Еуропадағы қорғаныс компанияларының акциялары әлі де өсу кезеңінің басында ғана тұр
Morgan Stanley сарапшылары еуропалық қорғаныс компаниялары әлі үлкен әлеуетке ие деп есептейді. Олардың пікірінше бағалау тартымды, ал тарихи динамика — жағымды. Аналитиктер: «Қорғаныс секторында әдетте өсім жылдың соңында басталып, қаңтарда күшейеді. Қазір жағдай осы сценарийге толық сәйкес келеді», — дейді.
Morgan Stanley-дің «ең жақсы таңдауы»
Банк Еуропадағы қорғаныс акцияларының ішіндегі басты фаворит ретінде Германияның Rheinmetall компаниясын атады. Бұл компания танктер және басқа әскери техника шығарады. Morgan Stanley болжамы бойынша Rheinmetall акциялары алдағы 12 айда 50%-дан көп өсуі мүмкін. Тек 2025 жылдың өзінде компанияның капитализациясы 170%-ға артты.
Аналитиктер атап өткендей, көптеген ірі инвестқорлар әлі де бұл секторға белсенді кірмеген. Ұзақ позициядағы жаһандық инвестқорлардың 56% бұл секторға мүлде инвестиция салмайды. Ал 81%-ы Rheinmetall акцияларын ұстамайды. Morgan Stanley мұны әлі де өсу үшін кеңістік бар деген белгі деп санайды.
Нарықтағы жағдай
9 желтоқсанда Rheinmetall акциялары 3,9%-ға, ал Goldman Sachs жасаған Еуропаның қорғаныс индексі 4%-ға өсті. Бұл өсім Германияда жаңа ірі әскери шығындар пакетін бекітуге байланысты болып отыр. Келесі аптада Германия парламенті €52 млрд көлеміндегі рекордтық қорғаныс келісімдерін мақұлдауы мүмкін.
Бұған дейін сектор Украинаға қатысты бейбіт келісім талқылаулары салдарынан қысымда болған еді.
Басқа ықтимал бенефициарлар
Jefferies сарапшыларының пікірінше Германияның жаңа тапсырыстарынан ең көп пайда көретін — Rheinmetall. Мысалы, Puma бронемашиналары бойынша келісім компанияға шамамен €2 млрд әкелуі мүмкін.
Сарапшылар сондай-ақ басқа мердігерлер — Renk Group және Rolls-Royce компанияларының да табыс табуына мүмкіндік бар екенін айтады. Себебі олар әскери техникаға арналған трансмиссиялар мен қозғалтқыштар жеткізеді.
