Доллардың шілде айындағы көрсеткіші 2019 жылдан бергі ең үздігіне айналуы мүмкін
Доллар индексі шілде басталғалы бері 2,1%-ға өсті. Егер осындай өсім қарқыны сақталса, бұл 2019 жылдан бергі ең үздік шілде айы болмақ — сол жылы доллар 2,5%-ға қымбаттаған еді. 2025 жылдың алғашқы жартысында доллар барлық негізгі валюталарға қарсы әлсіреген болатын. Уолл-стрит бұл құлдырау жалғасады деп болжаған. ФРЖ мөлшерлемесін төмендету туралы күтулер, АҚШ еңбек нарығының баяулау перспективалары және шетелдік инвесторлардың долларлық активтерін хеджирлеуі — барлығы да еуроның $1,20 деңгейіне дейін күшеюін негіздеген. Мұндай көрсеткіш 2021 жылдан бері байқалмаған еді.
Неліктен доллар күшейіп жатыр
Еуропамен жасалған сауда келісімін АҚШ үшін тиімді деп қабылдау шілде айындағы доллардың нығаюының басты себебі болды. Societe Generale-дің валюта нарығы бойынша стратегы Оливье Корбердің айтуынша келісім сауда соғысының ушығу қаупін жойғанымен, валюта нарығы оның шарттарын «асимметриялы және теңгерімсіз» деп бағалап, еуроға деген көзқарасты күрт нашарлатты деп жазады Barron's.
Нәтижесінде позициялық қысым (position squeeze) деп аталатын құбылыс орын алды: еуроның өсуіне және доллардың құлдырауына бәс тіккен трейдерлер шығынды азайту үшін позицияларын жабуға мәжбүр болды, бұл еуропалық валютаның құлдырауын одан сайын жылдамдатты.
Долларға қосымша қолдау көрсетіп жатқан фактор — сыртқы саяси сигналдар. Канада және Мексикамен қарым-қатынас бойынша белгісіздік сақталғанымен, АҚШ 1 тамызға дейін Жапония, Индонезия және Филиппинмен сауда келісімдерін жасап үлгерді. Бұл Вашингтон одақтастарынан алыстайды деген алаңдаушылықты сейілтті.
Macquarie стратегы Тьерри Визман АҚШ-тың халықаралық ынтымақтастыққа қайта оралуы наурыз-маусым аралығындағы доллар сатылымдарының себептерін жойды деп есептейді. Бұл кезеңде инвесторлар доллардың әлемдік резервтік валюта ретіндегі мәртебесіне күмәнмен қараған еді.
Доллардың болашағы қандай болмақ
Доллар бағамын болжауға тырысып жүрген трейдерлер еуроның қозғалысын бақылауда. 29 шілдеде еуро бойынша сауда $1,1547 деңгейінде аяқталды — бұл 55 күндік жылжымалы орташа көрсеткіштен төмен. Мұндай қозғалыс техникалық тұрғыдан алғанда, төмендеу тренді сақталады деген белгі ретінде қабылданады. Дегенмен, Barron's-тың жазуынша, Уолл-стриттің валюта стратегтері доллардың екінші жартыжылдықта әлсіреуі туралы болжамдарынан бас тартуға асығар емес.
Macquarie сарапшысы Визман 2025 жылы инвесторлардың өз портфельдерін АҚШ активтеріне тәуелділіктен арылтуға ұмтылысы жалғасатынын, бұл еуро мен иенаның долларға қатысты біршама нығаюына алып келетінін айтады.
Citi валюта стратегы Даниэль Тобон ескерткендей, 1 тамызға жоспарланған АҚШ еңбек нарығы бойынша деректердің жариялануы долларды қысымға ұшыратуы мүмкін.
Контекст
30 шілдеде доллар қатарынан төрт күнге созылған өсімін тоқтатып, негізгі валюталар қоржынына қатысты әлсіреді — инвесторлар АҚШ Федералдық резервінің отырысы аяқталғанша күтуді жөн санады деп хабарлайды Trading Economics.
Сонымен қатар, АҚШ пен Қытай арасындағы екі күндік келіссөздер 29 шілдеде Стокгольмде нақты нәтижесіз аяқталды деп жазды Politico. Тараптар 12 тамызда мерзімі аяқталатын сауда бітімін ұзарту үшін жұмыс істеуге міндеттелді, бірақ нақты келісімге келген жоқ. Келіссөзден кейін АҚШ қаржы министрі Скотт Бессент жағдайды жұмсартуға тырысып: «Келіссөздер өте құрылымды өтті. Біз тек соңғы келісімге келген жоқпыз», – деді.
