Gap вирустық жарнамадан кейін болжамнан асып кетті. Акциясы 10% өсті
Better in Denim атты вирусқа айналған жарнама науқаны Gap-ке (оның құрамына Old Navy, Banana Republic және Athleta брендері де кіреді) сатылым бойынша болжамды асыра орындауға және жылдық болжамын көтеруге көмектесті. Мықты тоқсандық нәтижелер мен жас сатып алушылардың артуы ритейлер акциясын қолдап, олар 10% күрт өсті. Barclays пен Jefferies сарапшылары да нәтижелер жарияланбай тұрып-ақ, Gap акциясына берген рейтингін көтеріп, олардың өсу әлеуетін 30% деп бағалаған еді.
Егжей-тегжейлі
Gap-тің салыстырмалы сатылымы өткен жылмен салыстырғанда 5% өсті, ал негізгі Gap бренді бойынша бұл көрсеткіш 7% артты. Пандемия кезіндегі серпілісті есепке алмағанда, бұл — 2017 жылғы мерекелік тоқсаннан бергі ең жоғары өсім және Уолл-стриттің 3,1% деген болжамынан едәуір жоғары, деп жазды CNBC StreetAccount деректеріне сүйеніп. Сонымен қатар, Gap-тің барлық брендтері бойынша бұл көрсеткіш жеті тоқсан қатарынан оң аймақта қалып отыр.
Компанияның табысына осы жазда шыққан Katseye тобы қатысқан Better in Denim вирус жарнамасы да үлкен әсер етті, деп жазды Business Insider. Жарнама әлеуметтік желілерде үлкен хитке айналып, сатылымды айтарлықтай арттырғанын басылым Gap бас директоры Ричард Диксонның сөзіне сілтеме жасап хабарлады.
«8 млрд көрсетілім және 500 млн қаралым жинаған Better in Denim жаһандық мәдени феноменге айналды және брендтің тарихындағы ең сәтті кампаниялардың бірі болды. Ол трафиктің айтарлықтай артуына және деним сатылымының екі таңбалы өсіміне себеп болды», — деді Диксон 1 қарашада аяқталған үшінші тоқсан қорытындысы бойынша (Business Insider келтірген сөз).
Басылымның жазуынша, жарнама «деним-соғысы» аясында одан әрі назар аудартты: American Eagle және Lucky Brand сияқты бірнеше бренд бірден джинсыны насихаттайтын жарқын кампанияларын шығарды.
Жарнама Z буынының өкілдерін тартуға көмектесті, сипаттауынша бұл буын «өте белсенді аудитория». Ал төлем қабілеті жоғары сатып алушылар үшін Gap желісі премиум мен масс-маркет аралығындағы мықты позициясының арқасында тартымды, деді компанияның бас директоры.
21 қарашадағы саудада Gap акциясы шамамен 10% өсіп, $25,3-ға дейін жетті. Бұл — мамырдан бергі максимум. Алайда, 2025 жылдың басымен салыстырғанда қағаз қазір небәрі 7% қымбат.
Компания өз есебінде не туралы хабарлады?
Компанияның бір акцияға пайдасы $0,62 болды — LSEG сарапшылары күткен $0,59-дан жоғары, деп хабарлады CNBC. Табыс $3,94 млрд-қа жетті, ал сарапшылар $3,91 млрд деп болжаған. Компанияның таза пайдасы жылдық есепте шамамен 14% төмендеп, $236 млн-ға дейін азайды. Бұл негізінен кедендік баждарға байланысты, деді CNBC-ге берген сұхбатында қаржы директоры Катрина О’Коннелл.
Ақпан айының басында аяқталатын қаржы жылы бойынша Gap бұрын жариялаған диапазонның төменгі шегін көтерді: сатылымдар 1,7–2% өседі деп күтіледі, бұл сарапшылар болжамына сай. Бұған дейін компания 1–2% өсім болатынын айтқан. Сондай-ақ, киім ритейлері жылдың қорытындысы бойынша операциялық маржа шамамен 7,2% болады деп күтеді (алдыңғы болжам 6,7%–7% еді). Болжамға 1–1,1 пайыздық пунктте бағаланатын кедендік алымдардың әсері де кіреді.
Сарапшылар пікірі
Barclays 17 қарашада Gap акциясына берілген рейтингті «ұстаудан» (Equalweight) «сатып алуға» (Overweight) дейін көтеріп, мақсатты бағасын $19-дан $30-ға дейін ұлғайтты. Бұл таргет акцияның 30% өсуін білдіреді.
Jefferies те 14 қарашада рейтингті «бейтараптан» (Hold) «сатып алуға» (Buy) дейін жақсартып, мақсатты бағаны $22-дан $30-ға көтерді — бұл да шамамен 30% өсу әлеуетін білдіреді.
Киім ритейлерінің қағазын 19 сарапшы қадағалайды. «Ұстауға» — 10, ал «сатып алуға» — 3 сарапшы кеңес берді.
