«Үлкен прогресс жасалды»: Трамп пен Путиннің келіссөзі Будапештте өтеді
АҚШ президенті Дональд Трамп Ресей президенті Владимир Путинмен болатын жаңа кездесуі Будапештте өтетін хабарлады. Ол бұл туралы Ресей басшысымен телефон арқылы сөйлескеннен кейін Truth Social желісінде жазды.
Егжей-тегжейлі
Трамп екі президенттің жаңа бетпе-бет келіссөзінің қашан өтетінін нақтылаған жоқ. Оның айтуынша, келесі аптада екі тараптың «жоғары деңгейдегі кеңесшілері» алдын ала кездесу өткізеді, ал АҚШ делегациясын мемлекеттік хатшы Марко Рубио басқарады. Кездесудің нақты өтетін орны кейін анықталады.
«Президент Путин екеуміз Ресей мен Украина арасындағы «масқара соғысты» тоқтатуға бола ма, соны анықтау үшін Будапештте (Венгрия) кездесеміз», — деп жазды Трамп.
Трамп пен Путиннің телефон арқылы сөйлесуі АҚШ президентінің 17 қазанда Ақ үйде Украина басшысы Владимир Зеленскиймен кездесуінің қарсаңында өтті. Трамп Зеленскиймен Путинмен болған әңгіме жайын талқылауды жоспарлап отырғанын айтты.
«Бүгінгі телефон арқылы әңгімеден кейін үлкен прогресс жасалды деп санаймын», — деді АҚШ президенті. Ол бұл әңгімені «өте нәтижелі» деп атады.
Контекст
Соңғы уақыттарда Трамп Ресейдің Украинадағы соғысты тоқтатудан бас тартқанына және Путиннің бейбіт келіссөздер үшін Зеленскиймен жеке кездесуден жалтарып жүргеніне бірнеше рет наразылық білдірген, деп жазды Bloomberg. Қыркүйек айында АҚШ президенті алғаш рет «Украина өз жерін толық қайтара алатындай позицияда тұр» деп мәлімдеді. The Wall Street Journal бұл сөзді Трамптың позициясындағы күтпеген өзгеріс әрі Ресейге бағытталған өткір сын деп сипаттады.
Соңғы апталарда Трамп конфликтті тоқтату үшін Путинге қысымды күшейткісі келетінін мәлімдеді. АҚШ-тың экономикалық серіктестерін ресейлік энергия ресурстарын сатып алудан бас тартуға шақырып, Украинаға «Томагавк» зымыранын беру мүмкіндігін меңзеді, деп қосты Bloomberg.
15 қазан, сәрсенбі күні Трамп Үндістан премьері Нарендра Моди оған Ресей мұнайын сатып алуды тоқтатуға уәде бергенін айтты. Бірақ, АҚШ президенті бұл қашан жүзеге асатынын нақтылаған жоқ. Bloomberg сұхбат алған үнді энергетикалық компаниялардың алтауынан үшеуі Ресейден Үндістанға мұнай жеткізу көлемі қысқа мерзімді перспективада расымен азаюы мүмкін екенін хабарлаған. Осы жаңалық аясында Brent маркалы мұнай бағасы бес айлық минимумнан шамамен 1% көтерілді.
