«Алаңдауға еш себеп жоқ»: АҚШ-тың үш негізгі индексі сауда күнін максимумда жапты
АҚШ-тың қор индекстері 24 қазан, жұма күні сауданы жаңа тарихи максимумда жапты. Инфляция бойынша қалыпты деректер инвесторлардың үмітін арттырды, яғни АҚШ Федералдық резерві алдағы аптадағы отырыста мөлшерлемені төмендету циклін жалғастырып, экономиканы қолдап және акциялардың жоғары бағасын ақтай алады деген сенім күшейді, деп жазды CNBC.
Егжей-тегжейлі
— 24 қазан күнгі саудада S&P 500 кең нарық индексі 0,8% өсіп, 6 791,7 пунктте жабылды, бұл жаңа рекорд. Апта қорытындысы бойынша индекс шамамен 2%, ал жыл басынан бері 15% өсті.
— Nasdaq Composite технологиялық индексі 1,15% көтеріліп, 23 204,9 пунктке жетті, бұл да оның ең жоғары көрсеткіші. Апта ішінде индекс шамамен 2,2%, ал жыл басынан бері 20% артты.
— Dow Jones Industrial Average индексі 1% өсіп, тарихта алғаш рет 47 000 пункттен жоғары — 47 207,12 пунктте жабылды. Апта қорытындысында Dow 2% плюсте.
— Russell 2000 кіші капитализациялы компаниялардың индексі 1,2% өсіп, 2 513,5 пунктке жетті. Апталық өсімі де шамамен осындай болды.
— Екі жылдық қазынашылық облигациялардың кірістілігі бір базистік пунктке төмендеп, 3,48% құрады.
Инвесторға оптимизмді не қайтарды?
АҚШ Еңбек статистикасы бюросы дерегінше, үкіметтің жұмысындағы үзіліске байланысты кешіккен тұтыну бағалары индексі (CPI) қыркүйекте 0,3% өсті, ал жылдық мәнде инфляция 3% құрады. Бұл көрсеткіш Dow Jones сауалнамасына қатысқан сарапшылардың болжамынан сәл төмен болды — олар 0,4% және 3,1% деп күткен. Азық-түлік пен энергия бағаларын қоспағандағы базалық инфляция айына 0,2%, ал жылдық мәнде 3% болып шықты, бұл да күткеннен төмен. Дегенмен CNBC атап өткендей, жылдық CPI алдыңғы аймен салыстырғанда аздап жеделдеген.
Статистика жарияланған соң, трейдерлер ФРЖ биылғы қалған екі отырыста да мөлшерлемені төмендетеді деген сенімді күшейтті. CME FedWatch құралының дерегі бойынша, желтоқсанда мөлшерлеме төмендейді деген ықтималдық 91%-дан 97%-ға күрт өсті. Келесі аптадағы төмендету ықтималдығы да 97% деңгейінде бағалануда.
ФРС саясатының жұмсаруы экономиканы қолдайды деген үміт банктер акциясының өсуіне ықпал етті: JPMorgan, Wells Fargo және Citigroup қағаздары 2% қымбаттады. Сондай-ақ, Goldman Sachs пен Bank of America акциясының бағасы да артты.
Сарапшылар пікірі
«Инфляция бойынша бейтарап есеп ФРЖ үшін алаңдауға еш себеп қалдырмады», — деді CNBC-ге Goldman Sachs Asset Management компаниясының мультисекторлық кіріс инвестициялары жөніндегі жетекшісі Линдси Роснер. Оның айтуынша, нарық ФРЖ келесі отырыста саясатын жұмсартады, ал желтоқсанда мөлшерлемені төмендету де ықтимал, себебі бағытты өзгертуге әсер ететін жаңа макроэкономикалық деректер жоқ.
Ал Glenmede компаниясының инвестициялық стратегия жөніндегі директоры Джейсон Прайдтің пікірінше, соңғы деректер инфляцияға қарағанда жұмыспен қамту тәуекелінің жоғары екенін көрсетіп отыр, сондықтан ФРС саясатының бағыты бұдан әрі де жұмсаруы ықтимал.
«ФРЖ еңбек нарығының әлсіреуіне көбірек назар аударатынын және инфляция нысаналы деңгейден жоғары болғанына қарамастан, толық жұмыспен қамтуды қамтамасыз ету жөніндегі мандатын сақтайтынын айқын көрсетті», — деді Bloomberg-ке B. Riley Wealth компаниясының бас нарықтық стратегы Арт Хоган.
eToro сарапшысы Бретт Кенвеллдің пікірінше, қазан айында мөлшерлемені төмендетуді тоқтату үшін шынымен күтпеген, «шок» есеп қажет болар еді, бірақ экономикалық деректердің тапшылығы жағдайында инвесторлар кез келген айқын белгіге сүйенеді. Ол сондай-ақ, биыл тағы екі мөлшерлеме төмендеуі болуы мүмкін екенін, алайда инфляцияның жоғары деңгейі жағдайында ФРЖ-ға саясатын агрессивті жұмсартуды ақтау қиын болатынын атап өтті — тек еңбек нарығында тұрақты және айтарлықтай әлсіреу байқалса ғана бұл мүмкін. «Қалай болғанда да, акциялар қалыпты инфляция жағдайында жақсы нәтижелер көрсете алады — мұны соңғы жылдары көрдік. Бұл үрдіс жалғасуы үшін мықты корпоративтік есептер қажет, ал қазіргі есеп беру маусымы әзірге күткенге сай болып отыр», — деді Кенвелл Bloomberg-ке.
Контекст
Нарықтар АҚШ президенті Дональд Трамптың Канадамен сауда келіссөздерін тоқтату туралы мәлімдемесін елемеді, деді CNBC. Трамптың мұндай шешіміне Онтарио провинциясы билігінің баж салығына қарсы жарнамада 1987 жылы бұрынғы президент Рональд Рейган айтқан сын сөзін пайдалану себеп болған. Трамп бұл видеоны «фейк» деп атады. Онтарио премьері Даг Форд жұма күні провинция демалыстан кейін жарнаманы тоқтататынын және АҚШ-пен сауда келіссөздерін қайта бастауға мүмкіндік беретінін мәлімдеді.
Келесі аптада инвесторлардың назары АҚШ президенті Дональд Трамп пен Қытай төрағасы Си Цзиньпиннің 30 қазанда өтетін кездесуінде болады. Нарықтар екі ірі экономиканың арасындағы шиеленіскен сауда дағдарысы жағдайында баж салығына қатысты келіссөздерде ілгерілеу болады деп күтуде. Жұма күні АҚШ әкімшілігі Қытайдың 2020 жылы Трамптың алғашқы мерзімінде жасалған шектеулі сауда келісімінің шарттарын орындап жатқанын анықтау үшін тергеу бастаған, деп хабарлады Bloomberg. Бұл Қытай тауарларына жаңа баж салығын енгізуге жол ашуы мүмкін. Сонымен қатар, Ақ үйдің Азия елдерімен экономикалық және стратегиялық маңызды минералдар саласында келісімдер жасау жоспары Пекинге қосымша қысым тудырып отыр, деді Bloomberg дереккөздері.
