күтулерден асып түсіп, дивидендті 20%-ға арттырды. Тапсырыс портфелі $9,38 млрд-қа дейін кеңейді. Басшылық «теңдессіз сұранысты» атап өтті және екі жаңа сатып алуды жариялады.
— General Dynamics (GD: +2,7%) компаниясының аэроғарыш сегментіндегі сатылымдары үшінші тоқсанда жылдық көрсеткішпен 30%-ға өсті. Компания кіріс пен пайда бойынша консенсустен жоғары нәтижелер көрсетті. Басшылық бизнес-джеттерге жоғары сұранысты атап өтті.
— Alphabet (GOOGL: +2,7%) акциялары Anthropic жасанды интеллект стартапының Google TPU бұлттық чиптерін кеңінен қолдану жоспары туралы жаңалықтан кейін өсті. Ынтымақтастық аясында Anthropic 1 млн чипке және Google Cloud қызметтеріне қол жеткізеді.
— HCA Healthcare (HCA: +1,6%) түзетілген EBITDA және кіріс бойынша нарықтық күтілімдерді асырып түсіп, жылдық болжамын жақсартты. Аналитиктер компанияның көлемдердегі өсуін және шығындарды бақылауын оң бағалады.
— Illinois Tool Works (ITW: -4,5%) акцияларына үшінші тоқсандағы әлсіз нәтижелер қысым жасады. Әсіресе тағамдық жабдықтар мен өлшеу аспаптары сегменттері көңіл көншітпеді. Кіріс болжамды ақтамағанымен, компания жылдық guidance-ін растады.
