Еуропалық қорғаныс компанияларының акциялары құлдыраудан кейін қалпына келе бастады

7 сәуірде өткен сауда сессиясында еуропалық қорғаныс компанияларының акциялары алғашында күрт төмендеді, бірақ кейін қайтадан қалпына келе бастады. Дональд Трамп бастаған сауда соғысына байланысты нарықтағы жалпы дүрбелеңнен бөлек, саланы америкалық ұшақ бөлшектерін өндіруші компанияның форс-мажоры туралы жаңалық та шайқалтты. Инвесторлар АҚШ-тың баждары жеткізу тізбектерін бұзуы мүмкін деп қауіптеніп, ең көп табыс әкелген акциялардан пайдасын бекітіп жатты. Алайда сарапшылар бұл қорқыныштарды тым асыра сілтеу деп бағалап, акцияларды сатып алуға қолайлы мүмкіндік деп санайды.

Толығырақ

— Thyssenkrupp — Германияның қорғаныс алыбының акциялары алдымен 23%-ға дейін құлдырап, соңғы 1,5 айдағы ең төменгі деңгейге түсті, бірақ кейін жоғалтқан позицияларының көп бөлігін қайтарды. Жаңалық шыққан сәтте құны тек 1%-ға ғана төмендеген.

— Renk Group — тағы бір неміс қорғаныс компаниясының акциялары 20%-ға дейін түсіп, кейіннен 2% өсім көрсетті.

— Thales — француздық қорғаныс концернінің акциялары Париждегі саудада 13%-ға төмендегенмен, кейін шығындарын 1%-ға дейін қысқартты.

— Rheinmetall — Германияның қару өндірушісі акциялары бір кездері 25%-дан астам арзандап, компания тарихындағы ең нашар күнге жақындады. Бірақ кейін өсімге шықты және жаңалық шыққан сәтте 1%-ға шегінде саудаланып жатты.

— Saab — швед қару-жарақ өндірушісінің акциялары бастапқы 18% төмендеуден кейін шығынды 1%-ға дейін қысқартты.

— Leonardo — италиялық қорғаныс компаниясының бағасы 16,5% құлдырағаннан кейін 0,7% өсім көрсетті.

— АҚШ-та Lockheed Martin, General Dynamics және Northrop Grumman акциялары бір сәтте әрқайсысы 2%-дан астамға төмендеді.

Саладағы жағдай

Еуропаның ірі қорғаныс компаниялары дүйсенбі күнгі саудада жоғары құбылмалылық көрсетті. Бұл жалпы әлемдік нарықтардағы дүрбелеңге байланысты болды. Сонымен қатар Reuters хабарлағандай, Howmet Aerospace атты америкалық компания — Airbus пен Boeing үшін бөлшектер жеткізушісі — форс-мажор жариялағанын мәлімдеді. Олар Трамптың баждарына байланысты кейбір жеткізілімдерді тоқтатуы мүмкін екенін ескертті.

Инвесторлар АҚШ-тың сауда саясаты жеткізу тізбектеріне қауіп төндіруі мүмкін деп қорқып, 2025 жылы ең жоғары табыс берген еуропалық акциялардан пайдасын жауып жатты, деп түсіндіреді Bloomberg.

Осы уақытқа дейін қорғаныс секторы Еуропада ең табысты салалардың бірі болды. Бұл ЕО-ның қауіпсіздігін күшейтуге бағытталған 800 млрд еуролық қайта қарулану жоспарына байланысты еді. Трамп ЕО елдерін өз қауіпсіздігі бойынша АҚШ-қа тым тәуелді деп бірнеше рет сынаған. Германияда мемлекеттік қарыз реформасы қабылданып, қорғаныс шығындарын арттыру жолы ашылды. Ұлыбритания премьер-министрі Киир Стармер де қорғаныс шығындарын арттыруға уәде берген.

Аналитиктер не дейді

Bank of America-ның Еуропа, Таяу Шығыс және Африка (EMEA) аймағы бойынша аэроғарыш және қорғаныс салалары бойынша зерттеу бөлімінің басшысы Бен Хилан CNBC-ге:

«Бүгінгі құлдырау — соңғы үш–алты айда инвесторлар үшін аса танымал болған сектордағы позицияларды қысқартудың нәтижесі», — деді.

Ол мұны de-grossing деп атап, хедж-қорлардың қызып кеткен сегменттен жаппай шығуымен байланыстырды. Хиланның пікірінше Трамптың жаңа тарифтері еуропалық қорғаныс компанияларына қатты әсер етпейді. Керісінше, қазіргі бағалар инвесторлар үшін тамаша мүмкіндік, деді ол.

«Еуропада қазір жағдай өзгеріп жатыр — 5–10 жылға айқын өсім көкжиегі пайда болды, өйткені елдер қорғанысқа ЖІӨ-нің 3%-ын бағыттауға тырысуда», — деді Хилан. Оның айтуынша, алдағы маңызды кезең — компаниялардың тоқсандық есептері болмақ.

Morningstar сарапшысы Лоредана Мухарреми де еуропалық қорғаныс секторына оң көзқараста. Ол CNBC-ге берген пікірінде:

«Жаңа тарифтердің толық әсерін бағалау әлі ерте, бірақ Еуропа әлі де АҚШ-тың қорғаныс техникасының таза импорттаушысы болып қала береді», — деді. Оның айтуынша, BAE Systems, Rheinmetall, Thales, Saab және Leonardo секілді компаниялар Трамптың қайта сайлануын күтпей-ақ, АҚШ-та өз өндірістерін кеңейтіп қойған. Бұл оларға АҚШ-тың қорғаныс келісімшарттарына қол жеткізуге және баж салығынан қорғануға мүмкіндік береді.