Ең табысты егеменді қор АҚШ акцияларына сенімін жоғалтуда. Қай нарықты таңдап отыр
Алдағы онжылдықта еуропалық компаниялардың акциялары Нью-Йорк биржасында саудаланатын бәсекелестерінен асып түседі, деп болжайды әлемдегі ең тиімді егеменді қор — Жаңа Зеландияның $44 млрд активі бар NZ Super Fund, деп жазды Financial Times. Бұл жаһандық инвесторлардың АҚШ қағаздарының ұзақмерзімді перспективасына сенімі азайып келе жатқанын білдіреді, деп жазады Ұлыбританияның жетекші іскерлік басылымы.
Егжей-тегжейлі
Еуропаның қор нарығы NZ Super Fund үшін стандартты инвестициялық стратегиядан тыс, қосымша қаржы құйылған ең ірі бағытқа айналды. Қордың инвестициялар жөніндегі директорлары Брэд Данстан мен Уилл Гудвиннің айтуынша бұл тактикалық капитал бөлудің бір бөлігі — ең әлеуетті нарықтарға көбірек қаржы салу стратегиясы.
«Соңғы уақытта біз АҚШ-ты шорттап, еуропалық акцияларға ұзын позиция алдық… және бұл тек олардың бағалауына байланысты», — деді Данстан. Оның айтуынша шешімдер 10 жылдық көкжиекте қабылданады. Маусым айының соңында NZ Super Fund еуропалық акцияларда 2% артық салмаққа, ал АҚШ қағаздарында 3,5% кем салмаққа ие болды.
NZ Super Fund-тың Еуропаға басымдық беруі жеке инвестицияларға (private equity, PE) да қатысты. Гудвиннің сөзінше бұл жерде «жақсы мүмкіндіктер» бар. Ол «жас әрі табысқа құштар менеджерлерді» іздеп жүр, олардың қорларына ірі сомалар салып, портфельдік компаниялардың басшылығымен тұрақты байланыс орнатуды көздейді. Қазіргі таңда NZ Super Fund активтерінің шамамен 5%-ы private equity-ге орналастырылған. Дегенмен, Гудвиннің айтуынша PE-сегмент портфельдің «ірі құрылымдық бөлігіне» айналмайды.
Еуропалық акциялардың тартымдылығы
NZ Super Fund басшылығының инвестициялық ұстанымы еуропалық акциялар (Stoxx Europe 600) қазір «әділ құнынан» төмен саудалануда, ал америкалық қағаздар керісінше қымбат, сондықтан келесі онжылдықта бұл артықшылық жойылады, дегенге саяды.
Дональд Трамптың тарифтер жайлы мәлімдемелерін Данстан ұзақмерзімді инвесторлар үшін «ақпараттық шу» деп бағалады. Бірақ АҚШ-тағы пайыздық мөлшерлемелер бойынша болжам оны америкалық акцияларды асыра бағаланған деп санауға итермелеп отыр. Қазір АҚШ қағаздары P/E мультипликаторымен 27,5 деңгейінде саудаланса, Еуропада бұл көрсеткіш небәрі 16 шамасында.
Контекст
Соңғы айларда еуропалық акциялардың табыстылығы америкалық қағаздарға жол берді. Трамп ең радикалды тарифтік қауіптерін жұмсартты, ал АҚШ компанияларының кірістері жоғары деңгейде қалды. Соңғы 10 жылда әлемнің ең ірі экономикасының акциялары еуропалық нарықтан айтарлықтай озып кетті: S&P 500 индексі 310%-дан астам жиынтық табыс көрсетсе, Stoxx Europe 600 бар болғаны 115% табыс әкелді, деп жазады FT.
NZ Super Fund соңғы 10 жылда да, 20 жылда да (қор 2003 жылдан бастап инвестиция жасай бастады) әлемдегі ең тиімді суверенді қор болып саналады. Оның орташа жылдық табыстылығы 10%-дан асады, деп жазады FT Global SWF платформасының деректеріне сүйене отырып.
Қордың басшылығы табыстың құпиясын «көп тәуекел алумен» байланыстырады — соңғы жиырма жылда бұл стратегия өзін толық ақтап шықты. NZ Super Fund «біртұтас портфель» (total portfolio) әдісін қолданады. Бұл тәсіл тәуекелді барлық портфель бойынша бағалайды және дәстүрлі модель сияқты активтердің жеке кластарына шектеу қоймайды, сондықтан ауқымды әрі икемді инвестициялық шешімдер қабылдауға мүмкіндік береді.
