ЕО Google-дың ЖИ оқытудағы үстемдігін тексереді
Еурокомиссия Google-ға қатысты жаңа антимонополиялық тергеуді бастады: ведомство компанияны «нарықтағы үстем жағдайын теріс пайдаланды» деп күдіктенеді. Брюссельдің пікірінше, Google пайдаланушылар компания платформаларына, соның ішінде YouTube-қа жүктеген контентті жасанды интеллектті оқыту және оны жұмыс істету үшін қолданған болуы мүмкін. Reuters жазғандай, бұл — Еуроодақтың америкалық технологиялық алпауыттарға қойылатын талаптарды қатаңдатудағы кезекті қадамы.
Егжей-тегжейлі
Еурокомиссия Google бәсекелестікке кедергі келтіріп отыр ма — соны тексеріп жатыр. Тексеріс компанияның баспа үйлері мен контент жасаушыларға әділетсіз талаптар қоюы немесе олардың материалдарына артықшылықты қолжетімділік беруі мүмкін деген күдікке негізделген. Реттеушінің пікірінше, мұндай тәжірибе Google-ға жасанды интеллектті дамытуда басқа технология жасаушыларында жоқ басымдық беруі ықтимал.
Брюссель сонымен қатар Google-дың AI Overviews және AI Mode (Google іздеуіндегі ЖИ-қысқаша шолулар) функцияларын қандай деңгейде баспагерлердің контентіне негіздеп шығаратынын тексереді. Мұнда мәселе — компанияның бұл контентті тиісті өтемақысыз пайдалануында және баспагерлердің Google іздеуінде көрінбей қалу қаупінсіз одан бас тарта алмауында.
Google Еурокомиссия жүргізіп жатқан тергеу инновацияларды шектеу қаупін туғызатынын айтады, деп жазды The Wall Street Journal компания өкіліне сілтеме жасап. Оның айтуынша, сервис «ЖИ дәуіріне өту барысында» жаңалық индустриясы және шығармашылық секторымен тығыз ынтымақтастықты жалғастыруға ниетті.
Бұл не білдіреді?
Бұл — Еурокомиссия Google-ға қатысты бір айға жетпейтін уақыт ішінде бастаған екінші тергеу. Алғашқысы компанияның спамға қарсы құралдарына байланысты болған. Сонымен бірге Еурокомиссия баспагерлерден Google-дың AI Overview құралына қатысты заңды шағым алған. WSJ жазуынша, шағымда Google жаңалық сайттарынан трафикті әділетсіз түрде бұрып әкетеді деп айыпталған.
Реттеушілік бақылаудың күшеюі Big Tech компанияларының жаңа технологиялардағы үстемдігі бәсекелестерді нарықтан ығыстыруы мүмкін деген өсіп келе жатқан алаңдаушылықты көрсетеді — және сонымен қатар АҚШ-пен қатынастардағы шиеленісті арттырады. Себебі соңғы жылдары ЕО қабылдаған заңдар Вашингтон үшін сезімтал тақырыпқа айналды, деп жазады Reuters.
Қыркүйек айында ЕО Google-ды жарнамалық технологиялар нарығындағы антимонополиялық ережелерді бұзғаны және бәсекелестікке нұқсан келтіргені үшін дерлік €3 млрд айыппұл салған еді. Ол кезде Google бұл шешімді қате деп атап, оны даулауға ниетті екенін мәлімдеген.
The Wall Street Journal атап өткендей, соңғы уақытта Еурокомиссия жалпы алғанда технологиялық алпауыттардың өз сервистеріне жасанды интеллектті қалай енгізіп жатқанын қатаң бақылауға алған. Мәселен, желтоқсан айының басында реттеуші Meta Platforms компаниясының WhatsApp мессенджеріне ЖИ-ботын қалай интеграциялап жатқанына және бәсекелес ЖИ-провайдерлеріне қолжетімділікті қалай шектейтініне қатысты тергеуді бастаған.
Акция ахуалы
Alphabet компаниясының A класты акциясы 9 желтоқсандағы премаркетте шамамен 0,6% арзандады. Алдыңғы күнгі негізгі сауда сессиясы 2,29% төмендеумен аяқталған еді. Соған қарамастан, 2025 жылғы бастауымен салыстырғанда бұл қағаздар қазір 66% қымбат.
Сарапшылардың көбі Alphabet акциясын «сатып алуға» кеңес берді: MarketWatch дерегінше, Buy — 54, және Overweight — 9 рейтинг бар, ал Hold («ұстап тұру») — 12, «сату» рейтингі жоқ. Орташа мақсатты баға — $331,82, бұл соңғы жабылудан тағы 5,8% өсу әлеуетін білдіреді.
