Citi 2026 жылдың соңында S&P 500 индексінен 13% өсім күтеді. Локомотиві кім?
Citigroup 2026 жылдың соңына қарай S&P 500 индексіне 7700 пункт деңгейінде мақсатты көрсеткіш белгіледі, бұл ағымдағы мәннен 12,8% өсім білдіреді. Сарапшылар жасанды интеллектке инвестиция жыл бойы негізгі тақырып болып қала береді деп күтеді, алайда назар «ЖИ шешімдерін жеткізушілерден оны қолданушыларға» ауысады — яғни ЖИ құралдарын бизнес-процестеріне тиімді енгізіп, өнімділігін арттыра алатын компанияларға, деп хабарлады Reuters.
Егжей-тегжейлі
Citigroup жұма күні, 12 желтоқсанда, жариялаған болжамында 2026 жылдың соңына қарай S&P 500 индексі 7700 пунктке жетуі тиіс екенін көрсетті. Сарапшылар бұл ұстанымын индекс құрамындағы компаниялардың корпоративтік пайдасының тұрақты өсуімен және жасанды интеллект саласына инвестицияның жалғасуымен түсіндірді.
Citi бағалауынша, ЖИ инфрақұрылымын дамыту 2026 жылы да негізгі тақырып болып қала береді, алайда назар ЖИ технологиясын әзірлейтін компаниялардан оны өз қызметіне енгізетіндерге ауысады. «ЖИ-ға деген қызығушылық сақталғанымен, даму “жеңімпаздар мен ұтылғандар” динамикасы бойынша жүреді», — деп атап өтті стратегтер.
MarketWatch жазуынша, сарапшылар инвесторларға кірістілік диапазонының кеңеюіне дайын болуды ұсынады: келесі жылы құнды акциялар, сондай-ақ циклдік және шағын компаниялар секторында оң динамика күтіледі. Ал өсу акциялары, оның ішінде бигтех компаниялар, кірістілік пен бағалауды сақтау үшін болжамдарды тұрақты түрде асыра орындап, бағаны көтеруді талап етеді, деп ескертті сарапшылар.
Citi есебіне сәйкес, 2026 жылдың соңына қарай S&P 500 индексіндегі бір акцияға шаққандағы пайда $320 болады. Бұл көрсеткіш консенсус-болжамнан жоғары, өйткені нарықтағы ортақ болжам шамамен $310 деңгейін меңзейді.
Сарапшылар қазіргі «бұқа» нарығы төртінші жылына аяқ басқандықтан, алда құбылмалылық кезеңдері болуы мүмкін екенін де ескертеді. Оптимистік сценарийде Citi S&P 500 индексі 2026 жылдың соңына қарай 8300 пунктке дейін көтеріледі, ал пессимистік жағдайда 5700 пунктке дейін төмендеуі мүмкін деп болжайды. Reuters атап өткендей, бұл бағалаулар Уолл-стриттегі ең «бұқалық» болжамдармен сәйкес келеді: Oppenheimer сарапшылары индекс келесі жылдың соңына қарай 8100 пунктке жетеді деп күтсе, UBS Global Wealth Management сарапшылары 2026 жылдың соңына 7700 пункт мақсатты көрсеткіш қойған.
Биыл S&P 500 индексі шамамен 16% өсті, нарықтық көпіршікке қатысты алаңдаушылық пен технологиялық компаниялардың жоғары бағалануына қарамастан, деп жазды Reuters. Citigroup бұл өсімді жасанды интеллектке қатысты инвесторлық оптимизммен, корпоративтік пайданың тұрақтылығымен және пайыздық мөлшерлемелердің төмендеуін күтуімен байланыстырады.
Уолл-стритте тағы қандай болжам бар?
Citigroup-тің S&P 500 бойынша 2026 жылға арналған күтулері Уолл-стриттегі өзге сарапшылардың оң болжамдарына қосылды. Oppenheimer Asset Management сарапшылары бенчмаркке 8100 пункт (+ағымдағы деңгейден 18%) деңгейінде ең жоғары мақсат қойды. Сондай-ақ, Deutsche Bank та оң болжам ұсынып, 2026 жылдың соңына қарай S&P 500 8000 пунктке жетеді деп күтеді. Goldman Sachs өсімді 7600 пунктке, ал JPMorgan базалық сценарийде 7500 пунктке дейін шектейді.
Көпшілік стратегтер Федералдық резерв жүйесі 2026 жылы пайыздық мөлшерлемелерді төмендетуді жалғастырады деп болжайды. Қарыз қаражатының арзандауы тарихи тұрғыда акциялардың бағалануын қолдап, корпоративтік қаржыландыру шарттарын жақсартады.
Reuters-тің қарашадағы сауалнамасы бойынша, сарапшылар АҚШ акциялары келесі жылдың соңына дейін орта есеппен шамамен 12% өседі деп күтеді. S&P 500 жұма күні, 12 желтоқсанда, 6827,41 пункт деңгейінде жабылды.
