Ferrari 9 жылдағы ең үлкен акция құлдырауынан кейін Уолл-стрит болжамынан асып түсті
Люкс автокөліктер өндірушісі Ferrari үшінші тоқсанда табыс пен кірістің өскенін хабарлады. Компания сарапшылардың болжамынан жақсы нәтиже көрсетті. Өндіріс шығындары азайып, жеке тапсырыстар көбейді. Ferrari АҚШ-тағы жоғары кедендік салықтарға мән бермей, тұрақты өсімін жалғастырды. Бірақ 9 қазандағы құлдыраудан кейін компания акциялары әлі де қысымда тұр — сол кезде инвесторлардың 2030 жылға арналған ұзақмерзімді болжамға көңілі толмаған еді.
Егжей-тегжейі
Үшінші тоқсан қорытындысы бойынша Ferrari-дің таза пайдасы өткен жылмен салыстырғанда 2%-ға өсіп, €382 млн (шамамен $439,5 млн) болды. LSEG сауалнамасына қатысқан сарапшылар €367,33 млн күтті, деп жазады CNBC. Кіріс 7,4%-ға өсіп, €1,77 млрд болды, ал жеткізілген көлік саны 3401 дана болды.
«Біз жоспарланған бағыт бойынша сенімді түрде дамып келеміз», — деді Ferrari бас директоры Бенедетто Винья. Ол 9 қазандағы Инвесторлар күні шарасында компания 2030 жылға дейінгі тұрақты өсім жоспарын таныстырғанын еске салды.
Ferrari қазан айында жаңартылған 2025 жылға арналған болжамын растады: кіріс кем дегенде €7,1 млрд болады (бұрын €7 млрд деп күтілген). Компания мұны қымбат үлгілер мен жеке опцияларға сұраныстың артуымен түсіндіреді. Мысалы, SF90 XX және 12 Cilindriа модельдері жоғары сұранысқа ие болды. Сонымен қатар, жылдың екінші жартысында өндіріс шығындары төмендеді. Bloomberg жазғандай, есеп Ferrari-дің АҚШ-тағы жоғары салықтар мен Қытайдағы сатылым азаюы туралы алаңдаушылықты еңсергенін көрсетті.
4 қарашадағы саудада Ferrari-дің америкалық депозитарлық акциялары 2,6%-ға қымбаттап, $402,1 болды. Милан биржасында сауда күні €350,7 деңгейінде аяқталып, 3,2% өсті. Дегенмен, жыл басынан бері компания акциялары шамамен 15% арзандаған.
Контекст
Ferrari-дің қаржылық есебі компания акцияларының тарихтағы ең үлкен біркүндік құлдырауынан кейін жарияланды. 9 қазанда акция бағасы 15,4%-ға түсіп, €354 деңгейінде жабылды. Құлдырау соншалықты қатты болды, сондықтан Милан биржасында сауданы уақытша тоқтатуға тура келді, деп хабарлайды Reuters.
Бұл 2016 жылы Ferrari биржаға шыққаннан бергі ең үлкен біркүндік төмендеу болды. Инвесторларды 2030 жылға арналған мақсаттар қанағаттандырмады. Capital Markets Day іс-шарасында компания 2030 жылға дейін жылдық кірісті шамамен €9 млрд-қа, ал бір акцияға шаққандағы табысты €11,5 немесе одан жоғары деңгейге жеткізуді жоспарлаған еді.
Бірақ Bloomberg атап өткендей, бұл болжам үш жыл бұрынғы жоспарға қарағанда баяу өсім қарқынын көрсетеді.
