Еуропа мен Украина соғысты тоқтату туралы ұсыныс әзірлеп жатыр. Құжатта 12 тармақ бар
Еуропалық елдер Украинамен бірлесе отырып, майдан шебі қазіргі қалпында сақталатын бейбіт ұсыныс дайындап жатыр. Бұл туралы Bloomberg өз дереккөздеріне сілтеме жасап хабарлады. Жоспарда 12 тармақ бар, ал оның орындалуын АҚШ президенті Дональд Трамп төрағалық ететін Бейбітшілік кеңесі бақылайды. Сонымен қатар, бірнеше БАҚ Трамп пен Ресей президенті Владимир Путиннің таяуда болады делінген кездесуі әзірге өтпейтінін хабарлады.
Егжей-тегжейі
Ұсыныс бойынша, екі тарап атысты тоқтатуға келісіп, территориялық алға жылжуды доғарған соң тұтқындарын алмасады және Украинадан алып кеткен балалар елге қайтарылады. Киевке қауіпсіздік кепілдіктері беріледі, соғыстан келген шығынды қалпына келтіруге қаражат бөлінеді және ЕО-ға жедел түрде кіруге рұқсат беріледі. Жоспарда Ресейге салынған санкцияларды кезең-кезеңімен алып тастау да қарастырылған, бірақ Ресейдің Орталық банкінің бұғатталған 300 млрд долларға жуық активтері тек Мәскеу соғыстан кейінгі Украинаны қалпына келтіруге үлес қосуға келіскен соң ғана қайтарылады.
Сонымен қатар, Мәскеу мен Киев ресейлік әскерлер бақылауындағы аймақтарды басқару туралы келіссөздер бастауы мүмкін. Алайда Еуропа да, Украина да бұл жерлерді Ресей жері ретінде мойындамайды, деп нақтылады Bloomberg дереккөздері.
Агенттік мәліметіне сенсек, жоспардың кейбір тұстары әлі өзгеруі мүмкін. Сонымен қатар, ұсынысты АҚШ-тың қолдауы қажет болады. Сол себепті еуропалық дипломаттар осы аптада Вашингтонға баруы мүмкін.
Өткен аптада Путинмен телефон арқылы сөйлескен соң Трамп Ресей президентімен Будапештте кездесу жоспарланғанын айтқан. Алайда нақты күні белгіленбеген. АҚШ мемлекеттік хатшысы Марко Рубио дүйсенбі күні Ресей Сыртқы істер министрі Сергей Лавровпен телефон арқылы сөйлесті, бірақ саммитке дайындық үшін кездесуге келісе алмады. Осыдан кейін, 21 қазанда Ақ үйдің өкілі Bloomberg-ке Трамптың Путинмен жақын арада кездесу жоспарлап отырмағанын мәлімдеді.
Жаңалық толықтырылады.
