CrowdStrike ЖИ-ға сұранысқа байланысты пайда болжамын жақсартты
Киберқауіпсіздікке арналған бағдарламалық жасақтама өндірушісі CrowdStrike 2026 қаржы жылына арналған пайда болжамын көтерді (қаржы жылы 31 қаңтарда аяқталады). Компания бұл өзгерісті жасанды интеллекті қолданатын өнімдерге сұраныстың тұрақты өсуімен түсіндірді. Енді CrowdStrike бір акцияға шаққандағы түзетілген пайданы $3,7–$3,72 деңгейінде күтеді. Бұл көрсеткіштің төменгі шегі алдыңғы болжамдағы $3,6-дан жоғарылағанын Bloomberg атап өтті.
Негізгі драйвер — Falcon платформасы
CrowdStrike жаңа клиенттерді тартуда негізгі рөлді атқарып отырған өнім ретінде Falcon платформасын атады.
«ЖИ-дан туындаған өсіп жатқан сұраныс бізге жақсы әсер етіп отыр. Клиенттер шешімдерді Falcon платформасында бір жерге біріктіріп жатыр. Осы үрдістің арқасында біз бұрын-соңды болмаған көлемде ықтимал келісімшарттар қоржнын жинадық, — деді CrowdStrike қаржы директоры Берт Подбер. — Осындай жеделдеу аясында біз 2026 қаржы жылына болжамды көтеріп отырмыз».
Есептен кейін акциялар қалай өзгерді
Есеп жарияланған соң сейсенбі күні кеңейтілген саудада CrowdStrike акциялары шамамен 1,5% төмендеді. Ал есеп шыққанға дейін аяқталған негізгі саудада акциялар 2,5% өсіп, $516,55 болды. Жыл басынан бері баға 51% көтеріліп, компания көптеген бәсекелестерін басып озды, деп жазады Bloomberg.
CrowdStrike 2026 қаржы жылғы үшінші тоқсанда (31 қазанда аяқталған) түсімінің өткен жылдың осы кезеңімен салыстырғанда 22% өсіп, $1,23 млрд болғанын хабарлады. Bloomberg-тің дерегінше аналитиктер $1,21 млрд күтті.
Түзетілген бір акцияға пайда 24% өсіп, $0,96 болды. Уолл-стриттің күткен нәтижесі — $0,94, деп жазады Barron’s.
Қайта-қайталанатын жылдық кіріс (ARR) — жазылым арқылы сатылатын бағдарламалар үшін ең маңызды көрсеткіштердің бірі. CrowdStrike ARR көлемі жылдық есепте 23% өсіп, $4,92 млрд болды. Barron’s бұл аналитиктердің күткенінен сәл жоғары екенін атап өтті.
Компанияның бағалауынша келесі тоқсанның түсімі $1,29–$1,3 млрд аралығында болады. Bloomberg-тің орташа аналитикалық бағасы — $1,29 млрд.
Сарапшылар не дейді?
CrowdStrike акцияларын бақылап отырған сарапшылардың басым бөлігі оларды «сатып алуға» кеңес береді: MarketWatch дерегінше, акцияда 27 Buy және сегіз Overweight рейтингі бар.
Сонымен қатар 18 аналитик «ұстап тұруды» (Hold), ал тек біреуі «сатуды» (Underweight) ұсынады.
Орташа мақсатты баға — $539,11. Бұл соңғы жабылу бағасынан небәрі 4% жоғары.
