BP акцияларды қайта сатып алуды тоқтатады. Арзан мұнай бағалары кезінде балансты нығайту үшін қаражат қажет

Британдық мұнай алпауыт компаниясы BP акцияларды қайта сатып алу бағдарламасын тоқтата тұрып, артық ақша ағынын компанияның балансын «жедел нығайтуға» бағыттайды, деп хабарлайды CNBC. Телеарна бұл әрекетті төмен мұнай бағасының қысымының белгісі деп есептейді.

 BP-дің IV тоқсандық есебіне сәйкес мұнай мен газ бағасының ауытқуын есепке алмайтын replacement cost әдісі бойынша базалық пайдасы жылдық есепте 31%-ға өсіп, $1,54 млрд болды. Бұл көрсеткіш LSEG жинаған сарапшылар болжамымен сәйкес келді (CNBC).

Ал 2025 жыл қорытындысы бойынша компанияның жалпы пайдасы 17%-ға төмендеп, $7,49 млрд болды және күтілген деңгейге жетпеді.  

«Біз төрт негізгі бағытта — ақша ағыны мен табыстылықты арттыру, шығындарды қысқарту және балансты нығайту — айтарлықтай ілгерілеуге қол жеткіздік, бірақ алда әлі де атқарылар жұмыс көп екенін және қойылған міндеттерді шұғыл орындау қажет екенін толық түсінеміз», — деді BP компаниясының бас директор міндетін атқарушы Кэрол Хоул.

Нәтижелер Еуропаның мұнай-газ саласы үшін қиын кезеңде жарияланды. Өткен жылы мұнай бағасы коронавирус пандемиясынан бері ең өткір жылдық төмендеуді тіркеді, бұл ішінара артық ұсынысқа қатысты алаңдаушылықтарға байланысты, деп хабарлайды CNBC. Қазіргі уақытта Brent фьючерстері барреліне 70 доллардан төмен, ал Солтүстік Американың WTI фьючерстері 65 доллардан төмен саудаланып жатыр.

BP-дің бәсекелестері — Equinor мен Shell — де өткен аптада нарық күткеннен әлсіз тоқсандық нәтижелерін жариялады. Компаниялар мұны мұнай бағасының төмендеуімен байланыстырды.

Equinor биыл акцияларды кері сатып алу бағдарламасын $5 млрд-тан $1,5 млрд-қа дейін қысқартатынын, сондай-ақ жаңартылатын және төмен көміртекті энергетика жобаларына инвестицияны азайтатынын мәлімдеді. Ал Shell buyback көлемін $3,5 млрд деңгейінде сақтап қалды (CNBC).