Еуропа фармацевтикасы Трамптың баж салығына әлсіз реакция берді
АҚШ президенті Дональд Трамп брендтелген (фирмалық) дәрі-дәрмектерге 100 пайыздық импорттық баж салығын енгізетіні туралы мәлімдегеннен кейін, Еуропаның ірі фармацевтикалық компанияларының акциялары сауда-саттықтың ашылуында арзандады. Алайда кейіннен олар жоғалтқан позицияларын біртіндеп қалпына келтіре бастады. Инвесторлар Трамптың бұл қадамына алаңдаушылық білдіріп отыр, бірақ нарықтың жалпы реакциясы әлсіз болды.
Егжей-тегжейлі
Копенгагенде сауда-саттық ашылған кезде Novo Nordisk акциялары 2,5%-ға арзандады, бірақ кейіннен құлдырау 0,7%-ға дейін азайды. AstraZeneca (Лондон) акциялары алғашқыда 0,5%-ға төмендегенімен, тез арада қайта қалпына келіп, баға нөлдік деңгейге оралды. Roche пен Novartis (Цюрих) акциялары алғашқы минуттарда төмендеді, бірақ кейіннен қайта көтеріліп, 25 қыркүйектегі жабылу деңгейінен жоғары саудаланып жатыр.
Трамп не деді
Трамп өткен түнде мәлімдеме жасап, 1 қазаннан бастап АҚШ-қа шетелден әкелінетін фирмалық дәрі-дәрмектерге 100% импорттық баж салығы енгізілетінін хабарлады. Ол бұл салықтан шетелдік компаниялар тек АҚШ аумағында зауыт сала бастаған кезде ғана босатылады деп атап өтті. Бұған дейін Трамп дәрі-дәрмек импортына қойылатын баж салығын 200%-ға дейін көтеремін деп қорқытқан болатын.
Сарапшылар не дейді
JPMorgan Chase стратегтерінің айтуынша бұл баж салығы фармацевтикалық секторға айтарлықтай әсер етпейді. «100 пайыздық баж салығынан АҚШ-та өндірісті арттыру арқылы оңай айналып өтуге болады», – делінген олардың Трамп мәлімдемесінен кейін жариялаған есебінде. «Біздің ойымызша, бұл баж салығы біз қамтып отырған ірі фармацевтикалық компанияларға үлкен қысым жасамайды және оның әсері өте шектеулі болады», – деп қорытындылады сарапшылар.
