Финтех-компанияның акциялары түсініксіз болжамнан кейін 40%-ға құлдырады
Fiserv финтех-компаниясының акциялары 2022 жылдың соңынан 2024 жылдың соңына дейін екі еседен аса өскен еді. Алайда үшінші тоқсан қорытындысы мен жылдық табыс болжамының төмендеуінен кейін акциялар 47%-ға құлдырады. Бұл – компания тарихындағы ең ірі құлдырау, деп хабарлайды Bloomberg. Егер акция бағасы қайта қалпына келмесе, Fiserv биыл S&P 500 индексіндегі ең нашар нәтиже көрсеткен акция болуы мүмкін, дейді MarketWatch.
Бұл құлдыраудың басты себебі – АҚШ-тағы банктер мен несие одақтарына технологиялық инфрақұрылым ұсынатын қаржылық шешімдер бөліміндегі қиындықтар. Bloomberg мәліметінше, осы бағыттағы табыс 3%-ға азайып, маржа 42,5%-ға дейін төмендеген. Бұл өткен жылмен салыстырғанда шамамен бес пайыздық тармаққа төмен. Үшінші тоқсанға арналған түзетілген табыс пен пайда көрсеткіштері сарапшылар күткеннен әлдеқайда төмен болды. Осыған байланысты Fiserv бір акцияға шаққандағы жылдық пайда бойынша болжамын $8,5–8,6 аралығына дейін төмендетті. Бұрын бұл көрсеткіш $10,15–$10,3 аралығында болады деп күтілген.
Бұл болжамның күрт өзгеруі Уолл-стрит сарапшыларын таң қалдырды. Jefferies сарапшысы Тревор Уильямс бұл жағдайды «түсіндіру қиын» деп сипаттады. Оның айтуынша, компания іс жүзінде «толықтай қайта жүктелді»: енді Fiserv органикалық табыстың 3,5–4,5% ғана өсетінін болжап отыр, ал бұған дейін ол көрсеткіш 10% болады делінген еді. Бұл болжам шілде айында, яғни жылдың жартысы өтіп кеткен кезде жарияланғанын ескерсек, мұндай өзгеріс тым күрт көрінеді, дейді MarketWatch.
Truist сарапшысы Мэттью Коад та мұндай ауқымды қателікті финтех саласында бұрын-соңды көрмегенін айтты.
Fiserv-тің бас директоры Майк Лайонс, биыл ақпанда қызметке келген, сарапшылармен телефон арқылы сөйлесу барысында ішкі тексеру нәтижесінде компанияның бұрынғы уәдесін орындай алмайтыны белгілі болғанын айтты. Ол бұған себеп ретінде Аргентинадағы өсімге деген шамадан тыс үміт пен шығынды азайтуға бағытталған бұрынғы саясатты келтірді. Бұл саясат компанияның клиенттерге сапалы әрі уақтылы өнім ұсыну қабілетін әлсіреткен.
Baird сарапшысы Дэвид Кенигтің айтуынша, соңғы жылдары Аргентина Fiserv-тің негізгі табыс көздерінің бірі болған. Бірақ енді бұл аймақтағы өсім баяулап жатыр. Егер Аргентина нарығын есепке алмаса, компания 2023–2024 жылдары органикалық өсім бойынша 5–6% көрсеткен болар еді. Ал Аргентина есебімен бұл көрсеткіштер сәйкесінше 12% және 16%-ға жеткен.
1984 жылы құрылған Fiserv – финтех нарығындағы ең ірі ойыншылардың бірі. Компания бастапқыда банктерге деректерді өңдеу қызметін ұсынған. Қазір ол төлем жүйелерінен бастап, қаржы ұйымдарына арналған бұлтты сервистерге дейін әртүрлі шешімдер ұсынады.
